Yehova Witufundijanga Mwa Kwingidila uno Mwingilo

1. Yehova papanga bantu mwingilo, uloñanga ne bika?

¹ Yehova papanga bantu mingilo, wibapanga ne bukwashi bobasakilwa mwa kuvuijija’o. Kimfwa, Yehova paānene Noa kubaka safini, kintu kyaādi kaubakile kashā, wāmulombwele mwa kwiyubakila. (Ngal. 6:14-16) Mosesa mukumbi wa kikōkeji paātuminwe kwenda kudi bakulumpe ba mu Isalela ne kudi Felo, Yehova wāmukulupije amba: “Amiwa nkekala ne kyakanwa kyobe ne kukakulaija kyokya kyokanena.” (Div. 4:12) Ne batwe netu mo monka, Yehova ketulekangapo twingile mwingilo wetu wa kusapula myanda miyampe na bukomo bwa batwe bene. Witufundijanga mwa kwingidila uno mwingilo kupityila ku Masomo a Mwingilo wa Kiteokratike ne Kupwila kwa Mingilo. I muswelo’ka otukamwena mu buno bufundiji?

2. I muswelo’ka otukamwena mu Masomo a Mwingilo wa Kiteokratike?

² Masomo a Mwingilo wa Kiteokratike: Bandaula myanda idi ku mpangiko kumeso kwa kutanwa ku kupwila ko-konso. Kitatyi kyomona muswelo wingidija befundi ino myanda mu binenwa byabo, ukayuka nyeke mwa kufundijija. (Nk. 27:17) Enda ku kupwila na dibuku dyobe dya Masomo a Mwingilo ne kwidingidija bu dibuku dya kwifunda. Kitatyi kinyemena’ko mutadi wa masomo kupwa kwa kipindi ne kipindi, shika myanda mikatampe yosaka kwingidija, ne kwingidija byaba bishele kufula bu mwa kulemba. Inoko, muswelo muyampe wa kumwena mu ano masomo, i wa kunena’ko. Lelo kodi mwilembeje’ko? Shi abakupe kipindi, witeakanye biyampe ne kulonda madingi akupebwa. Ingidija byobya byowifunda kitatyi kyodi mu mwingilo.

3. I bika biketukwasha tumwene mu Masomo a Mwingilo?

³ Kupwila kwa Mingilo: Shi tutange kumeso kwa kitatyi myanda ya ku Kupwila kwa Mingilo ne kuteakanya malondololo, nabya tukavuluka biyampe madingi akaletwa’ko. Kadi shi tulondolola bīpi, nankyo bavule bakamona muswelo wa kulondolola. Ta mutyima bininge ku bya kumwena’ko ne kwingidija madingi o-onso omona’mba akalumbulula bininge mwingilo obe. Bīka biyampe Mwingilo Wetu wa Bulopwe udi na bishinte bikatampe bya kunyemena’ko mwenda mafuku.

4. Mwanda waka tufwaninwe kwingidija biyampe bufundiji bwa kiteokratike?

⁴ Mwingilo wetu wa kusapula myanda miyampe pano pa ntanda ponso i mukomo’nka na mingilo yāpelwe ba Noa ne Mosesa. (Mat. 24:14) Tukokeja kubwanya’o shi tukulupile mudi Yehova, Mufundiji wetu Mukatakata, ne kwingidija biyampe bufundiji bwaetupa.—Is. 30:20.