1921—Pano Ke Myaka Katwa

“LELO i mwingilo’ka otubwanya kutengela uno mwaka?” Kiteba kya Mulami kya 1 Kweji 1, 1921 kyaipangwile Befundi ba Bible kino kipangujo. Kupwa kyalondolola na kupituluka mu kisonekwa kya Isaya 61:1, 2, kine kyebavulwije mwingilo wabo wa kusapula. Kinena’mba, “Yehova wanshingile māni amba nsapwile betyepeje myanda miyampe . . . , kusapula mwaka wa mutyima muyampe wa Yehova ne difuku dya kinongo kya Leza wetu.”

BASAPUDI BAMPIKWA MOYO

Pa kwingila mwingilo wabo, Befundi ba Bible badi bafwaninwe kwikala bantu bampikwa moyo. Badi bafwaninwe kusapwila bantu betyepeje “myanda miyampe,” ne kusapwila bantu babi “difuku dya kinongo.”

Tutu John Hoskin wadi ushikete mu Kanada, wasapwile pampikwa moyo nansha byobadi bamulwa. Ku muketeko wa mwaka wa 1 921, wetene na musapudi wa kipwilo kya Metodishite. Tutu Hoskin washilula mīsambo na kumulombola’mba: “I biyampe twisambile pa Bisonekwa mu muswelo usangaja. Kadi nansha shi ketwiivwenepo mu bintu bimo, twisambe’tu mu ndoe kadi bya bulunda.” Inoko bino kebyabwanikilepo. Tutu Hoskin unena’mba: “Twesambile’tu mu minite mityetye, kala uno musapudi washita mulango na bulobo, nalanga’mba makalashi a ku mulango abaladika.”

Uno musapudi wafuna’mba, “le kyokukakimbilepo bantu bampikwa kwitabija wisambe nabo i kika?” Tutu Hoskin wauba’tu talala, ino aye pa kutaluka kaeneneja’mba ‘pano’ko nasapwila kilobo!’

Uno musapudi pa kusapula mu kyandi kipwilo difuku dyalondele’po, wanenena tutu Hoskin bibi. Tutu Hoskin uvuluka’mba, “wadyumwine bantu baleke kwisamba nami, ne kwibasapwila’mba ne mbepai mukatampe kaikele’ko kashā mu kibundi, ne amba mfwaninwe kwipaibwa.” Nansha nabya, tutu kalekele’byopo kusapula ne kwisamba na bantu. Wanenene amba: “Nadi nsangedile kusapula’mo bininge. Enka ne bantu bamo baunenene amba ‘tuyukile amba wi muntu wa Leza!’ ne kungipangula shi kudi kintu kyonsakilwa bankwashe.”

KIFUNDWA KYA PA KASUKU NE KYA KISAKA

Pa kukwasha bantu basangela bendelele, Befundi ba Bible batūdile’ko mpangiko ya bankasampe ya kwifunda Bible mu dipepala L’Âge d’Or.a Mwadi bipangujo bya mu Bible bya kulangulukila’po bambutwile na babo bana. Bambutwile badi “bepangula babo bana bino bipangujo ne kwibakwasha basokole malondololo mu Bible.” Kudi bipangujo byadi bifundija bubine bwa kyalwilo, kimfwa kipangujo kya amba, “le mu Bible mudi mikanda inga?” Bikwabo nabyo byadi biteakanya bankasampe mwa kwikadila basapudi bampikwa moyo, kimfwa kipangujo kya amba “le mwine Kidishitu yense wa bine ufwaninwe kutengela kupangwapangwa?”

Kwadi ne mpangiko mikwabo ya Befundi ba Bible batame ku mushipiditu, ya kwipangula bipangujo bya kuloba tudi mukanwa ne kutana malondololo mu volime mibajinji ya dibuku Bwifundi bwa Bisonekwa. Batangi bavule bamwenine mu ano mampangiko, ino balombola mu dipepala dya L’Âge d’Or dya mafuku 21 Kweji 12, 1921 amba, ano mampangiko onso abidi abaimana. Mwanda waka?

DIBUKU DIPYA!

Dibuku *La Harpe de Dieu*

Kalata padi mpangiko ya butangi

Tulata twa bipangujo

Boba badi batangidile bamwene amba befundi ba Bible bapya badi bafwaninwe kwifunda bubine bwa kyalwilo mu muswelo muteakanibwe senene. Pa kino balupula dibuku La Harpe de Dieu mu Kweji 11, 1921. Bantu basangela badi betabija dino dibuku nabo badi befunda dibuku La Harpe de Dieu. Kwifunda dino dibuku abo bene, kwakweshe batangi bayuke “mpango ya Leza ya kupa bantu būmi bwa nyeke.” Le badi befunda’dyo namani?

Shi muntu waitabija dibuku, badi bamupa kalata katyetye kalombola myanda ya kutanga. Yenga wiya’ko, bamupa kalata kakwabo padi bipangujo bya kutana malondololo mu myanda yaatangile. Ku mfulo kwa kano kalata kwadi mpangiko ya myanda ya kutanga yenga mukwabo wiya’ko.

Yenga ne yenga mu mayenga 12, kipwilo kya mu kibundi kyadi kitumina mwifundi wa Bible kalata kapya. Divule dine tuno tulata twadi tutumwa na bantu ba mu kipwilo banunu ne balemane. Anna Katherine Gardner wa ku Millvale, Pennsylvania, mu États-Unis, wavulukile amba: “Palupukile dibuku La Harpe de Dieu, dyapele Thayle, kaka wami mulemane maulu, mingilo mivule ya kwingila, utuma tulata twa bipangujo yenga ne yenga.” Shi yewa wifunda wapu kwifunda, muntu umo mu kipwilo wadi wenda kukamupempula mwanda wa kukamufundija myanda mikwabo ya mu Bible.

KWENDELELA KWA MWINGILO

Ku mfulo kwa mwaka’wa, Tutu Joseph Rutherford watuma mukanda ku bipwilo byonso. Walembele’mo amba, “busapudi bwa Bulopwe bubasapwilwa bantu bavule uno mwaka kupita myaka kunyuma.” Kupwa wabweja’ko amba: “Inoko kukidi mingilo mivule ya kwingila. Tukankamikei bantu bakwabo nabo bāye twingile nabo.” I kimweke patōka’mba, Befundi ba Bible balondele ano madingi. Mu mwaka wa 1922, basapula bininge myanda ya Bulopwe pampikwa moyo.

Balunda Bampikwa Moyo

Befundi ba Bible belombwele buswe bwa bu bana na bana na kwikwasha abo bene na bene. Badi balunda bampikwa moyo babutulwe “mwanda wa bitatyi bya tusua” monka mulombwela’kyo mwanda mumweke ulonda’ko.—Nki. 17:17.

Mu Dya Bubidi, mafuku 31 Kweji 5, 1921, koka kaityilwe bu kavutakanya ka myanda ya nkoba kalupukile mu Tulsa, mu Oklahoma mu Etats-Unis, pobakutyile mwana-mulume umo ufīta ne kumulambika’mba wakupile mwana-mukaji muzungu. Kibumbo kya bazungu 1 000 ne kupita pa kulwa na kakisumpi katyetye ka bantu bafīta, bukidi bonka bulwi bwasambukila bantu bakwabo bafīta mu Greenwood monso, mwine mobatūtyile mamangajini ne kusōka mobo 1 400 ne kupita. Ba Leta banenene amba kwafwile bantu 36, inoko kibalwa kya bine kyadi kikokeja kufika pa bantu tutwa na tutwa.

Tutu Richard Hill, Mwifundi wa Bible ufīta kadi ushikatanga mu Greenwood, usekununa byalongekele amba: “Mu bwine bufuku bwa kavutakanya’bwa, twadi bende ku kupwila. Batwe pa kupwa kupwila, twaivwana lunwa lwa masashi mu vile. Aendelele kuvuma kufika’nka ne bufuku bininge.” Dya Busatu lubanga, 1 Kweji 6, bintu byabipila’ko. “Bantu bamo baiya, betunena’mba shi musaka kupanda nyemenai ku Kyubo Kikatampe kya Leta.” Ebiya Tutu Hill, wandi mukaji ne babo bana batano banyemena ku Kyubo kitampe kya Leta kya mu Tulsa. Kwadi kulaminwe kintu kya bantu bafīta 3 000, bana-balume ne bana-bakaji, na basola baityilwe na umbikalo mwanda wa kupwa kavutakanya.

Enka mu kine kitatyi’kya, tutu umo muzungu Arthur Claus, wakwata butyibi na bukankamane. Unena’mba, “ponaivwene amba bantu baleta tuvutakanya banangakananga mu Greenwood, batūta bintu ne kusōka mobo, nakwata butyibi bwa kukatala Tutu Hill mulunda nami shi udi biyampe.”

Kalasa ka bana 14 bafundile dibuku La Harpe de Dieu na Arthur Claus

Aye pa kufika ku njibo ya Tutu Hill, watana’ko mulondakani nandi muzungu ukwete buta. Uno mulondakani kadi mulunda na Tutu Hill, walanga’mba Arthur nandi udi mu bantu baleta tuvutakanya. Wamwipangula na bulobo amba “i bika byowaiya kulonga kuno?”

Arthur uvuluka’mba “shi nkyamulombwelepo kyonaendedile’ko, wadi wa kungipaya. Namukulupija’mba Tutu Hill i mulunda nami ne amba ngiyanga ku ino njibo kitatyi ne kitatyi.” Ba Arthur ne uno mulondakani bamulamine biyampe bintu kutyina ba kebitūta.

Ne kwija mpika, Arthur wayuka’mba ba Tutu Hill ne kyandi kisaka badi ku Kyubo Kikatampe kya Leta. Basapwidile Arthur amba bantu bafīta kebakokejapo kulupuka’mo pampikwa lupusa lwa komanda wadi wibatala. Arthur wanenene amba: “Byadi bikomo bininge kwisamba na uno komanda. Ami pa kumulombola kyonaendedile’ko, wangipangula’mba: ‘Le usa kulama kino kisaka ne kuvuija bisakibwa byabo?’ Nami naitabija.”

Pa kupebwa lupusa mu mukanda, Arthur waenda lubilo ku Kyubo Kikatampe kya Leta. Wapa’o sola wadi ulamine’ko, mwine wabezemukile amba: “Eh, komanda mwine i mushinye’ko! Le uyukile amba abe ye muntu mubajinji kulupwija muntu muno dyalelo?” Ne kwija mpika balupula Tutu Hill ne kyandi kisaka. Abo bonso baikila mu motoka wa Arthur baenda ku njibo.

Tutu Claus walamine biyampe Tutu Hill ne kisaka kyandi. Kimfwa kyandi kya bukankamane ne buswe bwa bu bana na bana kyatengele bantu bakwabo. Arthur wanenene amba: “Mulondakani walamine bintu bya tutu Hill wafudile ku kusanswa Batumoni ba Yehova. Kadi bantu bavule basangedile myanda ya Bulopwe mwanda bamwene amba mu bantu ba Leza kemudipo kwilalulula kwa nkoba, ne amba i mutupu muntu wimona bu mutabuke bakwabo.”

a L’Âge d’Or waityilwe bu Consolation mu 1937 ne bu Reiveillez-vous! mu 1946.