Ngikadilo ya Mufundiji Muyampe ya Mvubu Mpata
1. I ngikadilo’ka ya mvubu mpata idi na mufundiji muyampe?
1 I bika bikakwasha muntu ekale mufundiji muyampe wa Bible? Masomo malamala’ni? Bwino’ni? Ñeni ya kibutwila? Na bubine kudi ngikadilo imo yonka ifikidijanga Mukanda wa Bijila, mine iyukilwanga’po bana ba bwanga ba Yesu kadi ngikadilo mikatampe mine ya Yehova isangaja. (Yoa. 13:35; Ngat. 5:14; 1 Yoa. 4:8) I buswe. Bafundiji bayampe badi na buswe.
2. Mwanda waka i biyampe tusanswe bantu?
2 Sanswa Bantu: Yesu, Mufundiji Mukatampe wālombwele bantu buswe, ne kino kyebatonwene bamuteje. (Luka 5:12, 13; Yoa.13:1; 15:13) Shi tutele bantu mutyima, tukasapula bukamoni ponso potumona mukenga. Bikukaja pamo bwa kupangwapangwa ne bujundu bwa bantu kebiketukankajapo. Tukata bantu botusapwila mutyima bya binebine, kadi tukakwatañanya musapwilo wetu na bisakibwa byabo. Ketukebikilakopo enka kitatyi kya kwitana na mwifundi ne mwifundi wa Bible, ino i ne kuteakanya kifundwa ne kifundwa kumeso kwa kitatyi.
3. Lelo kusanswa bubinebine bwa mu Bible kuketukwasha namani mu busapudi?
3 Sanswa Bubinebine bwa mu Bible: Kadi Yesu wādi usenswe bubinebine bwa mu Bible ne kwibumona bu byabulēme. (Mat. 13:52) Shi tusenswe bubinebine, tukanena na buzanzamuke, ne kino kibwanya kuvudija nsangaji ya bemvwaniki betu. Buno buswe buketukwasha twimanine pa mwanda wa mvubu otusapula pa kyaba kya kwimanina pa mikalo yetu, kadi tukaleka kwikala na bulobo mu busapudi.
4. I muswelo’ka otukokeja kutamija buswe?
4 Tamija Buswe: I muswelo’ka otubwanya kutamija buswe botuswele bantu? I na kulangulukila pa buswe bwalombwele Yehova ne wandi Mwana ku bantu ba mu wetu mwaba badi mu ngikadilo ya bulanda ya ku mushipiditu. (Mako 6:34; 1 Yoa. 4:10, 11) Buswe botuswele bubinebine bwa mu Bible bukavula kupityila ku kwifunda kitatyi ne kitatyi kifundwa kya pa kasuku ne kulanguluka. Buswe bubadilwa mu kipa kya mushipiditu. (Ngat. 5:22) Nanshi tukabija Yehova etupe mushipiditu sandu ne kumulomba etukwashe tutamije buswe. (Luka 11:13; 1 Yoa. 5:14) Nansha twikale bafunde masomo malamala, na bwino mu bubinebine, nansha na ñeni ya kibutwila, tukekala bafundiji bayampe ba Bible na kulombola buswe.