Iula Kimfwa kya Bapolofeto—Hosea
1. Le i kipangujo’ka kyokodi padi mwiipangule?
1 Pa kulangulukila pa buyampe bwa Yehova ne pa lusa lwandi lukatakata, padi wadi kodi mwiipangule amba, ‘le i bika byonkokeja kulongela Yehova? (Mit. 103:2-4; 116:12) Hosea wālongele na mutyima umo byāmulombele Yehova kulonga, nansha byobyādi bimulomba kwipāna. Le i muswelo’ka otubwanya kwiula Hosea?
2. Le i muswelo’ka otubwanya kwiula kimfwa kiyampe kya Hosea kya kūminina mu mwingilo wa busapudi?
2 Sapula mu Bitatyi Bibi: Musapu wa Hosea wāelelwe dibajinji ku bulopwe bwa bisaka dikumi bya Isalela, mwine mwājimine butōtyi bwa bine mafuku matyetye kunyuma. Mulopwe Yeloboame II wālongele bibi kumeso a Yehova ne kwendeleja butōtyi bwa kyana kya ñombe bwāshimikilwe na Yeloboame I. (2 Bal. 14:23, 24) Balopwe bakwabo bālondele’ko mu bulopwe bwa bisaka dikumi nabo bāendeleje butōtyi bwa bubela kufika’nka ne byāonakanibwe buno bulopwe mu 740 K.K.K. Inoko, nansha byokwādi butōtyi bwa bubela uno muswelo, Hosea aye wāendelele kwingila na kikōkeji bu mupolofeto mu bula bwa myaka 59. Lelo netu twi basumininwe kusapula mwaka ne mwaka, nansha shi bantu bapela musapu ne kwitupangapanga?—2 Tem. 4:2.
3. Le būmi bwa Hosea bwelekejanga namani lusa lwa Yehova?
3 Langulukila pa Lusa lwa Yehova: Yehova wālombwele Hosea asonge “mukaji wa bwitwa.” (Hos. 1:2) Nansha wandi mukaji Ngomela byaāmubutwidile mwana-mwana mulume, ino bimweka amba mwenda mafuku Ngomela wābutwile ne bana bakwabo babidi mu busekese. Mutyima wa Hosea wa kulekela wandi mukaji ulombola patōka lusa lukatakata lwa Yehova lwaafwidile bene Isalela kitatyi kyobesāshile. (Hos. 3:1; Loma 9:22-26) Lelo twikalanga na mutyima wa kwisuminwa bintu bimo byotusenswe mwanda wa kuyukanya lusa lwa Yehova ku bantu ba miswelo yonso?—1 Kod. 9:19-23.
4. Le i bintu’ka bimobimo byotukokeja kulongela Yehova?
4 Bengidi ba Yehova bamo i bapele mingilo imo ya lupeto luvule mwanda wa kupityija kitatyi kivule mu mwingilo. Bakwabo i bashale kusonga ne kusongwa mpika, nansha ke kubutula bana kwine mwanda wa kwendeleja tumweno twa Bulopwe. Kitatyi kyotulangulukila pa būmi bwa Hosea, tukokeja padi kulanga’mba, ‘Ami’wa nkibwanyapo nansha dimo kulonga na mwaālongele.’ Inoko, kitatyi kyotutamija kusangela buntu bwa Yehova ne kukulupila mu bukomo bwa mushipiditu sandu wandi, pamo bwa Hosea, netu tukokeja kwingidijibwa nandi mu muswelo oketwadipo tulanga.—Mat. 19:26; Fid. 2:13.