Kwendeja Bifundwa bya Bible Bilupula Bipa
1. Le i kiselwa’ka kidi na basapudi bendeja bifundwa bya Bible?
1 I kutupu ubwanya kutōta Yehova Leza poso shi aye Mwine “amukoke.” (Yoa. 6:44) Nansha nankyo, basapudi bendeja Bible bafwaninwe kulonga bukomo bwabo bonso mwanda wa kukwasha bantu bafwene Tata wabo wa mūlu. (Yak. 4:8) Kino kilomba kwiteakanya. Kutanga misango ne kwipangula bipangujo bitampilwe ke kubwenepo pa kukwasha befundi bemvwanije musapu ne kwendelela kumeso.
2. Le bifundwa bya Bible bilupula bipa bilomba bika?
2 Pa kwendeja bifundwa bilupula bipa, basapudi bafwaninwe kukwasha befundi (1) bemvwanije byobya bifundija Bible, (2) betabije byobya bifundija Bible, kadi (3) balonde mu būmi byobya bifundija Bible. (Yoa. 3:16; 17:3; Yak. 2:26) Kupityija muntu mu ano matabula kulomba padi myeji. Ino, ditabula ne ditabula dilombola kwendelela kwa muntu mu kipwano kyandi na Yehova ne kya kwipāna kwadi.
3. Mwanda waka bafundiji ba bwino bepangulanga bipangujo biloba tudi mu kanwa?
3 I Bika Bilanga Otwifunda Nandi Bible?: Pa kuyuka shi muntu otwifunda nandi Bible wimvwanije ne kwitabija byaefunda, epuka kunena bunka kadi mukankamike anene byalanga. (Yak. 1:19) Le wimvwanije byobya binena Bible pa mwanda omubandaula? Le ubwanya kushintulula mwanda mu bishima bya aye mwine? Le wiimvwana namani pa byobya byaefunda? Le ukulupile amba byobya bifundija Bible i byendele’mo? (1 Tes. 2:13) Le wimvwanije amba byobya byefunda bifwaninwe kulengeja būmi bwandi bushinte? (Kol. 3:10) Pa kusaka etulondolole, tusakilwa kumwipangula bino bipangujo na bwino na kumuloba tudi mukanwa, ebiya ne kuteja.—Mat. 16:13-16.
4. Le tukalonga bika shi mwifundi udi na makambakano a kwimvwana ne kwingidija mu būmi byobya byafundijibwa mu Bible?
4 Bibidiji ne milangwe bikalanga divule bilamate mpata mu ñeni, bilomba kitatyi pa kubula’byo. (2 Ko. 10:5) Bikekala namani shi mwifundi ketabijepo nansha kulonda mu būmi byafundijibwa? Bilomba kitūkijetyima pa kwilaija Kinenwa kya Leza ne mushipiditu ujila bingile mu mutyima wa mwifundi. (1 Ko. 3:6, 7; Bah. 4:12) Pa kyaba kya kumuningila, divule i biyampe kwenda ku mutwe wa mwanda mukwabo shi mwifundi udi na makambakano a kwimvwana ne kulonda bufundiji bwa mu Bible. Potwendelela na kumufundija Bible na mutyima mutūke kadi na buswe, ubwanya kushinta mwenda mafuku.