Lelo Ukivulukile?

Lelo utañanga manimelo a Kiteba kya Mulami a panopano? Eyo, tala bidi shi ubwanya kulondolola bino bipangujo:

Le tufwaninwe kumona bene Kidishitu bashingwe māni namani?

Tusangelanga lwitabijo lwabo; inoko ketwibatengapo mutyima bipitepite. Tulekanga ‘kutendela bantu.’ (Yude 16, kunshi kwa dyani) Ketwibepangulangapo myanda itala lukulupilo lwabo.—w20.01, p. 28-29.

Le i bika bifwaninwe kukukulupija’mba Yehova ukuyukile?

Bible ulombola’mba, Yehova wākuyukile abe papo kwabutwilwe. Kadi wivwananga milombelo yobe. Uyukile byolanga ne bintu bidi mu mutyima obe, kadi bilongwa byobe bimuteñanga. (1 Bi. 28:9; Nki. 27:11) Wakukokēle kwadi.​—w20.02, p. 12.

Leta bimfwa bilombola kitatyi kya kwisamba ne kya kuleka kwisamba.

Twisambanga myanda ya Yehova na nsangaji. Twisambanga shi tubamone muntu kakimbe kwenda mu dishinda dibi. Bakulumpe besambanga kitatyi kyobadingila muntu usakilwa madingi. Ketwisambengapo na kukimba kuyuka (nansha kusokola) kanda ne kanda ka mwingidilwa mwingilo wetu mu matanda mobeukankeje. Ketusokolangapo myanda mifyame.​—w20.03, p. 20-21.

Le Njie ya mu Yoela shapita 2 i mishile namani na ya mu Kusokwelwa shapita 9?

Mu Yoela 2:20-29, Leza wapangile njie ne kulaya kufuta byonso byoyonene. Kupwa, Leza wapungulula mushipiditu wandi. Bino bintu byāfikidile kitatyi kyobatambile Isalela bulwi kudi bene Babiloni, ne mwenda mafuku. Kusokwelwa 9:1-11 wisambila pa bashingwe māni ba mu ano etu mafuku badi pamo bwa njie pobasapula butyibi bwa Leza pa ngikadilo mibi, ne kwangadika ngitu boba beikwatakenye.—w20.04, p. 3-6.

Le mulopwe wa kungala dyalelo i ani?

I Rusi ne bamukūkile. Basusulanga bantu ba Leza patōkelela, bakankaja mwingilo wa busapudi ne kulombola’mba i bashikwe Batumoni. Mulopwe wa kungala ulwanga na mulopwe wa kunshi.​—w20.05, p. 13.

Le i enka ngikadila kitema itelelwe mu Bene Ngalatea 5:22, 23 ibadilwa mu “kipa kya mushipiditu”?

Aa. Mushipiditu ujila witukwashanga twikale na ngikadila mikwabo miyampe, pamo bwa boloke. (Ef. 5:8, 9)​—w20.06, p. 17.

Le i kyaka’ka kidi mu kutūla myanda itutala pa marezo a mīsambo pa Entelenete?

Byobya byotūla’po bibwanya kulengeja bantu balange amba wianyanga, ne amba kudipo mwityepeje.​—w20.07, p. 6-7.

Le bengidi bene Kidishitu babwanya kuboila ñeni’ka ku babiluwe ba bwino?

Bapoyanga pa kitatyi ne ku kifuko kobabwanya kutana mwita. Bafundijibwanga kwingidija bingidilwa byabo. Bengilanga na bukankamane mu bitatyi bishintashinta. Netu tubwanya kwibeula mu mwingilo wetu.—w20.09, p. 5.

Le i miswelo’ka imoimo yotubwanya kukwasha bantu befunda Bible basanswe Yehova bininge?

Tubwanya kwibakankamika batange Bible difuku ne difuku ne kulangulukila pa byobatanga. Kadi tubwanya kwibafundija kulombela.—w20.11, p. 4.

Le bonso batelelwe mu binenwa bya amba: “Mudi Kidishitu namo mo monka, bonso bakapebwa būmi” i bāni?​—1 Ko. 15:22.

Mutumibwa Polo kānenenepo amba bantu bonso bakasangulwa. Wādi wisambila pa bene Kidishitu bashingwe māni, boba “bapandwilwe mu bumo na Kidishitu Yesu.” (1 Ko. 1:2; 15:18)​—w20.12, p. 5-6.

Le i bika bikalonga bashingwe māni pa kupwa ‘kwalamunwa, na mu kukopa kwa diso, pakavuma kimpungidi kya mfulo’?—1 Ko. 15:51-53.

Abo pamo na Kidishitu, bakakumbanga bantu na mukombo wa kyuma. (Kus. 2:26, 27)​—w20.12, p. 12-13.