Le Kinenwa kya Leza Kyāshintyilwe?

Bantu bamo beipangulanga shi Kinenwa kya Leza kyāshintyilwe. Mupolofeto Isaya wānenene amba kinenwa kya Leza “kilādilanga nyeke.” (Isaya 40:8) Le tubwanya kukulupila namani amba bubine bwa milao ya Leza bwālaminwe?

Leza udi na bukomo bwa kulama Kinenwa kyandi ne kwikikinga kutyina bakekyona. Pa kala, pobādi balemba bilembwa, batentudi bādi babala biyampe disomo ne disomo dya bilembwa bijila mwanda wa kuyuka shi kudi kintu kyabwejibwa’mo, kyashintwa, nansha kutalulwa’mo. Inoko bantu byobadi bampikwa kubwaninina, batentudi bamo balongele tubilubo tutyetutye.

LE TUKAKULUPILA NAMANI AMBA MU BISONEKWA BIJILA BIDI’KO DYALELO MUDI MUSAPU MUBAJINJIBAJINJI WA LEZA?

Kudi bilembwa tununu ne tununu bya pa kala bya Bisonekwa Bijila. Shi mu bilembwa bimo mubatanwa kwishila kutyetye, badi badingakanya’byo na bilembwa bikwabo mwa kuyukila bubine.​—Shi usaka kuyukila’ko bivule, tala kishinte kinena’mba, “Le Bible Washintyilwe nansha Kutweja’mo Bilubo?” kidi pa jw.org.

Kimfwa, langulukila pa mikanda ya pa kala itwa bu Mivungo ya mu Dijiba Difwe, yasokwelwe na bedouins mu mitá idi kubwipi na Dijiba Difwe mu 1947. Bino bilembwa bya pa kala mudi myanda ya mu Bisonekwa Bijila ke milāle myaka tununu tubidi ne kupita. Bashayuka badingakenye bino bilembwa bya pa kala na Bisonekwa Bijila byotudi nabyo dyalelo. Le basokwele bika?

Bano befundi basokwele amba myanda idi mu Kinenwa kya Leza kyotudi nakyo dyalelo, yo yonka ya mu bilembwa bibajinjibajinji.a Kubandaulwa kwabandawilwe biyampe bino bilembwa bya pa kala, kulombola’mba byobya byotutanga mu Bisonekwa Bijila i musapu mubajinjibajinji wa Leza. Tubwanya kukulupila’mba Leza wālamine biyampe bubine bwa Bilembwa byandi Bijila pa mwanda wetu dyalelo.

Nanshi tubwanya kutanga Kinenwa kya Leza na kikulupiji kyonso amba i kya bine. Byotwayuka kino, twisambilei pa bintu byotubwanya kwifunda padi Leza kupityila ku bapolofeto bandi.