BŪMI BWA BENE KIDISHITU
Londa Misoñanya ya mu Mwikadilo ya Yehova
Yehova Leza i mutūdile bantu misoñanya ya mu mwikadilo. Kimfwa, i mulombole’mba busongi i kijimba kya nyeke ku ba mulume ne mukaji. (Mat 19:4-6, 9) I mupeleje miswelo yonso ya busekese. (1Ko 6:9, 10) Kadi i mulete misoñanya itala muvwadilo ne mwidyangwilo mine ishiyañanya bantu bandi na bakwabo.—Kup 22:5; 1Tm 2:9, 10.
Mu ntanda ya dyalelo, bantu bavule bapelanga misoñanya ya Yehova. (Lo 1:18-32) Betabijanga’ko milangwe ya bantu i baludike mu muvwadilo, mu mwidyangwilo ne mu mwiendelejo wabo. Bavule baloñanga patōkelela bilongwa bibi ne kufutulula boba beendeja mungya misoñanya mishile na yabo.—1Pe 4:3, 4.
Byotudi Batumoni ba Yehova, tufwaninwe kukwatakanya misoñanya ya Leza ya mu mwikadilo na bukankamane. (Lo 12:9) Namani? Tufwaninwe kuyukanya na bunwa bintu byaitabije. Ino kadi tufwaninwe ne kulama misoñanya ya peulu mu būmi bwetu. Kimfwa, potutonga bya kuvwala ne bya kwidyangula nabyo, i biyampe twiipangule’mba: ‘Le butongi bwami bumwekejanga misoñanya ya Yehova’ni nansha ya ntanda? Le bivwalwa ne mwidyangwilo wami bindyukanyanga bu mwine Kidishitu utyina Leza?’ Nansha ke po tutonga mpangiko ya televijo, filime ya kutala, tukokeja kwiipangula’mba: ‘Le Yehova ubwanya kwitabija ino mpangiko? Le ayo mine ikankamikanga misoñanya’ka ya mu mwikadilo? Le butongi bwami bwa kwipwija mukose bubwanya kuzozeja bukomo bwami bwa mu ñeni? (Ñi 101:3) Le bubwanya kukukaja ba mu kisaka nansha bakwetu?’—1Ko 10:31-33.
Mwanda waka i kya kamweno mpata tulonde misoñanya ya mu mwikadilo ya Yehova? Panopano ponka Kidishitu Yesu usa konakanya mizo ne kutalula bibi byonso. (Ezk 9:4-7) Enka boba balonga kiswa-mutyima kya Leza bobakekala’ko. (1Yo 2:15-17) Nanshi shi ke pano, tukwatakanyei bya binebine misoñanya ya Yehova ya mu mwikadilo, mwanda wa boba bamona mwiendelejo wetu muyampe batumbije Leza.—1Pe 2:11, 12.
Le butongi bwami bwa bivwalwa ne mwidyangwilo bulombolanga bika pa misoñanya yami ya mu mwikadilo?
TALAI VIDEO IKALA MULUNDA NA YEHOVA—MULUME UMO, MUKAJI UMO, KUPWA BANDAULAI BINO BIPANGUJO:
Mwanda waka i kya tunangu kwiendeja mungya misoñanya ya Yehova?
Mwanda waka bambutwile bafwaninwe kushilula kufundija babo bana tamba ku bwanuke misoñanya ya mu mwikadilo ya Yehova?
I muswelo’ka ubwanya batame ne bankasampe kukwasha bantu bamwene mu lukulupilo lwitupele Leza lwa mafuku a kumeso?