Iulai Kimfwa kya Bapolofeto—Amose
1. I kika kinenenwa amba kimfwa kya Amose kitukankamika?
1 Lelo kashā kweivwene bu muntu kafwaninwepo kusapula mwanda wa kubulwa kufunda bininge nansha kwikala mulanda? Shi i amo, kimfwa kya Amose kikokeja kukukankamika. Amose wādi kimunye kya mikōko, kidimye, ino Yehova wāmupēle bukomo bwa kusapula musapu wa bulēme. (Am. 1:1; 7:14, 15) Mo monka ne dyalelo, Yehova wingidijanga boba betyepeje ne ba būmi bwa panshi. (1 Kod. 1:27-29) Lelo i bintu’ka bikwabo byotukokeja kwifundila kudi mupolofeto Amose mu mwingilo wetu?
2. Mwanda waka tubwanya netu kwimanija pototo mu kupangwapangwa mu mwingilo wetu?
2 Imanija Pototo mu Kulondwalondwa: Amazia, mupidishitu kadi mutōtyi wa bankishi wa mu bulopwe bwa kutunduka bwa mu bisaka dikumi bya Isalela, pa kwivwana bupolofeto bwa Amose, udi pamo bwa aye wātentulwile amba: ‘Enda kobe! Taluka papo, tudi kala na bwetu butōtyi!’ (Am. 7:12, 13) Amazia pa kukalomba Mulopwe Yeloboame emike mwingilo wa Amose, wānyengakenye binenwa bya mupolofeto. (Am. 7:7-11) Ino Amose kātuyukilepo. Dyalelo nadyo, bendeji bamo ba bipwilo batononanga bantu ba politike mwanda wa bapangepange bantu ba Yehova. Inoko, Yehova witukulupija amba kekudipo kipungwa nansha kimo kipungilwa potudi kikafika.—Is. 54:17.
3. Le i myanda’ka ibidi yotusapula dyalelo?
3 Sapula Butyibi bwa Leza ne Madyese āya Kumeso: Nansha shi Amose wānenene bupolofeto bwa butyibi pa bulopwe bwa mu bisaka dikumi bya Isalela, ino wāfudije uno mukanda wa mu Bible na dijina dyandi pamo ne mulao wa Yehova wa kujokejibwa ne madyese mavule. (Am. 9:13-15) Netu twisambilanga pa kwīya kwa “difuku dya kidye” dya Leza, ino uno musapu i kipindi kya ‘myanda miyampe ya bulopwe’ yotufwaninwe kusapula. (2 Pet. 3:7; Mat. 24:14) Konakanibwa kwa babi na Yehova pa Amakedona kukashitula dishinda dya kufika kwa Paladisa pano pa ntanda.—Mit. 37:34.
4. Mwanda waka tudi na kikulupiji kya amba tubwanya kuvuija kiswa-mutyima kya Yehova?
4 Kusapula musapu wa Bulopwe mu ino ntanda mudi bantu bavule betulwa, na bubine kutūlanga pa ditompo kusumininwa kwetu kwa kwiendeja mungya kwipāna kwetu ne kulonga kotulonga kiswa-mutyima kya Yehova. (Yoa. 15:19) Nansha nabya, tukulupile amba Yehova ukendelela kwitupa byobya byotusakilwa mwanda wa kuvuija kiswa-mutyima kyandi, monka mwaālongele na Amose.—2 Kod. 3:5.