Madimi byo Apwa Kutōkeja, Ke Kwangula
1. Lelo i mwingilo’ka wa mvubu ukyendelela?
1 Pa kupwa kusapwila mwana-mukaji Mwine Samadia, Yesu wālombwele bandi bana ba bwanga’mba: “Imikai meso enu, mumone ku madimi byo apwa kala kutōkeja, ke ku kwangula.” (Yoa. 4:35, 36) Kudi mwangulo wa ku mushipiditu ukyendelela, Yesu nandi wāmwene kala mukananina uno mwingilo pa ntanda ponso. Yesu udi mūlu, ino ukitele mutyima ku mwangulo. (Mat. 28:19, 20) Lelo i bika bilombola’mba uno mwingilo ukibaila’ko pano powenda ufika ku mfulo?
2. I bika bilongeka bilombola’mba mwingilo wa kwangula pa ntanda ponso wendanga ubaila’ko?
2 Kwangula pa Ntanda Ponso: Mu mwaka wa mingilo wa 2009, kwadi kwilundila’ko kwa basapudi 3,2 pa katwa kujokoloka ntanda yonso. Mu matanda mukankajibwe mwingilo wa busapudi mwadi kwilundila’ko kwa bantu 14 pa katwa. Kibalwa kya bifundwa bya Bible bya kweji ne kweji kyapityile pa 7 619 000—kibalwa kitabuke kulampe bungi bwa basapudi, kadi i kipindi kya mudiyo kupita kibalwa kya bifundwa byatudilwe mwaka wabadikile. Byenda bitandabuka bukidi mwingilo mu matanda mavule, kusakilwa bininge bamishonele bafundijibwe ku Ngileade. Madimi a ndimi ya bweni alupulanga bipa bivule mu ntanda ne ntanda. I bimweke patōka’mba Yehova ye upēlakanya mwingilo mu kino kitatyi kya ku mfulo ya kwangula. (Is. 60:22) Le nobe udi na mumweno muyampe pa “madimi” a kwenu?
3. Lelo bamo bafulanga ku kunena bika bitala mwangulo wa kwabo?
3 Mwangulo wa Kwenu: Bamo bakanena’mba “Mwaba wami keupangapo bipa bingi.” I bine, kudi myaba imweka bu keipangapo bipa na mobipela mu mikwabo nansha na mobyadi bikadile kitatyi kya kunyuma. O mwanda Batumoni bamo bafulanga ku kunena’mba mwangulo ke mupwe mu bino bifuko ne kyashala’ko ke kukokolola’tu batyetye bashele’mo. Lelo e mobikadile?
4. I mumweno’ka muyampe utala mwingilo wetu otufwaninwe kutamija, ne mwanda waka?
4 Mwangulo i kitatyi kya mingilo mikatampe tamba ku ñanjilo kufika ne ku mfulo. Tala mutyima wa kampeja-bukidi mu bino binenwa bya Yesu: “Byakwangula umbudimi i bivule bīne, nanshi bakuputuminamo i batyetye. I binebīne, lombelai bidi amba mwine byangulwa alundule bakuputumina mu byangulwa byandi.” (Mat. 9:37, 38) Yehova, Mwine byangulwa, ye uyukile kitatyi ne kifuko kya kutamija bipa. (Yoa. 6:44; 1 Kod. 3:6-8) Le mwingilo wetu i mwingilo’ka? Bible ulondolola’mba: “Lubanga kuna nkunwa yobe, kadi kyolwa nakyo kokōloja dikasa dyobe.” (Mus. 11:4-6) Bine, pano penda mwangulo ku mfulo ke kitatyipo kya kōloloja makasa etu!
5. Mwanda waka tufwaninwe kwendelela kusapula na bupyasakane mu mwaba umweka’mba keupangapo bipa?
5 Endelela na Kwangula: Nansha shi mwaba wetu usapulwanga’mo kyaba ne kyaba ne umweka’mba bantu badi na bujundu, kudi bubinga bwa kwingidila na bupyasakane ne mutyima wa kampeja-bukidi. (2 Tem. 4:2) Tuvutakanya twa mu ino ntanda tulengejanga bantu bashinte mumweno wabo ne kulanguluka na kusumininwa pa mafuku a kumeso. Bankasampe pobenda batama, babwanya kwabila mwa kumwena mutyima-ntenke ne ndoe ya mutyima. Kūminina kwetu kubwanya kutenga ne bantu bakwabo. Bine, boba nabo kebadipo betwivwana mafuku a kunyuma bakokeja kwitwivwana. Nansha ke boba badi bapela musapu wetu nabo basakilwa kudyumunwa.—Ezek. 2:4, 5; 3:19.
6. Shi mwaba wetu i mukutakane, i bika biketukwasha tulame bupyasakane bwetu?
6 Shi mwaba wetu i mukutakane, i bika le biketukwasha tulame bupyasakane bwetu? Padi ku busapudi bwetu bwa ku njibo ne njibo tukokeja kubweja’ko ne misapwilo mikwabo, kimfwa kusapula mu myaba ya bansunga nansha busapudi bwa ku telefone. Tukokeja ne kushinta musapwilo wetu mwa kwikadila na ntwelelo mipya. Tubwanya kushinta mpangiko ketusapula ku kyolwa nansha mu bitatyi bikwabo bikalanga bantu ku mobo. Padi tukefunda ludimi lweni mwanda wa kusapwila bantu bavule myanda miyampe. Tukokeja kutandabula mwingilo wetu na kwingila bu pania walonso. Nansha kadi tukokeja kuvilukila kokwa kudi bakwangula batyetye. Shi twikale na mumweno muyampe utala mwangulo, tukalonga bukomo bwa kwingila ne pa mfulo uno mwingilo wa mvubu.
7. Le tufwaninwe kwendelela na kwangula kufika ne kitatyi’ka?
7 Babidimye bekalanga na kitatyi kīpi kya kukōngakanya byakwangula, o mwanda kebatūjangapo nansha kwingila na mulēle enka ne bipwa mwingilo. Mwangulo wa ku mushipiditu nao ulomba mutyima wa kampeja-bukidi. Le tukendelela na mwingilo wa kwangula kufika ne kitatyi’ka? Mu kitatyi kya “kumfulo kwine kwa panopantanda,” kufika ne pene pakafika “pamfulo.” (Mat. 24:14; 28:20) Pamo bwa Mwingidi mukatampe wa Yehova, tusaka kupwa mwingilo otupelwe. (Yoa. 4:34; 17:4) Nanshi twendelelei kuvuya mwingilo wetu na bupyasakane, na nsangaji, na mumweno muyampe ne ku mfulo. (Mat. 24:13) Mwangulo kewapwile!
[Bishintuludi pa paje 2]
Mwangulo i kitatyi kya mingilo mikatampe tamba ku ñanjilo kufika ne ku mfulo