Kwingidila Pamo pa Kusapula mu Mwaba Mwisambwa Ndimi Mivule

Bantu bavudile kwitaba bukidibukidi ku musapu wa Bulopwe shi bewivwana mu ludimi lwabo lwa kibutwila. Padi o mwanda mu Pentekosa 33 Yesu ke mwiye, Yehova wākwete’ko mpangiko ya “Bayuda bepāne batambile ku mizo yonso ya munshi mwa diulu” bevwane myanda miyampe mu ‘ludimi lwabo lwa kibutwila,’ nansha byobādi bamweka bu besambanga ludimi lwisambwa na bantu bavule, pamo bwa Kihebelu nansha Kingidiki. (Bil 2:5, 8) Dyalelo, kudi mu bifuko mwisambwa ndimi mivule, ne bipwilo bipwila’mo mu ndimi mishileshile bibwanya kwikala na mwaba umo. Le basapudi ba mu bino bipwilo babwanya kwingidila pamo namani, mwanda wa kusapwila muntu ne muntu pampikwa kujokelajokela pantu pamo, kintu kibwanya kulobeja benē mobo?

• 

  Kwisambila pamo (Nki 15:22): Batadi ba mingilo ba mu bino bipwilo bafwaninwe kwisambila pamo ne kukwata’ko mpangiko mipotoloke ya mwa kusambakenya myanda miyampe. Shi bipwilo bidi na mwaba mubwanine, nabya byobya bisapula mu ndimi mikwabo bibwanya padi kulombola kyenu kipwilo kishiye bantu besamba lwabo ludimi. Inoko shi kebabwanyapo kwisamba na bonso besamba lwabo ludimi, babwanya kwimulombola muleke kushiya muntu nansha umo, inoko mwibayukije muntu yense wisamba lwabo ludimi usangela musapu. (od p. 93 mus. 37) Nansha kadi babwanya kulomba kipwilo kyenu kibakwashe’ko na kukimba bantu besamba ludimi lwa kyabo kipwilo ne kwibatumina maadelese abo. (km 7/12 p. 5, kapango) Vulukai nyeke amba kyaba kimo bikokejika mu njibo imo mwisambwa ndimi mivule. Mpangiko yonso ikwatwa pa mwa kusambakenya musapu mu mwaba, ifwaninwe kulēmeka bijila bya Leta mungya kifuko kyenu.

• 

  Kwingidila Pamo (Ef 4:16): Londai na katentekeji bulombodi bo-bonso bomupebwa na mutadi wenu wa mingilo. Lelo wifundanga Bible na muntu usenswe ludimi lwishile na lwa kyenu kipwilo? Padi mwifundi ubwanya kwendelela bukidi shi ubamunena befunde na muntu udi mu kipwilo nansha kisumpi kya lwandi ludimi kidi kubwipi.

• 

  Kwiteakanya (Nki 15:28; 16:1) Shi muntu o mwatana mu wenu mwaba wisambanga ludimi lungi, longa bukomo bwa kumusapwila myanda miyampe. Ubwanya kwiteakanya na kwifunda ndimi yomona’mba isambwanga mu wenu mwaba, ne kutentula kumeso kwa kitatyi malamuni a Bible ne mavideo a mu ndimi’ya mu yobe telefone nansha mu yobe tabulete. Kadi ubwanya ne kwingidija mpangiko ya JW Language pa kwifunda mwa kwimwina bantu mu ndimi imoimo.