Sangela Biyampe Mwingilo Obe
1. I bika bibwanya kwitujimijija nsangaji ne bupyasakane bwetu?
1 Muntu wāpangilwe amba ekale “kusangaja mutyima wandi biyampe mu mwingilo wandi.” (Mus. 2:24) Inoko, shi mu mwingilo wetu kemulupukilepo bipa biyampe, kutyumukwa mutyima kwetu kubwanya kwitujimijija nsangaji ne bupyasakane. I bika biketukwasha tulame mumweno muyampe?
2. Mwanda waka tufwaninwe kumona bintu monka mobikadile pa mwitabilo wa bantu ku mwingilo wetu?
2 Mona Bintu Mobikadile: Vuluka’mba nansha ke boba bāitabije Yesu bādi batyetye, ino aye wāingile biyampe mwingilo wandi. (Yoa. 17:4) Mu kyelekejo kya mukushi wa nkunwa, Yesu wālaile amba mityima mivule keiketabapo ku musapu wa Bulopwe udi bwa nkunwa. (Mat. 13:3-8, 18-22) Nansha nankyo, kininga kyetu kitukwasha tulonge bivule.
3. I muswelo’ka otubwanya ‘kupa bipa’ nansha shi bavule kebetabapo ku musapu?
3 Mwa Kupēla Bipa Bivule: Kyelekejo kya Yesu kilombola’mba boba betabija musapu badi ba ‘kupa bipa.’ (Mat. 13:23) Shi musele wa ñano ubamena, ubatama ne kutama, upanga’ko bipa, bino bipa ke miselepo mikwabo mityemitye ya ñano, ino i nkunwa mipya. Ne Mwine Kidishitu nandi monka na monka, shi wape bipa, ke enkapo’tu bana ba bwanga bapya, ino i kwisangula kwa ino nkunwa ya Bulopwe—byotwisamba pa myanda ya Bulopwe. Bino bipa i ‘biyampe’ bituletela nsangaji, kwampikwa kubanga mwitabilo wa bantu ku musapu. Tuluñanga kuboko ku kuyukanya buujila bwa dijina dya Yehova. (Is. 43:10-12; Mat. 6:9) Tusangelanga dyese dya kwikala bu ba kwingila pamo na Leza. (1 Kod. 3:9) Kadi “bipa bya milomo” bidi namino bisangajanga Yehova.—Bah. 13:15, 16.
4. Le i bipa’ka bikokeja kulupuka mu mwingilo wetu, batwe kuyuka mpika?
4 Kadi mwingilo wetu ukokeja kulupula bipa byoketumwenepo batwe bene. Bikokejika padi mu boba bāimvwene Yesu usapula, bamo bāikele ke bana bandi ba bwanga aye papo ke mupwe kala mwingilo wandi wa pano panshi. Mo monka, ne nkunwa ya Bulopwe yotukuna ikokeja kukāla miji ne kutama mu mutyima wa muntu ke mungya kala, kadi watwela ne mu bubinebine batwe kuyuka mpika. Na bubine, mwingilo wetu ubalupula biyampe bivule. Po pa mwanda, twendelelei kupa “bipa bivule bīne,” ne kwiyukanya amba twi bana ba bwanga ba Yesu.—Yoa. 15:8.