Le Ye Pafudile Bwami Bukomo?
1. Lelo Mwine Kidishitu wa kikōkeji ubwanya kuzumbijazumbija mutyima pa bika?
1 Lelo kodi mwiipangule kino kipangujo? Padi kitatyi kyotambilanga mu busapudi kibatyepa mwanda wa bununu, misongo nansha kadi i biselwa bya kisaka byelundila’ko, ne bibakuzozeja. Kaka umo wa bana basatu walembele amba kyaba kimo wimvwananga bumvu, mwanda kitatyi ne bukomo bwapityija pa kulama kisaka bubatyepeja byaadi ubwanya kulonga mu busapudi. Lelo i bika biketukwasha tumone bintu mu muswelo mujalale?
2. Lelo Yehova witusakilanga bika?
2 Bitusakila Yehova Tulonge: Ne kutatana mpika, batwe bonso tusakanga kulonga bivule mu busapudi. Ino na bubine kudi kwishila kukatampe pa byotusaka kulonga ne pa byotubwanya kulonga. Kukimba kulonga bivule mu mwingilo kulombola’mba ketudipo na mulēle. Tuvulukei amba Yehova uyukile mikalo yetu ne ketulombangapo kulonga byobya byoketubwanyapo. (Mit. 103:13, 14) Le witusakilanga tulonge bika? Usakanga tumwingidile na muya onso, tumupe kyokya kitabukile kunengela.—Kol. 3:23.
3. Lelo tukabandaula namani bukomo bwetu mu mwingilo?
3 Lelo i bika biketukwasha tuyuke byotubwanya kulonga? Tubwanya kulomba Yehova etukwashe tumone mu muswelo muyampe ngikadilo yotudi’mo. (Mit. 26:2) Kadi tukokeja kukwashibwa na mulunda Mwine Kidishitu ukulupilwa kadi mutame, wituyukile biyampe ne witulombola kwampikwa kafinda popa potusakilwa kwilumbulula. (Nk. 27:9) Tuvulukei kadi amba, ngikadilo byoishintanga, i biyampe kwiibandaula kitatyi ne kitatyi.—Ef. 5:10.
4. Le i muswelo’ka otufwaninwe kumona bivulujo bya mu Bible bitala pa mwingilo wa busapudi?
4 Mwa Kumwena Bivulujo: Panyemanga bantu lubilo lwa kwitāka, boba bebabandila bekalanga bebasāsula divule. Kyobasaka, i kukwasha banyemi bafikidije kitungo kyabo, ke kwibazozejapo. Mo monka, nkankamo ne bivulujo bya mu Bible byotupebwa ku kupwila ne mu mabuku mwa ‘kusapwila mwanda na bupyasakane’ bidi’ko mwanda wa kamweno ketu ke mwandapo wa kutyepeka byotulonga. (2 Tem. 4:2) Tukulupilei amba kitatyi kyotwielela’ko kusapula mungya bukomo bwetu, Yehova ukavuluka na nsangaji ‘buswe ne mingilo’ yetu.—Bah. 6:10.