Mwingilo Wetu—Ulomba Kitūkijetyima
1. I muswelo’ka ulombwele Yehova kitūkijetyima pa bantu?
1 Leza udi na kitūkijetyima pa bantu. (Div. 34:6; Mit. 106:41-45; 2 Pet. 3:9) Kimfwa kimo kikatampe kya kitūkijetyima kyandi kya buswe, kimwekelanga ku mwingilo wa kusapula Bulopwe wingilwa ntanda yonso. Yehova wāingile na bantu mu kintu kya myaka 2000, ne kadi ukyendelela kukokela bantu ba mityima myoloke kwadi. (Yoa. 6:44) Le tukokeja kwiula kitūkijetyima kya Yehova mu mwingilo wetu namani?
2. I muswelo’ka otukalombola kitūkijetyima potusapula mu wetu mwaba?
2 Mwingilo wa ku Njibo ne Njibo: Twiulanga kitūkijetyima kya Yehova na kusapula “kuleka’byo mpika” mu mwaba mudi bantu kebalombolapo kusangela. (Bil. 5:42) Tūmininanga na kitūkijetyima kupunikwa, kufutululwa ne kulwibwa kotulwibwa mu mwingilo wetu. (Mako 13:12, 13) Kadi tulombolanga kitūkijetyima na kuningisha mu bukomo botulonga bwa kusangila nkunwa ya bubinebine nansha shi i bikomo kutana bantu basangela ku mobo.
3. Mwanda waka tusakilwa kitūkijetyima potulonga kujokela’mo ne potwendeja bifundwa bya Bible?
3 Bifundwa bya Bible: Kutamija mutyi kulomba kitūkijetyima. Tukokeja kwiukwatakanya, ino ketubwanyapo kwiutonona utame bukidibukidi. (Yak. 5:7) Mo monka ne kutama ku mushipiditu nako kumwekanga bityebitye kadi mu matabula matabula. (Mako 4:28) Boba botwifunda nabo bakokeja kukomenwa kuleka nkulupilo ya mutōtelo wa bubela nansha bisela byampikwa kukwatañana na Bisonekwa. Ketufwaninwepo kutonona botwifunda nabo batame lubilolubilo na kwibaningila bashinte. Pa kushiya’ko kitatyi kifwaninwe kya mushipiditu wa Leza wingile mu mutyima wa mwifundi, bilomba kwikala na kitūkijetyima.—1 Kod. 3:6, 7.
4. Le kitūkijetyima kiketukwasha namani tusapwile babutule bampikwa kwitabija mu muswelo muyampe?
4 Babutule Bampikwa Kwitabija: Nansha byotusakilanga babutule bampikwa kwitabija befunde bubinebine, tulombolanga kitūkijetyima na kwilaija kitatyi kiyampe kya kwibasapwila lwitabijo lwetu, ne kutadija kutyina amba twakebalundika myanda mivule. (Mus. 3:1, 7) Pa kino, tulekanga kimfwa kyetu kinene pa kyetu kyaba, ne kushala belongolole mwa kusapwila lwitabijo lwetu na kikōkeji ne bulēme bukatampe. (1 Pet. 3:1, 15) Bine, mwingilo wa na kitūkijetyima ukekala muyampe bininge kadi ukasangaja Tata wetu wa mūlu.