Lama Mutyima Obe wa Mundamunda

1. Kubungakana kwetu kwa pa bula kwa difuku dimo kwa mwaka wa mingilo wa 2013 kudi na mutwe wa mwanda’ka, ne ino mpangiko idi na kitungo’ka?

¹ Difuku ne difuku tutanwanga mu ngikadilo ilengeja tulubile mutyima wetu wa mundamunda. O mwanda mwine mpangiko ya kubungakana kwa difuku dimo kwa mu mwaka wa mingilo wa 2013 kukashilula difuku 1 Kweji 9, 2012 idi na mutwe wa mwanda unena’mba “Lama Mutyima Obe wa Mundamunda.” (1 Tem. 1:19) Ino mpangiko i miteankanibwe mwanda wa umo ne umo umbukata mwetu, ate mutyima mpata ku muswelo waingidija kino kyabuntu kilēme kitamba kudi umpangi.

2. I bipangujo’ka bikatampe bikalondololwa pakapityijibwa ino mpangiko?

² Ukalama Ino Myanda: Mpangiko ikalondolola ku bipangujo bisamba-bibidi bikatampe bitala mutyima wa mundamunda:

• Le i bika bibwanya kutūla mutyima wetu wa mundamunda mu kyaka?

• I muswelo’ka otubwanya kufundija mutyima wetu wa mundamunda?

• Le i muswelo’ka otubwanya kubinga ku mashi a bantu bonso?

• Lelo milangwe ne bilongwa byetu bikwatañene na misoñanya ya mu Bible bilombola bika potudi?

• I muswelo’ka otukepuka kutapa bakwetu mu myanda itala mutyima wa mundamunda?

• A bankasampe, i muswelo’ka omukakankamana kitatyi kyobemuningila mutune lwitabijo?

• Le i madyese’ka emwenanga boba balonda mutyima wabo wa mundamunda uludikwa na mushipiditu?

3. I muswelo’ka otukamwena mu mpangiko?

³ Na bukwashi bwa Yehova tukokeja kukomena Dyabola ne bukomo bwalonga mwanda wa kōna mutyima wetu wa mundamunda. Kupityila ku Kinenwa kya Leza ne ku bulongolodi bwandi, Tata wetu wa buswe witulombolanga’mba: “Dine dino’di dyo dishinda, nangaimo.” (Is. 30:21) Ino mpangiko i muswelo umo bidi, mu miswelo itulombola Yehova buno bwendeji. Nanshi witeakanye’mba ukatanwe ku bipindi byonso bya ino mpangiko. Teja na katentekeji kadi langulukila pa muswelo okengidija myanda yokemvwana. Mwisambileipo mu kisaka. Shi twingidije byotukafundijibwa, tukakomejibwa’mba twendelele na “kwikala ne mutyima wa mundamunda muyampe” ne kuleka kusasuka mu dishinda pamwanda wa nsangaji ya lupito ya ino ntanda ya Satana.—1 Pet. 3:16.