Masomo a Mwingilo wa Kiteokratike a mu 2015 Etukwasha Tulumbulule Bufundiji Bwetu

¹ Davida kaimba wa mitōto wālembele amba: “Myanda ya kyakanwa kyami, ne mifwatakanyo ya mutyima wami, ītabijibwe kudi abe mu kifuko kyobe, Abe Yehova, kidibwe kyami, ne mukūdi wami.” (Ñim. 19:14) Netu tusaka binenwa byetu bitabijibwe kudi Yehova mwanda tukwete na mutyika dyese dyetu dya kunena bubine mu kipwilo ne mu busapudi. Masomo a Mwingilo wa Kiteokratike i muswelo umo witufundijanga’mo Yehova kusapula. Buno bufundiji buloñwanga yenga ne yenga mu bipwilo kupita pa 111 000 ntanda yonso. I makwashe batutu ne bakaka ntanda yonso ba bibidiji byonso babwanye kwikala bafundiji ba myanda miyampe, babwanye kufundija mu muswelo unekenya, wa bunwa, ne na bukankamane.—Bil. 19:8; Kol. 4:6.

² Mu mpangiko ya masomo a mu 2015 mukekala na mitwe ya myanda ya mu “Ntwelelo ya Kinenwa kya Leza” ne myanda ya mu Étude perspicace des Écritures, Volime 1 ne 2. Kadi, bitatyi byashintyilwe ku kipindi kya Myanda Mikatampe ya mu Bible ne ku Kipindi No. 1. Kuno kushinta pamo ne bulombodi bukwabo bwa mwa kupityijija bipindi ku masomo i bilombolwe mu misango ilonda’ko’i.

³ Myanda Mikatampe: Batutu bapelwe kino kipindi bakekala na minite ibidi ya kwisambila pa mwanda umo usangaja ne wa kamweno wa mu Bisonekwa ulupwilwe mu butangi bwa Bible bwa ku yenga. Kwiteakanya biyampe ko kukalengeja muntu akwashe kipwilo na mwanda wa kamweno kadi mu kitatyi kimupelwe. Monka mobikadilanga, kipwilo kikekala na minite isamba, masekonde 30 ne kwika ku muntu ya kwisambila pa myanda isangaja idi mu butangi bwa Bible bwa ku yenga. Kuleta malondololo a kamweno mu masekonde 30 kulomba kwiteakanya ne kwidingila, inoko kulonga namino i kufunda kotufunda. Kadi kukapa bakwabo kyaba kya kulondolola’ko pa twanda tobasokwele mu bukimbi bwabo.

⁴ Kipindi No. 1: Kitatyi kya kipindi kya butangi bwa Bible kibatyepejibwa ke kya minite isatu ne kwika kadi kikekala na myanda mityetye. Boba bapebwa butangi bafwaninwe kupituluka’mo divule na diwi ditunduke ne kuta bininge mutyima ku mutelelo moloke ne kubulwa kushishikita mwa kulupwila milangwe mu muswelo wimvwanikwa. Bantu bonso ba Yehova bafwaninwe kwielela’ko kutanga biyampe, mwanda kutanga kudi na mvubu mu butōtyi bwetu. Tudi na nsangaji pa kumona betu bana batanga biyampe! Tufwija’ko bambutwile balonga bukomo bwa kukwasha na buswe babo bana bekale batangi bayampe.

⁵ Kipindi No. 2: Kino i kipindi kya minite itano kikapebwa kaka. Ukengidija mutwe wa mwanda. Shi kipindi kimanine pa myanda ya mu kabuku Ntwelelo ya Kinenwa kya Leza nansha Kiteba kya Mulami, ukakwatañanya myanda’ya na kintu kimo kya mu mwingilo wa budimi kimwekanga, kikwatañene senene na mwaba wa kipwilo kyenu. Shi kipindi i kya mu dibuku Étude perspicace des Écritures, mwifundi ufwaninwe kuvungulula mutwe wa mwanda umupelwe ne kutonga bisonekwa byafwaninwe kwingidija, ne kulombola ñeni yotubwanya kuboila ku kimfwa kya bantu batelelwe mu Bible. Bisonekwa bikwabo bikwatañene na mutwe wa mwanda bikokeja kwingidijibwa. Mutadi wa masomo ukamutongela mwisambi-nandi.

⁶ Kipindi No. 3: Kino kikekala kya minite itano kikapebwa tutu nansha kaka. Shi i kaka upelwe kino kipindi, nankyo kikapityijibwa nyeke mungya bulombodi bwa Kipindi kya No. 2. Shi i tutu upelwe kino kipindi, ne shi myanda ilupwilwe mu dibuku Étude perspicace ikanenwa bu mwisambo kumeso a bemvwaniki. Mwifundi ukavungulula mutwe wa mwanda umupelwe, ukatonga bisonekwa byafwaninwe kwingidija ne kulombola ñeni yotubwanya kuboila ku kimfwa kya bantu batelelwe mu Bible.

⁷ Mwanda Mupya mu Kipidi No. 3 kya Batutu: Shi kipindi kipelwe tutu i kya myanda ya mu kabuku Ntwelelo ya Kinenwa kya Leza nansha Kiteba kya Mulami, nabya ukekipityija bwa kya kumwena’ko kya kifundwa kya kisaka nansha kya mwingilo wa busapudi. Divule, mutadi wa masomo ye ukamutongela mwisambi-nandi ne kyaba kine. Mwisambi-nandi ufwaninwe kwikala wa mu kisaka kya mwanā masomo nansha tutu mukwabo mu kipwilo. Bisonekwa bikwabo bilombola misoñanya ikwatañene na mutwe wa mwanda bikokeja kwingidijibwa mu kipindi. Kitatyi kivule, mukulumpe ubwanya kupebwa kino kipindi. Mukulumpe ubwanya kwitongela mwisambi-nandi ne kyaba. Bine, kipwilo kikankamikwa pa kumona bakulumpe balombola bwino bwa kufundija mu bya kumwena’ko na muntu wa mu kisaka nansha na tutu mukwabo.

⁸ Madingi: Pa kupwa kwa mwifundi yense, mutadi wa masomo ukekala na minite ibidi ya kufwija’ko ne kuleta madingi mayampe a mu dibuku Mwena Byabuyabuya mu Bufundiji bwa Masomo a Mwingilo wa Kiteokratike. Mutadi wa masomo, kakatelapo katonye ka madingi kengidila’po mwifundi pamwita. Shi mwanā masomo wapu, mutadi wa masomo ufwaninwe kumufwija’ko bya binebine, ne kutela kifundwa kyaingidila’po, ne kulombola mwanda waka waingila’kyo biyampe, nansha kulombola mwanda waka kyadi kya kamweno ku mwifundi kuta mutyima nabya ku kifundwa’kya.

⁹ Fomu wa madingi wa mwifundi udi mu dibuku dyandi dya Masomo a Mwingilo pa paje 79 kufika ku 81. Shi mwifundi wapu kipindi kyandi, mutadi wa masomo ukalemba mobifwaninwe mu kitabo kya mwanā masomo ne kumwipangula kufula shi i mulonge kwiibidija kutala kifundwa kimudingidilwa’po. Myanda mikwabo ya kufwija’ko ne madingi a ntentekelo ōbaka abwanya kupānwa pafula pa kupwa kupwila nansha kyaba kikwabo. Mutyima wa pa bula utebwa mwifundi ense ufwaninwe kumonwa bu mukenga wa kumukwasha endelele ku mushipiditu.—1 Tm. 4:15.

¹⁰ Shi mwifundi wapityija mpata kitatyi, mutadi wa masomo nansha mukwashi bafwaninwe kuta’ko mutyima kumudyumuna, kimfwa na kañengele nansha na kakintu kavuma, mwanda wa kulombola na bunwa mwifundi amba kitatyi kibapu. Shi mwifundi wajingulula kano kayukeno, ufwaninwe kufudija musemwa wanena ne kutūka ku lukala.—Tala dibuku Masomo a Mwingilo, p. 282, mus. 4.

¹¹ Boba bonso babwenye bisakibwa i bakankamikwe kwilembeja ku Masomo a Mwingilo wa Kiteokratike. (Tala dibuku Masomo a Mwingilo, pa p. 282, mus. 6.) Bufundiji butamba ku ano masomo i bukwashe bantu ba Yehova basapule ne kufundija myanda miyampe ya Bulopwe na kikulupiji, bulēmantu, ne buswe. Bine, Yehova usangalanga patendelwa na boba bonso bamwenine mu buno bufundiji bwa kiteokratike!—Ñim. 148:12, 13; Isa. 50:4.