Iula Kimfwa kya Bapolofeto—Yoela
1. Le i muswelo’ka otubwanya kwiula kwityepeja kwa Yoela kitatyi kyotusapula?
1 Le mupolofeto Yoela wādi ani? Aye mwine ulombola’tu amba wādi “mwana Petwele.” (Yoe. 1:1) Uno mupolofeto mwityepeje wākomeneje musapu wa Yehova, ke mwingilo wandipo wa bu musedi wa myanda. Mu muswelo umo onka, pa kyaba kya kukimba ntumbo ne kutendelwa, tutanga mutyima kudi Yehova ne ku Bible mu mwingilo wetu. (1 Kod. 9:16; 2 Kod. 3:5) Kadi, tukankamikwanga na musapu otusapula. Le i myanda’ka ya mu bupolofeto bwa Yoela ibwanya kwitupa bupyasakane ne lukulupilo dyalelo?
2. Le kufwena kwa difuku dya Yehova kwitukankamika tulonge bika?
2 “Difuku dya Yehova Didi Pabwipi.” (Yoe. 1:15): Nansha bino binenwa byobyāsonekelwe pano ke padi tununu twa myaka, tudi mu kitatyi kya kufikidila kwabyo kwa mfulo. Koneka kwa ngikadilo ya ntanda, kupela ne kwitufutulula kobetufutulula mu wetu mwaba i bubinga bumwekelele bulombola’mba mafuku a mfulo a ino ngikadilo imbi ya bintu abafwena. (2 Tem. 3:1-5; 2 Pet. 3:3, 4) Kitatyi kyotumona kufwena kwa mfulo, tudi na bubinga bwinebwine bwa kutūdila mwingilo wa busapudi pa kifuko kibajinji mu būmi bwetu.—2 Pet. 3:11, 12.
3. Mwanda waka mwingilo wa busapudi udi na mvubu mpata pano potwenda tufwena ku malwa makatakata?
3 “Yehova Ukekalanga Mpakala ya Bantu Bandi.” (Yoe. 3:16): Kutetema kutelelwe mu uno vese kubwanya kwingidijibwa enka pa butyibi bwa Yehova bwa pa malwa makatakata. Tusengibwanga pa kuyuka’mba, Yehova ukanyongolola bengidi bandi ba kikōkeji mu kino kitatyi. (Kus. 7:9, 14) Kitatyi kyotwenda mu mwingilo wa busapudi ne kwimwena muswelo witukwatakanya Yehova ne kwitukankamika, tukomejanga lwitabijo ne kūminina, bine biketukwasha pakafika malwa makatakata.
4. Mwanda waka tubwanya kusangala ne kutengela mafuku a kumeso na kikulupiji?
4 Nansha musapu wa Yoela byowādi unenwa na bantu bamo amba i musapu wa bulanda, ino upanga bantu ba Leza lukulupilo lwa kutendelwa lwa bunyongolodi. (Yoe. 2:32) Shi ke pano, tutengelei mafuku a kumeso na kikulupiji ne kusapula myanda miyampe ya Bulopwe bwa Leza na bupyasakane kitatyi kyotwivwana binenwa bya Yoela 2:23 bya amba: “Sangalai . . . , sepelelai mudi Yehova Leza wenu.”