“Kokakwatwapo Moyo”
1. Lelo i makambakano’ka eifwene na a Yelemia otubwanya kutanwa nao?
1 Yelemia pa kupebwa mwingilo wa bu mupolofeto, wētyepelwe. Ino Yehova wāmukulupija’mba, “kokakwatwapo moyo,” kadi wāmukankamika na kanye mwa kuvuijija mwingilo wandi. (Yel. 1:6-10) Mu ano etu mafuku, bumvubumvu nansha kubulwa kikulupiji kukokeja kushinta muswelo otutambila mu mwingilo. Kutyina muswelo ubwanya kwitaba bantu nansha obetumona kubwanya kwitukankaja kyaba kimo. Le tukanekenya namani uno moyo, ne i madyese’ka otukamwena’mo umo ne umo?
2. Lelo kwilongolola kuketukwasha namani tutyepeje moyo pa bitala busapudi?
2 Badikila Kwilongolola: Kwilongolola senene kukokeja kukwasha pa kutyepeja moyo wetu. Kimfwa, shi tubadikile kupituluka mu bijika bivudile kwimika mīsambo, tuketeakanya mwa kulondolwela. (Nk. 15:28) Le tubulwe’po kwingidija bipindi bya kwiibidija bya mu Butōtyi bwa Kisaka pa kwilongolola mwanda wa makambakano palapala a ku masomo ne mu mwingilo?—1 Pet. 3:15.
3. Lelo kukulupila mudi Yehova kwitukwashanga namani tutyepeje moyo?
3 Kulupila Mudi Yehova: Kintu kimo kipwa moyo i kukulupila mudi Leza. Yehova i mwitulaye amba uketukwashanga. (Is. 41:10-13) Lelo kudi kikwabo kituletela mutyima-ntenke kutabuka kino? Kadi, Yesu wētukulupije’mba nansha shi bitatyi byampikwa kulaya bibafika, mushipiditu wa Leza uketupa bukomo bwa kutwala bukamoni mu muswelo muyampe. (Mako 13:11) Nanshi, tuzenzei Yehova kyaba ne kyaba etupe mushipiditu sandu.—Luka 11:13.
4. Lelo i madyese’ka alupuka ku kūminina ne kuleka’byo mpika nansha mu makambakano?
4 Madyese: Kitatyi kyotūminina ne kuleka’byo mpika nansha potutanwa na makambakano, tukomejibwanga mwa kulwila na makambakano mu mafuku a kumeso. Tutamijanga kininga ne bupyasakane—ngikadila ya bantu bayulwe mushipiditu. (Bil. 4:31) Kadi, kitatyi kyotunekenya moyo na bukwashi bwa Yehova, tukomejanga lwitabijo ne kikulupiji kyetu mu kuboko kwandi kupandija. (Is. 33:2) Kadi twimwenanga nsangaji ne kuloelelwa kutamba ku kuyuka’mba tubasangaja Tata wetu wa mūlu. (1 Pet. 4:13, 14) Nanshi ketwakikwatwai moyo, tusapulei musapu wa Bulopwe ne kutyina mpika, tukulupilei nyeke amba Yehova uketukwasha!