Busapudi bwa mu Bipito Buyampe
1. I muswelo’ka umo otukokeja kwiula Yesu?
1 Yesu mu mwingilo wandi wa pano pa ntanda, kekākilepo kwisamba na bantu baādi utana mu dishinda ne mu bifuko bikwabo byādi’mo bantu bavule. (Luka 9:57-61; Yoa. 4:7) Wādi usaka kusapwila bantu bavule bene musapu wandi wa kamweno. Dyalelo nadyo, busapudi bwa mu bipito i muswelo muyampe wa kukwasha bantu bekale na tunangu twa Leza. (Nk. 1:20) Tukabwanya shi tulonge bukomo bwa kufwena bantu ne kwingidija kusansanya.
2. Le tukalwila’ko kulonga bika potudi mu busapudi bwa mu bipito?
2 Alwila’ko: Pavule i biyampe kufwena bantu pa kyaba kya kwimana nansha kushikata pa kifuko kimo utengele bapityeshinda bakufwene. Mungamunga, tala muntu, kadi muteje talala nyā bya bulunda. Shi usapula na basapudi bakwabo, divule i biyampe kufwena bantu, wa pandi wa pandi. Kadi bilomba kwalwila’ko kulonga bukomo bwa kulonda muntu usangela. Shi bibwanika, ku mfulo kwa mwisambo, mwipangule bya bulēme muswelo omubwanya kwitana monka. Basapudi bamo basapulanga difuku ne difuku mu bipito ku kifuko kimo kyonka, ne kino kibakwashanga besambe’nka na bantu bamo kyaba ne kyaba ne kutamija kusangela kwabo.
3. I muswelo’ka otukekala na kusansanya potusapula mu bipito?
3 Ikala na Kusansanya: Ikala na bujinguludi potonga pa kwimana mu kipito ne potonga muntu wa kusapwila. Kebidipo na mvubu kusapwila bapityeshinda bonso. Ikala na bujinguludi. Kimfwa shi muntu wenda bukidibukidi, i biyampe padi kumuleka apite. Shi usapula kampalampala na kifuko kya busunga, ikala na ñeni mwanda wa kutyina kukambakanya kapita wa kaji. Divule dine i biyampe kusapwila bantu pobatamba ku bya busunga pa kyaba kya pobatwela. Fwena bantu mu muswelo keukebazakajapo nansha kwibatulumuna. Kadi, ikala na kusansanya popāna mabuku. Shi muntu walombola kusangela kutyetye, ukamupa trakte pa kyaba kya kumupa mapepala.
4. I kika kinenenwa’mba kusapula mu bipito kudi na kamweno ne o muswelo wa busapudi usangaja?
4 Kusapula mu bipito kwitukwashanga tukune nkunwa mivule ya bubinebine mu kakitatyi katyetye. (Mus. 11:6) Padi bantu bamo botwitana nabo bakokeja kwikala boba boketutanangapo ku mobo kitatyi kyotusapulanga ku njibo ne njibo. Ubulwe’po kukwata’ko mpangiko ya kusapula mu bipito, muswelo wa busapudi usangaja kadi muyampe?