Kufundija Mupya mwa Kusapwila
1. Le weivwene namani powaendele musunsa umbajinji mu busapudi?
1 Lelo ukivulukile powaendele musunsa umbajinji mu busapudi bwa ku njibo ne njibo? Padi wadi na moyo. Shi mwadi musapula na muntu wakufundije Bible nansha musapudi mukwabo, kwabudilwepo kusangela akukwashe. Pano pokodi mwingidi wa bwino, nobe kodi na bukomo bwa kukwasha bapya mu busapudi.
2. Lelo basapudi bapya basakilwa kwifunda bika?
2 Basapudi bapya basakilwa kufundijibwa muswelo wa kushilula mīsambo na muntu, wa kwingidija Bible pa kibelo, wa kulonga kujokela’mo kupya, wa kushilula ne kwendeja bifundwa bya Bible. Basakilwa kadi ne kufunda mwa kusapwila mu miswelo palapala, kimfwa busapudi bwa mu bipito ne bwa mu bifuko bya busunga. Ukokeja kwibakwasha belumbulule mu ino miswelo ya busapudi kupityila ku kimfwa kyobe ne ku milangwe yowibapa.
3. I muswelo’ka otukakwasha bakwabo na kimfwa kyetu?
3 Fundija na Kuleta Kimfwa: Yesu wālombwele bandi bana ba bwanga mwa kusapwila. (Luka 8:1; 1 Pet. 2:21) Pokwata mpangiko ya kusapula na musapudi mupya, teakanya’ko musapwilo upēla ukokeja kwiulwa na musapudi, padi na kwingidija musapwilo kampanda utanwa mu mabuku etu. Penepa, shilula kusapula ku kibelo kibajinji nansha ne kya bubidi amba musapudi evwane byonena. Pa kwenda ku kibelo kikwabo, ubwanya kulomba musapudi anene mwaamwenanga musapwilo owasapulanga ne buya bwao. Kino kikamukwasha amone kamweno ka kwingila na bakwabo ne kikamupēlela kwitabija madingi o-onso okamupa pa kupwa kwa kusapula.
4. I muswelo’ka otubwanya kukwasha musapudi mupya pa kupwa kuteja musapwilo wandi?
4 Pāna Madingi: Kadi Yesu wāpele bandi bana ba bwanga bulombodi bwa mwa kusapwila. (Mat. 10:5-14) Ukokeja kukwasha musapudi mupya uno muswelo. Shi ke aye wa kunena, muteje na katentekeji. Kadi pa kutaluka pa kibelo, mufwije’ko bya binebine ne na kanye, nansha shi ubamonanga’mba kudi pamo pa kulumbulula mu musapwilo wandi. Kumeso kwa kumupa madingi, tala bidi shi usa kulumbulula musapwilo wandi ku kibelo kikwabo. Padi wadi wazakala bitupu. Vuluka kadi amba, basapudi bonso kebadipo na bukomo bwa muswelo umo, kadi kudi miswelo mivule miyampe ya kulonga kintu kimo kyonka.—1 Kod. 12:4-7.
5. Le tukanena bika potuboya mulangwe wa kupa muntu madingi?
5 Kyaba kimo musapudi ukokeja kukulomba madingi. Ino shi kalombele’opo, boya’ko mulangwe wa kumukwasha. Le ukamukwasha namani na bunwa? Basapudi bamo ba bwino bepangulanga’tu amba, “Le mbwanya kukupa’po mulangwe?” nansha’mba, “Le wadi ubebimone namani?” Muswelo mukwabo i wa kunena’tu amba, “Ponadi nekidi musapudi mupya, nadi nkolelwa ku . . . , ino kintu kyankweshe i . . .” Kyaba kimo i biyampe kutala nandi mu dibuku Comment raisonner. Kutyina’mba wakamulundikila bivulevule, i biyampe kumupa milangwe pa mwanda umo bidi kete utala musapwilo wandi.
6. Pa bitala mwingilo, le “kilonda kinonanga kilonda” kikwabo namani?
6 Kilonda Kinonanga Kilonda: Temote, musapudi wa bwino wākankamikilwe na Polo ate mutyima monka mu kufundija ne kwendelela kumeso. (1 Tem. 4:13, 15) Padi ke papite myaka mivule na powaendele musunsa mubajinji mu busapudi, endelela na kulumbulula bwino bobe ne kuleka’byo mpika. Boila ñeni ku basapudi bosapula nabo, nansha ke boba kebaijije mu mwingilo, kadi tá mutyima ku kukwasha bakwabo na kanye, nakampata bapya, bekale bengidi ba bwino ba myanda miyampe.—Nk. 27:17.