Banwe Besongele Panopano—Tai Mutyima ku Kwingidila Yehova

1-2. (a) Mwanda waka boba besongele panopano bafwaninwe kukulupila Yehova? (Ñimbo ya Mitōto 37:3, 4) (b) I bika byotusa kwisambila’po mu kino kishinte?

LELO musaka kwisonga, nansha kadi le mwesongele panopano? Shi i amo, ye uno mutengēle kwisanswa bininge mu būmi. Shako, mu busongi mudi bikoleja, kadi mudi butyibi bukatampe bwa kukwata. Muswelo omulwa na ano makambakano ne butyibi bomukwata bidi na lupusa pa nsangaji yenu mu busongi mu myaka mivule. Shi mukulupile Yehova, mukakwata butyibi buyampe, busongi bwenu bukaningila’ko, kadi po pene mukekala na nsangaji. Ino shi musūle milangwe ya Leza, nabya kemukabulwepo kutanwa na makambakano akazozeja busongi bwenu, ne kwimubudija nsangaji.​—Tanga Ñimbo ya Mitōto 37:3, 4.

² Nansha kino kishinte byokīsambila pa boba besongele panopano, ino makambakano esambīlwe’mo atananga ne boba ke beje mu busongi. Tusa kwisambila’mo pa ñeni yotubwanya kuboila ku bimfwa bya bana-balume ne bana-bakaji ba kikōkeji batelelwe mu Bible. Bino bimfwa bya mu Bible bitupa madingi otubwanya kwingidija mu myanda palapala ya mu būmi, enka ne mu busongi mwine. Kadi tusa kumona ne ñeni yotuboila ku myanda itene balume ne bakaji ba mu ano etu mafuku.

MAKAMBAKANO ABWANYA KUTANA BOBA BESONGELE PANOPANO

3-4. Le i makambakano’ka abwanya kutana boba besongele panopano?

³ Bantu bamo babwanya kukankamika boba besongele panopano bekale na būmi bobeta bu bufwaninwe. Kimfwa, bambutwile ne babutule bakwabo babwanya kutonona ba mulume ne mukaji bashilule kubutula bukidibukidi bana. Kadi balunda ne ba mu kisaka bakokeja kusoñanya boba besongele panopano bapote njibo ne kuyuja’mo bintu bilumbuluke.

⁴ Shi bano ba mulume ne mukaji kebatadijepo, babwanya kukwata butyibi bwibatweja mu mapu mavule. Kino kikalomba padi bonso babidi bengile bininge mansá mavule mwanda wa kufuta ano mapu. Kaji ka ku ngitu kabwanya kudya kitatyi kyonso kyobadi ba kupityija mu kifundwa kya Bible kya pa kasuku, mu butōtyi bwa kisaka, ne mu kusapula. Babwanya’nka ne kubulwa kupwila mwanda wa kwingila ne mansá a ntentekelo pa kumona lupeto luvule ne kulama kaji kabo. Mfulo mfulō, babulwa ne mikenga ya kwingila bininge mu mwingilo wa Yehova.

5. I ñeni’ka yowaboila kudi ba Klaus ne Marisa?

⁵ Myanda mimweke ilombola’mba kuta mutyima ku kwiungwija bintu bya ku ngitu kekuletangapo nsangaji. Tala byefundile ba Klaus ne Marisa pa uno mwanda.b Ku ngalwilo kwa busongi bwabo, badi bengila bonso babidi kitatyi kyonso mwanda wa bekale na būmi bwa lupeto. Ino abo pa kutokena’mo bininge, kebatene’mopo nsangaji. Klaus unena’mba: “Twaikele na bintu bivule bya ku ngitu kupita ne byotwadi tusakilwa, inoko ku mushipiditu, bule. Kunena pampikwa kafinda, būmi bwetukoleje.” Padi nenu mwi bemwene amba kuta mutyima ku kusokola bintu bya ku ngitu kekwemuletēlepo nsangaji. Shi bidi nankyo, kemwakatyumukwai mutyima. Kubandaula bimfwa biyampe bya bakwabo kubwanya kwimukwasha mu uno mwanda. Tushilulei na kubandaula ñeni ibwanya kuboila balume ku kimfwa kya Mulopwe Yehoshafata.

KULUPILAI YEHOVA, PAMO BWA MULOPWE YEHOSHAFATA

6. Le Mulopwe Yehoshafata wālondele namani madingi adi mu Nkindi 3:5, 6, pa kulwa na kikoleja kikatampe kyāmutene?

⁶ A balume, le kyaba kimo mwiivwananga bu mubalēmenenwa bininge na biselwa byenu? Shi i amo, mubwanya kumwena mu kimfwa kya Mulopwe Yehoshafata. Yehoshafata byaādi mulopwe, wādi na kiselwa kya kukinga muzo mutuntulu! Le wāvuije namani kino kiselwa kikatampe bininge? Yehoshafata wālongele byonso byabwanya mwanda wa kulama bantu ba mu bulopwe bwandi. Wākomeje bibundi bya mu Yuda ne kwikala na kibumbo kikatampe kya basola 1 160 000 ne kupita. (2 Bi. 17:12-19) Mafuku pa kupita’po, Yehoshafata wātanwa na kikoleja kikatampe. Kibumbo kikatampe kya bene Amone, bene Moabu, ne bana-balume ba mu ntanda ya ngulu ya Seila bāiya kumuzakaja aye, kisaka kyandi, ne bantu bandi. (2 Bi. 20:1, 2) Le Yehoshafata wālongele namani? Wālombele Yehova amukwashe ne kumukomeja. Kino kyādi kikwatañane na madingi adi mu Nkindi 3:5, 6. (Tanga.) Milombelo ya kwityepeja ya Yehoshafata idi mu 2 Bilongwa bya Mafuku 20:5-12, ilombola amba wādi ukulupile bininge Shandi wa buswe udi mūlu. Le Yehova wālondolwele namani milombelo ya Yehoshafata?

7. Le Yehova wālondolwele namani milombelo ya Yehoshafata?

⁷ Yehova wēsambile na Yehoshafata kupityila kudi mwine Levi umo witwa bu Yahaziele. Yehova wānena’mba: “Imanai, imanai kujina mpika, mumone lupandilo lwa Yehova pomudi.” (2 Bi. 20:13-17) Na bubine uno ke muswelopo ulwibwanga divita! Inoko, buno bulombodi kebwātambilepo kudi muntu; bwātambile kudi Yehova mwine. Yehoshafata byaākulupile Leza ne pa mfulo, wālonga byonka byaānenenwe kulonga. Aye ne bantu bandi pobāketene na balwana nabo, kātūdilepo kumeso kwa mulongo wa bulwi basola ba bwino, aa, ino wātūla’ko’tu batuimba bampikwa byabulwi. Yehova wāfikidije byobya byaālaile Yehoshafata; wānekenya balwana na Yehoshafata.​—2 Bi. 20:18-23.

8. Le i ñeni’ka ibwanya kuboila balume ku kimfwa kya Yehoshafata?

⁸ A balume, mubwanya kuboila ñeni ku kimfwa kya Yehoshafata. Mudi na kiselwa kya kulela ba mu kyenu kisaka, pa kino, mwingilanga bininge mwanda wa kwibakinga ne kwibakwatakanya. Pomutanwa na bikoleja, mubwanya kumona bu mudi na bukomo bwa kupwa’byo banwe bene. Inoko, lekai kukulupila bukomo bwa banwe bene. Ino, lombai pafula Yehova emukwashe. Kadi lombelai bininge pamo na benu bakaji. Kimbai bwendeji bwa Yehova na kwifunda Bible ne mabuku aletele bulongolodi bwa Leza. Padi bantu bakwabo kebaketabijapo butyibi bukwatañene na Bible bomukakwata, babwanya’nka ne kwimunena’mba mubabela bulubi. Babwanya kwimulombola’mba lupeto ne bintu byolupota byo bikakinga kisaka kyenu biyampe. Ino banwe vukukai kimfwa kya Yehoshafata. Wākulupile mudi Yehova kadi wālombwele kino kupityila ku bilongwa byandi. Yehova kāelelepo uno muntu wa lulamato, kadi kakemwelapo nenu. (Ñim. 37:28; Bah. 13:5) Le i bika bibwanya kulonga ba mulume ne mukaji pa kwikala na būmi bwa nsangaji?

TAI MUTYIMA KU KWINGIDILA YEHOVA, PAMO BWA BA ISAYA NE WANDI MUKAJI

9. Le i bika byotubwanya kunena padi mupolofeto Isaya ne wandi mukaji?

⁹ Mupolofeto Isaya ne wandi mukaji bātele mutyima bininge ku kwingidila Yehova mu bwabo būmi. Isaya wādi mupolofeto, kadi bimweka bu wandi mukaji nandi wādi mupolofeto mwanda i mutelwe bu “mupolofeto mukaji.” (Isa. 8:1-4) Ba Isaya ne wandi mukaji bādi bine batele mutyima bininge ku butōtyi bobādi batōta Yehova. Bine, i bashīle boba besongele dyalelo kimfwa kiyampe bininge!

10. Le kwifunda bupolofeto bwa mu Bible kubwanya kukwasha namani ba mulume ne mukaji basumininwe kwingidila Yehova bininge?

¹⁰ Mu ano etu mafuku namo, boba besongele babwanya kuta mutyima ku kwingidila Yehova mu bwabo būmi na kulonga byobabwanya mu mwingilo wandi. Babwanya kuningija kikulupiji kyabo mudi Yehova na kwifundila pamo bupolofeto bwa mu Bible ne kutala muswelo obufikidila.c (Tet. 1:2) Bakokeja kulangulukila pa muswelo obabwanya kukwasha ku kufikidila kwa bupolofeto bumo bumo bwa mu Bible. Kimfwa babwanya kukwasha ku kufikidila kwa bupolofeto bwānenene Yesu bwa amba myanda miyampe ikasapulwa pa ntanda yonso kumeso kwa mfulo kufika. (Mat. 24:14) Shi ba mulume ne mukaji abakulupila amba bupolofeto bwa mu Bible bufikidilanga, bakasumininwa kwingidila Yehova bininge.

TŪLAI TUMWENO TWA BULOPWE PA KIFUKO KIBAJINJI, PAMO BWA BA AKWILA NE PISHILA

11. Le i bika byābwenye kulonga ba Akwila ne Pishila, ne mwanda waka?

¹¹ Mu busongi bwenu mubwanya kwiula ba Akwila ne Pishila, ba mulume ne mukaji Bayuda bādi bashikata mu kibundi kya Loma. Bāivwene myanda miyampe itala Yesu, kupwa bāikala ke bene Kidishitu. Na bubine, bādi basangedile būmi bobādi nabo. Ino, būmi bwāshinta mu kitulumukila pāsoñenye Mbikavu Kodusa amba Bayuda bonso bataluke mu Loma. Tala dino divilu modyādi dya kukambakenya ba Akwila ne Pishila. Bādi ba kushiya bantu bobeibidile nabo, kukakimba njibo kwa kushikata ne kwa kwingidila monka mwingilo wabo wa kupunga mapema. Le ano makambakano a mu kitulumukila ebālengeje bakomenwe kwingidila Yehova? Ye uno ubatana malondololo a kino kipangujo. Ba Akwila ne Pishila pa kuvilukila mu Kodinda, bāshilwile kukwasha kipwilo ne kwingidila pamo na mutumibwa Polo mwanda wa kukankamika banabetu. Kadi mafuku pa kupita’po, bāvilukila mu kibundi kikwabo mwādi musakilwa basapudi. (Bil. 18:18-21; Loma 16:3-5) Bine ye bano bāikele na būmi bwa nsangaji kwine’kwa!

12. Mwanda waka boba besongele bafwaninwe kwitungila bitungo bya kwingidila Yehova?

¹² Mu ano etu mafuku, boba besongele babwanya kwiula ba Pishila ne Akwila na kutūla tumweno twa Bulopwe pa kifuko kibajinji. Kitatyi kiyampe ku boba bakimba kwisonga kya kwisambila pa bitungo bya ku mushipiditu i pobakinangila. Boba besongele pobakwata butyibi ne kulonga bukomo bwa kufikila pa bitungo byabo bya ku mushipiditu, bakekala na mikenga mivule ya kwimwena mushipiditu wa Yehova wingila mu būmi bwabo. (Mus. 4:9, 12) Tala kimfwa kya ba Russell ne Elizabeth. Russell unena’mba, “Potwadi tukinangila, twetungile bitungo bipotoloke bya ku mushipiditu.” Elizabeth nandi amba, “Twadi twisambila kala pa ino myanda mwanda wa iketukwashe kumeso pa kukwata butyibi palapala, bwine kebuketulengejapo tukomenwe kufikila pa bitungo byetu.” Ngikadilo ya ba Russell ne Elizabeth yebalengeje bavilukile mu Micronésie mwine mwadi musakilwa basapudi bavule.

13. Mungya Ñimbo ya Mitōto 28:7, le i bika byotukamwena’mo shi tubakulupila Yehova?

¹³ Pamo bwa ba Russell ne Elizabeth, bantu bavule besongele i bakwate butyibi bwa kuleka kulonga’ko bintu bimo mwanda wa bapityije kitatyi kikatampe mu mwingilo wa kusapula ne kufundija. Shi ba mulume ne mukaji abetungila bitungo bya mvubu mu mwingilo wa Yehova ne kulonga abo bonso bukomo bwa kufikila’po, nabya bakemwena bintu biyampe bivule. Bakemwena muswelo ukebakwatakanya Yehova, kikulupiji kyabo mwadi kikaningila’ko, kadi bakekala na nsangaji ya binebine.​—Tanga Ñimbo ya Mitōto 28:7.

KULUPILAI MILAO YA YEHOVA PAMO BWA MUTUMIBWA PETELO NE WANDI MUKAJI

14. Le ba mutumibwa Petelo ne wandi mukaji bālombwele namani amba bādi bakulupile mulao udi mu Mateo 6:25, 31-34?

¹⁴ Besongele babwanya kuboila ñeni ne ku kimfwa kyāshile ba mutumibwa Petelo ne wandi mukaji. Kintu kya myeji isamba kupwa kwa Petelo kwitana na Yesu, Petelo wādi na butyibi bukatampe bwa kukwata. Petelo wādi upoya mwita wa lui mwanda wa kuvuija bisakibwa bya kisaka kyandi. O mwanda Yesu paāmwityile amulonde kitatyi kyonso, Petelo wādi ufwaninwe kuta mutyima ne ku ngikadilo ya kyandi kisaka. (Luka 5:1-11) Petelo wātongele kwenda na Yesu mu mwingilo wa busapudi. Buno bwādi butyibi bwa tunangu! I byendele’mo tufule ku kulanga’mba wandi mukaji wāmukwatakenye mu buno bwandi butyibi. Bible ulombola’mba pa kupwa kwa Yesu kusanguka, mukajā Petelo wāendele pamo na wandi mulume mu ñendo imoimo. (1 Ko. 9:5) Pampikwa ne kutatana, byaādi mukaji mwine Kidishitu uleta kimfwa kiyampe, wākweshe Petelo ape balume ne bakaji bene Kidishitu madingi a ku bukomo bwa mushipiditu na bwanapabo. (1 Pe. 3:1-7) I kimweke patōka’mba ba Petelo ne wandi mukaji bādi bakulupile mu milao ya Yehova amba ukavuija bisakibwa byabo shi batūle tumweno twa Bulopwe pa kifuko kibajinji mu būmi bwabo.​—Tanga Mateo 6:25, 31-34.

15. Lelo i bika byowefunda ku byobya byemwenine ba Tiago ne Esther?

¹⁵ Shi kemudi beje mu kwisonga, le mukatamija namani mutyima wa kulonga bivule mu mwingilo wa Yehova? Muswelo mubajinji i wa kwifundila ku byobya byemwenine balume ne bakaji bakwabo. Kimfwa, mukokeja kwifunda bishinte binena’mba, “Bepēne Abo Bene na Mutyima Tō.” Bino bishinte byakweshe ba Tiago ne Esther, ba mulume ne mukaji ba mu Brezile, batamije bininge mutyima wa kukengidila kokwa kusakilwa basapudi. Tiago unena’mba: “Potwatangile myanda ya mukwashisha Yehova bengidi bandi ba mu kino kitatyi, netu twasakile kwimwena kuboko kwa Yehova potudi kwitukwasha ne kwitukwatakanya.” Mwenda mafuku bavilukīle mu Paraguay, mwine mobengila tamba mu 2014 mu mwaba wa ludimi lwa Kipolotige. Esther unena’mba: “Kisonekwa kyotusenswe bininge batwe bonso i Bene Efisesa 3:20. Twi bemwene misunsa mivule kufikidila kwa bino binenwa mu mwingilo otwingidila Yehova.” Mu uno mukanda ku Bene Efisesa, Polo wānenene amba Yehova ubwanya kulonga bivulevule kupita ne byonso byotumulomba. Bine uno mulao i mufikidile!

16. Le boba batamba mu kwisonga babwanya kusokola kwepi madingi pobabandaula bitungo bya kwitungila mu būmi?

¹⁶ Dyalelo balume ne bakaji bakitamba mu kwisonga bakokeja kuboila ñeni ku bakwabo befundile kukulupila mudi Yehova. Balume ne bakaji bamo ke bengile myaka mivule mu mwingilo wa kitatyi kyonso. Le mubulwe’po kwibalomba madingi shi musaka mwa kufikila pa bitungo byenu? Uno i muswelo mukwabo wa kulombola’mba mukulupile Yehova. (Nki. 22:17, 19) Bakulumpe nabo bakokeja kukwasha bantu bakitamba mu kwisonga betungile bitungo bya ku mushipiditu ne kufikila’po.

17. Le i bika byatene ba Klaus ne Marisa, ne i ñeni’ka yotubwanya kuboila ku byebatene?

¹⁷ Kyaba kimo, tukokeja kukomenwa kufikila pa mingilo yotwadi twitungīle. Tala kimfwa kya ba Klaus ne Marisa, botwesambilanga’po. Myaka isatu pa kupwa kwisonga, batalukile kwabo baketuma mu mwingilo wa lūbako ku musambo wa Felande. Inoko bebalombola’mba kebabwanyapo kushikata’ko kupita pa myeji isamba. Dibajinji batyumukilwe mutyima. Ino bintu pa kushinta, baitwa kukafunda masomo a ludimi lwa Kyalabu, ne pano bengidilanga mu mwaba wa ntanda ingi mwisambwa Kyalabu. Marisa pavuluka byapityile, unena’mba: “Kulonga bintu byokwalongelepo kashā kuletanga moyo kadi kulomba kukulupila bininge mudi Yehova. Inoko namwene mwetukwashishe Yehova mu miswelo moketwadipo tulangila. Ami pa kwimwena bino, kikulupiji kyami mudi Yehova kyaningile’ko.” Monka mwekilombwela kino kimfwa, yukai’mba Yehova ukemwesela nyeke shi mumukulupile ne pa mfulo.

18. I bika bifwaninwe kulonga boba besongele pa kusaka’mba bendelele kukulupila Yehova?

¹⁸ Busongi i kyabuntu kitamba kudi Yehova. (Mat. 19:5, 6) Usakanga boba besongele basangele kino kyabuntu. (Nki. 5:18) A banwe besongele panopano, mubulwe’po kubandaula byobya byomulonga mu būmi bwenu? Le muloñanga bukomo bwa kulombola Yehova amba mufwijanga’ko pa kyabuntu kyawimupele? Lombolai’byo Yehova mu milombelo. Kimbai misoñanya ya mu Kinenwa kyandi ikwatañene na ngikadilo yomudi’mo. Kupwa londai madingi emupa Yehova. Kulupilai amba mukekala na nsangaji mu būmi shi mute mutyima ku kwingidila Yehova mu busongi bwenu!