Kupwila kwa Kwenda mu Busapudi Kufikija Kitungo

1. Lelo kupwila kwa kwenda mu busapudi kudi na kitungo’ka?

¹ Difuku dimo, Yesu webungile pamo ne bandi bana ba bwanga 70 kumeso kwa kwenda mu kampanye ka busapudi. (Luka 10:1-11) Webakankamikile na kwibavuluja amba kebadipo bunka bwabo, ne amba bakaludikwa na Yehova, “Mwinē mwangulo.” Kadi webapele bulombodi bwa kwibakwasha mu mwingilo, ne kwibatuma “babidi babidi.” Dyalelo nadyo, kupwila kotupwilanga kumeso kwa kutambila mu busapudi kudi na kitungo kimo kyonka​—kwitukankamika, kwitukwasha, ne kwiabanya.

2. Lelo kupwila kwa kwenda mu busapudi kukekala na bula’ka?

² Dyalelo, kupwila kwa kwenda mu busapudi kuloñwanga mu minite 10 kutūla ku 15, kubadila’mo ne kwabanya basapudi, myaba, ne milombelo. Pano bibashinta. Kushilwila mu Kweji 4, kupwila kwa kwenda mu busapudi kukalongwa mu minite itano kutūla ku isamba-ibidi. Inoko, shi kukalongeka kupwa kwa kupwila kukwabo kwa kipwilo, nabya kukekala kwīpi kutabuka, mwanda boba bakatanwa’ko badi kala mu mīsambo mikwabo miyampe imanine pa Bisonekwa. Kwīpipija kupwila kwa kwenda mu busapudi kukakwasha bonso bapityije kitatyi kilampe mu mwingilo. Ne kadi, shi bapania nansha basapudi badi ke bapwe kushilula kusapula kumeso kwa kupwila kwa kwenda mu busapudi, nabya i mu kakitatyi katyetye bitupu kobakatyiba busapudi bwabo.

3. Le i muswelo’ka ufwaninwe kuteakanya kupwila kwa kwenda mu busapudi mwa kukwashisha basapudi kutabuka?

³ Kupwila kwa kwenda mu busapudi kukateakanibwa mu muswelo muyampe ubwanya kukwasha basapudi. Mu bipwilo bivule, bikalanga biyampe shi bisumpi bya busapudi bipwila pala pala pa kyaba kya kwibungila byonso pamo. Namino, basapudi bakapēlelwa kufika ku kupwila kwa kwenda mu busapudi nansha ke mu mwaba mwine. Kadi basapudi bakabanibwa bukidibukidi, ne kino kikapelela batadi ba bisumpi mwa kutela mutyima boba bobatala. Kitango kya bakulumpe kikokeja kutala ngikadilo ya kwabo ne kuyuka bya kulonga. Kumeso kwa kufudija kuno kupwila na milombelo, bonsololo bafwaninwe kala kuyuka kobakasapwila ne muntu obakenda nandi mu mwingilo.

4. Mwanda waka kebifwaninwepo kumona kupwila kwa kwenda mu busapudi bu kwa bulēme butyetye?

⁴ Kekudipo na Bulēme Butyetye Kupita Kupwila Kukwabo kwa pa Kipwilo: Kupwila kwa kwenda mu busapudi kulongelwanga boba batambila mu busapudi, o mwanda padi ke kipwilo kyonsopo kibwanya kutanwa’ko. Inoko, kino kekishintululapo amba kufwaninwe kupēlulwa nansha kumonwa na bulēme butyetye kupita kupwila kukwabo kwa pa kipwilo. Kupwila kwa kwenda mu busapudi nako i mpangiko ya Yehova itukwasha kwikankamikila ku buswe ne ku mingilo milumbuluke pamo’nka bwa kupwila kukwabo. (Bah. 10:​24, 25) Pa kino, mwendeji ufwaninwe kwiteakanya senene, pa kusaka amba mīsambo ipeje Yehova bulēme ne kukwasha boba batanwa’ko. Shi bilongwa uno muswelo, basapudi basaka kutambila mu busapudi bafwaninwe kulonga bukomo bwa kutanwa’ko.

5. (a) Le mutadi wa mingilo udi na kiselwa’ka mu kuteakanya kupwila kwa kwenda mu busapudi? (b) Le kaka ufwaninwe kwendeja kupwila kwa kwenda mu busapudi namani?

⁵ Kwiteakanya kwa Mwendeji: Pa kusaka amba muntu ateakanye senene kipindi kampanda kya ku kupwila, bifwaninwe kumupa’kyo kumeso kwa kitatyi. Bidi muswelo umo onka ne ku kupwila kwa kwenda mu busapudi. Batadi ba bisumpi nansha bampingakani babo bo badi na kiselwa kya kwendeja kupwila kitatyi kipwila bisumpi bya busapudi pala pala. Inoko, shi kipwilo kyonso kikebungila pamo pa kutambila mu busapudi, nabya mutadi wa mingilo ukatonga wa kwendeja. Batadi ba mingilo bamo batandikanga mpangiko ya bendeji bonso ne kwiilamika ku tabulo wa misapu. Mutadi wa mingilo ufwaninwe kwikala na bujalale pa kupanga bendeji, na kuyuka amba mufundijijo ne manwa a mwa kwabenya bantu a boba bendeja’ko byo bine bilumbululanga kuno kupwila. Shi i kutupu mukulumpe, mwingidi wa mingilo nansha tutu mukwabo mubatyijibwe mubwanye bisakibwa wa kwendeja mafuku amo, mutadi wa mingilo ukatonga kaka mubatyijibwe wa bwino endeje.​—Tala kishinte, “Shi i Kaka wa Kwendeja Kupwila.”

6. Mwanda waka kidi na kamweno mwendeji eteakanye senene?

⁶ Shi abetupe kipindi kya kupityija ku Masomo a Mwingilo wa Kiteokratike nansha ku Kupwila kwa Mingilo, twikikwatanga na mutyika ne kwikiteakanya senene. Ke bavulepo belaijanga’nka kitatyi kya kwenda ku kupwila longa kebalangulukila pa byobakanena. Boba bapebwa kwendeja kupwila kwa kwenda mu busapudi nabo bafwaninwe kwikumona muswelo umo onka. Kupwila kwa kwenda mu busapudi byokukekala kwīpi, bikalomba kwiteakanya biyampe pa kusaka’mba bantu bamwene’mo, kadi kupwe pa kitatyi. Kwiteakanya kuyampe kulomba ne kuteakanya mwaba kumeso kwa kitatyi.

7. Le i myanda’ka imo ikokeja kwisambila’po mwendeji?

⁷ Myanda ya Kwisambila’ko: Ngikadila byoidi mishile mungya mwaba ne mwaba, umpika mukōkele kaletelepo mwadijo wa kulondela ku kupwila ne kupwila kwa kwenda mu busapudi. Miswelo ya mwa kwendejeja i milombolwe mu kapango, “Bya Kubandaula mu Kupwila kwa Kwenda mu Busapudi.” Pavule pene, kuno kupwila i kwa kupityija pamo bwa mīsambo. Kitatyi kimo, mukokeja kwikala ne kya kumwena’ko kilongololwe senene nansha video mifwaninwe ya pa jw.org. Pateakanya kupwila kwa kwenda mu busapudi, mwendeji ufwaninwe kulangulukila pa bintu bikankamika ne bikumbanya boba basa kutambila mu busapudi difuku’dya.

8. Le i myanda’ka miyampe kwisambila’po mu kupwila kwa kwenda mu busapudi mu Dya Mposo ne Dya Yenga?

⁸ Kimfwa mu Dya Mposo, basapudi bavule bapānanga Kiteba kya Mulami ne Réveillez-vous ! Bavule basapulanga Dya Mposo kebavudilepo kusapula mu bukata bwa yenga, kadi babwanya kwilwa ne musapwilo obafundile mu Butyotyi bwa Kisaka bwa kyolwa. O mwanda, bikokeja kwikala biyampe mwendeji avuluje musapwilo umo mu misapwilo ya kulondela’po idi pa paje wa mfulo wa Mwingilo Wetu wa Bulopwe. Muswelo mukwabo i kwisambila pa mwa kutwejeja myanda ya panopano ya mu kyenu kibundi, binkumenkume nansha masobo mu musapwilo udi mu dipepala nansha mwa kushila kyalwilo kya kwisambila’po difuku dikwabo pokamujokela shi waitabijanga mapepala. Shi ku kupwila kwa kwenda mu busapudi kudi bamo ke bashilule kwingidija mapepala a kupānwa, mwendeji ubwanya kwibanena balombole’ko misapwilo imo mīpi nansha myanda mimweke ikankamika. Mu Dya Yenga, mwendeji ukokeja kutonga kwingidija bya kupāna bya kweji. Mabuku a kwifunda, pamo bwa boloshile Myanda Miyampe, Teja Leza, ne dibuku Bifundija Bible, abwanya kupānwa difuku dyo-dyonso, o mwanda mwendeji ufwaninwe kulangulukila mu kīpi pa mwa kupānina ano mabuku.

9. Le i myanda’ka ikesambilwa’po ku mfulo kwa yenga mu kampanye ka pa bula?

⁹ Shi kipwilo kidi mu kampanye ka pa bula ku mfulo kwa yenga, nabya mwendeji ukalangulukakila pa mwa kupānina mapepala pamo na kakanda ka lwito nansha na trakte, ne mwa kulongela shi muntu wasangela musapu. Mulangwe mukwabo i kwisambila pa myanda mimweke ilombola mvubu idi mu kulonga ano makampanye.

10, 11. Mwanda waka kwiteakanya kwa basapudi kudi na mvubu pa kulumbulula kupwila kwa kwenda mu busapudi?

¹⁰ Kwiteakanya kwa Basapudi: Pa kulumbulula senene kupwila kwa kwenda mu busapudi, basapudi nabo bafwaninwe kulunga’ko kuboko. Kuteakanya busapudi kumeso kwa kitatyi, kimfwa mu butōtyi bwa kisaka, kukebakwasha bayuke bya kukankamika nabyo basapudi bakwabo. Mu kwiteakanya senene mudi ne kusela mapepala ne mabuku, kupwila kwa kwenda mu busapudi kekwashilwile, nabya bonso bakabwanya kwenda bukidi mu mwaba pambulwa kwijaija.

¹¹ Kadi kidi na mvubu kufika ku kupwila kwa kwenda mu busapudi minite mityetye kumeso kwa kushilula. Shako twikankilanga’ko kufika ku kupwila kwa pa kipwilo kumeso kwa kitatyi. Inoko, kutyelewa ku kupwila kwa kutambila mu busapudi kubwanya kukambakanya bininge. Namani? Pa kwabanya bantu mu kisumpi, tutu wendeja kuno kupwila ubandaulanga bidi myanda mivule. Shi ku kupwila kudi basapudi batyetye, ubwanya kutyiba mbila ya kwibatuma mu mwaba mwasapwilwe kipindi kimo. Shi kudi baile lwa panshi ku kupwila kwa kwenda mu busalpudi ino kobakasapula i kulampe, padi ukabanya bano basapudi pamo na boba baile na myotoka. Shi i mu mwaba wa babipolapola, padi ukatonga batutu bakusapula pamo na bakaka nansha bakusapwila pabwipi nabo. Basapudi balemane padi ukebatuma bakasapule mu bipito byambulwa mikuna mikuna, nansha mudi mobo ambulwa nkala mivule ya kukanda. Basapudi bapya padi bakabanibwa pamo na boba ke beje. Ino shi kudi basapudi batyelewa bilomba kadi kupangulula bantu mwanda wa boba batyelewe nabo bamone ba kwenda nabo. Shako kubwanya kwikala mwanda kampanda wetufikija mu kitatyi ke kipite. Ino shi ke kibidiji, nabya twibandaulei batwe bene, padi i kupeleka kotupelekele kupwila kwa kwenda mu busapudi, nansha kadi padi twibakomenwe kuteakanya bintu senene kumeso kwa kitatyi.

12. Shi udi na kibidiji kya kwiivwanika kumeso na wa kusapula nandi, i bika byofwaninwe kulangulukila’po?

¹² Basapudi baile ku kuno kupwila, padi i beivwanike kala na muntu wa kukasapula nandi kupwila kekwashilwile, nansha padi mwendeji ye ukebatongela’ye. Shi udi na kibidiji kya kwiivwanika kala na muntu, le kebibwanikapo ‘kuputula mityima’ na kusapwila pamo na basapudi beshileshile pa kyaba kya kusapula enka na balunda bamo bonka? (2 Ko. 6:11-13) Le kebibwanikapo na dimo kusapula na musapudi mupya mwa kumukwashisha alumbulule bwino bwandi bwa kusapula? (1 Ko. 10:24; 1 Tm. 4:13, 15) Teja senene bulombodi buletwa, kubadila’mo ne bwa kifuko pa kushilwila kusapula. Shi kupwila kubapu, kemwakashintai mpangiko, endai ne kwija mpika mu mwaba.

13. Shi bonso bata’ko mutyima ne kulunga’ko kuboko, le kupwila kwa kwenda mu busapudi kuketukwasha namani?

¹³ Pa kupwa busapudi, boba 70 batuminwe na Yesu kukasapula “bajokele na nsangaji.” (Luka 10:17) Ne kutātana kwine mpika, kupwila kwaendeje Yesu kwēbakweshe bekale na bwino. Ne dyalelo dine kupwila kwa kwenda mu busapudi kudi na kamweno. Shi batwe bonso tuta’ko mutyima ne kulunga’ko kuboko, kupwila kwa kwenda mu busapudi kukekala kukankamika, kukwasha kadi kwituteakanya mwa kuvuijija mwingilo wetu wa kupāna “bukamoni ku mizo yonso.”—Mat. 24:14.