Kulanguluka ne Milombelo—Bisakilwa Bengidi Bapyasakane
1. I bika byākweshe Yesu aleke kupuakanibwa ku mwingilo wandi mukatampe?
1 Yesu wāpityije kyolwa kimo ubelula bantu ne kupanga bademona. Difuku dilonda’po bana bandi ba bwanga bamutana kebamunena’mba: “Bonsololo bakusakanga’tu,” kebamukankamika endelele na mingilo yandi ya bukomo. Ino Yesu kādipo upuakanibwa aleke mwingilo wandi mukatampe wa kusapula myanda miyampe. Wālondolwele amba: “Twendei bidi nanshi ku bibundi bilondakene ne kino nako nkasapwilekopo myanda, mwanda kyo naīdile i kyonka kino’ki.” Lelo i kika kyākweshe Yesu endelele kuta mutyima ku mwingilo wandi? Wādi ubūka lubanga bwē kalombela ne kulanguluka. (Mako 1:32-39) Le milombelo ne kulanguluka bitukwanshanga namani twikale basapudi bapyasakane?
2. I bintu’ka byotukokeja kulangulukila’po biketukwasha tulame bupyasakane mu mwingilo?
2 Kulangulukila pa Bika? Yesu wāmwene amba bantu “basusukile ne kususuka, ne kusansana badingakana pamo na mikōko yampikwa mukumbi.” (Mat. 9:36) Batwe netu, tukōkeja kulanguluka pa muswelo wabila bantu myanda miyampe. Tukajingulula mwenda mutyepela kitatyi. (1 Kod. 7:29) Tukokeja kulangulukila pa mingilo ya Yehova ne ngikadila yandi, dyese dya kwikala Batumoni ba Yehova, ne bupeta bwa ku mushipiditu botwifundile mu Kinenwa kya Leza bubudilwe kuyuka bantu ba mu wetu mwaba.—Mit. 77:11-13; Is. 43:10-12; Mat. 13:52.
3. I kitatyi’ka kifwaninwe kulanguluka?
3 Kulanguluka Kitatyi’ka? Na mwādi mulongela Yesu, bamo babūkanga lubanga bwē pakitalala. Bakwabo nabo amba i biyampe bufuku kumeso kwa kulala. (Ngal. 24:63) Nansha tudi na bingi bya kulonga, tukokeja kumona kyaba kya kulanguluka. Bamo balangulukanga pobakandile mu byendwa-nabyo. Bakwabo nabo kyaba kyobakōkolokwa pa midi wa kwibakambakanya mpika. Bavule bamonanga’mba kulanguluka kumeso kwa kutambila mu busapudi, nansha’tu kitatyi kityetye, kwibakwashanga basapule na bupyasakane bukatampe kwampikwa moyo.
4. Mwanda waka tufwaninwe kulanguluka?
4 Kulanguluka ne milombelo bikomejanga mutyima wetu wa kwingidila Yehova, kukwasha tukwate bintu bya ku mushipiditu na mutyika, ne kukankamika mutyima wetu wa kwendelela kusapula. Yesu, Mwingidi Mukatampe wa Leza, wāmwenine mu kulanguluka; ne batwe bene tukamwena’mo.