Iula Kimfwa kya Bapolofeto—Yona
1. Lelo i ngikadilo’ka milumbuluke yādi na Yona?
1 Le i bika byovulukanga kitatyi kyolangulukila padi mupolofeto Yona? Bamo bakokeja kulanga amba i wa moyomoyo nansha amba i wa mutyima mūmu. Inoko, i muntu walombwele kwityepeja, bukankamane, ne mushipiditu wa kwipāna. I muswelo’ka otukokeja kulonda “kitompekejo” kya ngikadilo milumbuluke ya Yona?—Yak. 5:10.
2. I muswelo’ka otukeula kwityepeja kwa Yona?
2 Kwityepeja: Ku ngalwilo, Yona wanyemēne kungi pa kyaba kya kwenda mu mwaba waātuminwe’mo. Ke mwandapo wa kutulumuka mwanda bene Ashidia bādi bantu ba bukalabale bwa malwa, kadi Nineva wādi kaitwe bu “kibundi kya mashi.” (Nah. 3:1-3) Nansha nankyo, Yehova wālemunwine Yona, nandi walombola kwityepeja na kwitabija kwenda mu mwaba wandi kitatyi kyaātuminwe monka. (Nk. 24:32; Yona 3:1-3) Nansha byaānyemene dibajinji, aye’ko wālongele kiswa-mutyima kya Yehova. (Mat. 21:28-31) Lelo netu tusumininwe kusapula myanda miyampe, mu kitatyi kyotudi badingilwe nansha ke mu mwaba mudi bikoleja?
3. I mu myanda’ka imo ya mu mwingilo ilomba bukankamane ne kwipāna?
3 Bukankamane ne Kwipāna: Yona pa kumona amba butyibi bwandi bubi bubatūla mu kyaka benē bwato, wāitabija kupāna būmi bwandi. (Yona 1:3, 4, 12) Mwenda mafuku, pa kufikidija mwingilo wandi mu Nineva, wājokolokele bininge mu kibundi, padi wādi ukimba kifuko kilumbuluke kya kwelela’po lubila lwa butyibi bwa Yehova. Bine, bino bilongwa byonso, ke bilombolapo moyo, ino bilombola’mba i mupolofeto mukankamane wa Leza! (Yona 3:3, 4) Lelo bidi namani batwe netu dyalelo? Netu tusakilwa bukankamane bupāna Leza pa kusapula pampikwa moyo potudi mu kupangwapangwa. (Bil. 4:29, 31) Pa kukwatakanya uno mwingilo na kitatyi ne lupeto lwetu, bilomba kwipāna.—Bil. 20:24.
4. Mwanda waka tufwaninwe kulangulukila pa kimfwa kilumbuluke kitūshidile bapolofeto ba Yehova?
4 Ponso potanga mānga ya mupolofeto ye-yense wa Yehova, ukamwena’mo shi witūla pa kyaba kyandi mu mine ngikadila’ya. Wiipangule amba: ‘Shi wadi ami, le nadi wa kulonga namani? Le i muswelo’ka onkokeja kwiula ngikadilo yandi milumbuluke mu būmi?’ (Bah. 6:11, 12) Bishinte bilonda’ko mu Mwingilo Wetu wa Bulopwe bikesambila nakampata pa bufundiji bwa kamweno botukokeja kwifunda kupityila ku bapolofeto ba kikōkeji ba Yehova.