Kwata na Bulēme Dyese dya Kulombela

1. Le tufwaninwe kumona namani mukenga witupele Yehova wa kulombela kwadi?

TUDI na dyese dya kutendelwa​—dya kufwena Mulongi wa diulu ne ntanda mu milombelo. Langa’po bidi: Tubwanya kulombola Yehova byonso bidi mu mutyima wetu kitatyi kyo-kyonso kadi mu ludimi lo-lonso, pampikwa nansha kwilaya nandi. Tubwanya kumulomba potudi pa butanda mu lupitalo nansha mu buloko, koku tukulupile amba Tata wetu wa buswe uketwivwana. Bine tufwijanga’ko bininge pa kino kyabuntu.

2. Le Mulopwe Davida wālombwele namani amba ukwete na bulēme dyese dya kulombela?

² Mulopwe Davida wādi ukwete na bulēme dyese dya kulombela. Wāimbīle Yehova amba: “Milombelo yami ikale pamo bwa ensense milongololwe ku meso obe.” (Ñim. 141:1, 2) Mu mafuku a Davida, ensense ikola yādi ingidija babitobo mu butōtyi bwa bine, yādi ilongololwa senene. (Div. 30:34, 35) Davida paēsambīle pa ensense, wādi usaka kunena’mba, usakanga kulangulukila bininge pa byasaka kulombola Yehova mu milombelo. Bino ye byotusakanga ne batwe. Tusakanga milombelo yetu isangaje Yehova.

3. Le i muswelo’ka otufwaninwe kufwena Yehova mu milombelo, ne mwanda waka?

³ Kitatyi kyotulombela kudi Yehova, ketufwaninwepo kutūla’mo kibidiji kipitepite. Tufwaninwe kwikala na bulēme bukatampe. Langulukila pa bimonwa bya kutendelwa byāmwene Isaya, Ezekyele, Danyele ne Yoano. Kimonwa ne kimonwa i kishīle na bikwabo, inoko abyo byonso i biifwane ku kintu kimo. Byonso bilombola Yehova bu Mulopwe mukatakata. Isaya wāmwene “Yehova ushikete pa lupona lulampe kadi luzunzulwe.” (Isa. 6:1-3) Ezekyele wāmwene Yehova ushikete pa dikalo dyandi dya mūlu mujokolokwe na “kiké . . . pamo bwa kya nkongolo.” (Ezk. 1:26-28) Danyele wāmwene “Mukulu wa Mafuku” uvwele bisandi bitōka, mimbi ya mudilo ilupuka ku lupona lwandi. (Dan. 7:9, 10) Kadi Yoano nandi, wāmwene Yehova ushikete pa lupona lujokolokwe na kintu kidi pamo bwa nkongolo umweka bwa emelode. (Kus. 4:2-4) Kitatyi kyotulangulukila pa ntumbo mikatakata ya Yehova, tuvulukanga’mba i dyese dikatampe kumufwena mu milombelo, ne amba tufwaninwe kulombela kwadi na bulēme. Ino le i bika byotufwaninwe kutela mu milombelo?

“NANSHI, BANWE MUFWANINWE KULOMBELA NAMINO”

4. Le i bika byotwifunda ku bintu bibajinji byātelele Yesu mu milombelo ya kulondela’po itanwa mu Mateo 6:9, 10?

⁴ Tanga Mateo 6:9, 10. Mu Busapudi bwandi bwa ku Lūlu, Yesu wāfundije’mo bandi bana ba bwanga muswelo muyampe wa kulombela Leza. Yesu pa kupwa kunena’mba “nanshi, banwe mufwaninwe kulombela namino,” wātelele bintu bibajinji bya mvubu mpata bikwatañene bininge na mpango ya Yehova: Kupandulwa kwa dijina dyandi; kwiya kwa Bulopwe, bwine bukōnakanya balwana nandi bonso; ne madyese a kumeso akesela Leza ntanda ne bantu. Kitatyi kyotutela bino bintu mu milombelo yetu, tulombolanga’mba kiswa-mutyima kya Leza i kya mvubu kotudi.

5. Le i byendele’mo tulombele pangala pa myanda itutala?

⁵ Mu kipindi kilonda’ko mu ino milombelo, Yesu wālombwele’mo amba i byendele’mo kulombela pangala pa myanda itutala. Tubwanya kulomba Yehova etupe byakudya byetu bya difuku, etulekele bubi bwetu, etukinge ku matompo ne kwitunyongolola kudi yewa mubi. (Mat. 6:11-13) Potulomba Yehova bino bintu, tulombolanga’mba tusakilwa bukwashi bwandi, ne amba tusakanga kumusangaja.

6. Le tufwaninwe kulombela enka pa bintu bitelelwe mu milombelo ya kulondela’po? Shintulula.

⁶ Yesu kādipo usaka balondi bandi balonde ino milombelo ya kulondela’po mu kishima ne kishima. Mu milombelo mikwabo yālombēle Yesu, wātelele’mo bintu bikwabo byādi bya mvubu kwadi mu kine kitatyi’kya. (Mat. 26:39, 42; Yoa. 17:1-26) Ne batwe netu, tubwanya kulombela pangala pa mwanda o-onso witukambakanya. Shi tukimba kukwata butyibi, tubwanya kumulomba etupe tunangu ne ñeni. (Ñim. 119:33, 34) Shi tusaka kushilula mwingilo mukomo, tubwanya kumulomba bujinguludi ne kusansanya. (Nki. 2:6) Bambutwile babwanya kulombela pa mwanda wa babo bana, bana babwanya kulombela pa mwanda wa babo bambutwile, kadi batwe bonso tufwaninwe kulombela pa mwanda wa bantu botwifunda nabo Bible ne boba botusapwila. Inoko milombelo yetu keifwaninwepo kwimanina enka pa kulomba bintu.

7. Mwanda waka tufwaninwe kutendela Yehova mu milombelo?

⁷ Tufwaninwe ne kuvuluka kutendela Yehova mu milombelo yetu. Kekudipo muntu ufwaninwe mitendelo yetu kutabuka Leza. Aye i ‘muyampe kadi kejepo kulekela.’ Kadi i “wa lusa ne kanye, wija pa kukwatwa bulobo kadi muyulwe buswe bwa ndamatyidile ne bubinebine.” (Ñim. 86:5, 15) Bine tudi na bubinga bwendele’mo bwa kutendela Yehova pa ngikadila yandi ne pa bilongwa byandi.

8. Lelo i bintu’ka bimobimo byotubwanya kufwijija’ko Yehova? (Ñimbo ya Mitōto 104:12-15, 24)

⁸ Kutentekela pa kutendela Yehova mu milombelo, tusakanga ne kumufwija’ko pa bintu bya kutendelwa byalonga. Kimfwa, tubwanya kumufwija’ko pa misombelo milumbuluke yotumona mu maluba, byakudya bilumbuluke bya ntanda ne miseke, ne pa nsangaji ya kwikala na balunda bayampe. Tata wetu wa buswe i mwitupe bino byonso pamo ne bikwabo bivule, mwanda’tu wa twikale na nsangaji. (Tanga Ñimbo ya Mitōto 104:12-15, 24.) Kadi kya mvubu kutabuka, tufwijanga’ko Yehova pa byakudya bivule bya ku mushipiditu byaetupa ne pa lukulupilo lwetu lulumbuluke lwa kumeso.

9. Le i bika bibwanya kukukwasha uvuluke kufwija’ko Yehova? (1 Bene Tesalonika 5:17, 18)

⁹ I bipēla kwilwa’ko kufwija Yehova pa bintu byonso byaetulongela. Le i bika bibwanya kukukwasha uvuluke kumufwija’ko? Ubwanya kulemba bintu byowamulombele ne kutala’po kyaba ne kyaba, mwanda wa kumona muswelo ulondolola’byo Yehova. Kupwa mufwije’ko mu milombelo pa bukwashi bwandi. (Tanga 1 Bene Tesalonika 5:17, 18.) Langulukila pa uno mwanda: Tusangalanga ne kwiivwana biyampe shi bantu bakwabo betufwija’ko. Ne Yehova nandi, kitatyi kyotuvuluka kumufwija’ko pa muswelo walondolola ku milombelo yetu, bimusangajanga ku mutyima. (Kol. 3:15) Le i bubinga’ka bukwabo botufwaninwe kufwijija’ko Leza wetu?

FWIJA’KO YEHOVA PANGALA PA WANDI MWANA MUSWEDIBWE

10. Kukwatañana na 1 Petelo 2:21, mwanda waka tufwaninwe kufwija’ko Yehova pa kutuma kwaatumine Yesu pano pa ntanda?

¹⁰ Tanga 1 Petelo 2:21. Tufwaninwe kufwija’ko Yehova pa kutuma kwaatumine wandi Mwana muswedibwe aye etufundije. Twifundanga bivule bitala Yehova ne pa muswelo wa kumusangaja, na kwifunda būmi bwa Yesu. Shi tulombola lwitabijo mudi Kidishitu, tubwanya kupwana na Yehova Leza kipwano kya mpwaninine ne kwikala nandi mu ndoe.​—Loma 5:1.

11. Mwanda waka tulombelanga mu dijina dya Yesu?

¹¹ Tufwijanga’ko Yehova mwanda tubwanya kulombela kwadi kupityila kudi wandi Mwana. Yehova wingidijanga Yesu mwanda wa kulondolola ku byotumulomba. Yehova wivwananga ne kulondolola ku milombelo imulombwa mu dijina dya Yesu. Yesu wāshintulwile amba: “Kyonso kyomulomba mu dijina dyami, shi kika shi kika, nkalonga’kyo, amba Tata atumbijibwe pa mwanda wa Mwana.”​—Yoa. 14:13, 14.

12. Le i bubinga’ka bukwabo botufwaninwe kufwijija’ko Yehova pangala pa wandi Mwana?

¹² Yehova witulekelanga bubi bwetu kupityila ku kitapwa kya kinkūlwa kya Yesu. Bisonekwa bitela Yesu bu “kitobo mukatampe [ushikete] . . . ku kuboko kwa lundyo lwa lupona lwa Mukatakata momwa mūlu.” (Bah. 8:1) Yesu i wetu “mukwashi udi kudi Tata.” (1 Yo. 2:1) Bine tufwijanga’ko Yehova pa kwitupa Kitobo Mukatampe wivwanije kubulwa kubwaninina kwetu kadi mwine “witusengelanga”! (Loma 8:34; Bah. 4:15) Twi bantu ba kubulwa kubwaninina, pampikwa kitapwa kya Yesu, ketwadipo ba kubwanya kufwena Yehova mu milombelo. Bine, ketubwanyapo kufwija’ko Yehova mobifwaninwe pa kyabuntu kilēme kyaetupele​—kya wandi Mwana muswedibwe!

LOMBELA PA MWANDA WA BATUTU NE BAKAKA

13. Le bufuku bukya Yesu kafu, wālombwele namani amba usenswe bandi bana ba bwanga?

¹³ Bufuku bukya Yesu kafu, wālombēle mu kitatyi kilampe pa mwanda wa bandi bana ba bwanga, wālomba Shandi ‘ebalame mwanda wa yewa mubi.’ (Yoa. 17:15) Bine, Yesu wālombwele amba wibasenswe! Nansha byaādi utengēle kususulwa bininge, ino wādi utēle mutyima pa mukekadila batumibwa bandi.

14. Le i muswelo’ka otubwanya kulombola’mba tusenswe batutu ne bakaka?

¹⁴ Byotwiulanga Yesu, ketutengapo mutyima enka pa byotusakilwa. Kyaba kyonso, tulombelanga pa mwanda wa batutu ne bakaka. Potulonga namino, tukōkelanga musoñanya wa Yesu wa kwisanswa batwe bene na bene, kadi tulombolanga Yehova amba tusenswe banabetu mu lwitabijo. (Yoa. 13:34) Kulombela pa mwanda wa batutu ne bakaka ke kujimijapo kitatyi. Kinenwa kya Leza kitulombola’mba, “milombelo ya kuzenza ya moloke idi na lupusa lukatampe.”​—Yak. 5:16.

15. Mwanda waka batutu ne bakaka basakilwa milombelo yetu?

¹⁵ Batutu ne bakaka basakilwa milombelo yetu mwanda bekondanga na matompo mavule. Tubwanya kulomba Yehova ebakwashe bōminine misongo, bimpengele bya kipangila, mavita, kupangwapangwa, nansha makambakano makwabo. Kadi tubwanya ne kulombelela batutu ne bakaka bepāna mwanda wa kukwasha boba basakilwa bukwashi. Padi uyukile’ko banabetu bamo bekonda na ano makambakano. Ubulwe’po kutela majina abo mu milombelo ya kwa abe mwine? Tulombolanga’mba tusenswe bya binebine kisaka kya banabetu, na kulomba Yehova ebakwashe bōminine.

16. Mwanda waka tufwaninwe kulombela pa mwanda wa boba batangidile mwingilo mu bukata mwetu?

¹⁶ Boba batangidile kipwilo, bafwijanga’ko bininge shi twibatela mu milombelo yetu. Kadi ino milombelo ibakwashanga. Bino byo byādi biyukile ne mutumibwa Polo. Wālembele amba: “Lombelai ne pa mwanda wami, amba binenwa bimpebwe pongasama kyakanwa kyami, amba mbwanye kwisamba pampikwa moyo pa kuyukanya kifibwe kikola kya myanda miyampe.” (Ef. 6:19) Ne dyalelo nadyo, tudi na batutu batangidile mu bukata mwetu bengila bininge. Tulombolanga amba twibasenswe na kulomba Yehova esele mwingilo wabo.

POTUTANGIDILA BAKWETU MU MILOMBELO

17-18. Le i kitatyi’ka kyobabwanya kwitunena tutangidile bakwetu mu milombelo, ne i bika byotufwaninwe kulama mu ñeni?

¹⁷ Kyaba kimo betunenanga kutangidila bakwetu mu milombelo. Kimfwa, kaka wendeja kifundwa kya Bible ubwanya kunena kaka ukamutūdile alombele. Kaka ukatūlañene ubwanya padi kayukilepo senene kifundwa, pa kino ubwanya kusangela kulombela milombelo ya mfulo. Mu uno muswelo, ubwanya kupēlelwa kukwatañanya milombelo yandi na bisakibwa bya mwifundi.

¹⁸ Babwanya kunena tutu alombele milombelo ku kupwila kwa kwenda mu busapudi, nansha ku kupwila kwa pa kipwilo. Batutu bapebwa dino dyese bafwaninwe kulama mu ñeni kitungo kya ku kupwila. Milombelo keifwaninwepo kwingidijibwa mwanda wa kudingila kipwilo, nansha kuleta misapu. Ku kupwila kuvule, kitatyi kitungilwe mwanda wa kwimba ne milombelo i minite itano. Nanshi tutu ulombela kafwaninwepo kunena “binenwa bingibingi,” nakampata ku ngalwilo kwa kupwila.​—Mat. 6:7.

MONA MILOMBELO NA MVUBU MU BOBE BŪMI

19. Le i bika biketukwasha twikale beteakanye ku difuku dya Yehova dya butyibi?

¹⁹ Tufwaninwe kumona milombelo na mvubu, nakampata pano pafwena difuku dya Yehova dya butyibi. Yesu wānenene pa uno mwanda amba: “Nanshi kemwakilālai, zenzai kyaba kyonso mu milombelo amba mumone mwa kupandila ku bino bintu byonso bifwaninwe kulongeka.” (Luka 21:36) Kulombela kyaba kyonso kuketukwasha tushale batale ku mushipiditu, amba twikale beteakanye kitatyi kifika butyibi bwa Leza.

20. Le milombelo yetu ibwanya kwikala namani pamo bwa ensense ya luvumba luyampe?

²⁰ Le i bika byotwefunda? Tukwete na bulēme bukatampe dyese dya kulombela. Bintu bya mvubu mpata byotufwaninwe kulomba, i byobya bikwatañene bininge na mpango ya Yehova. Kadi tufwijanga’ko pangala pa Mwanā Leza ne Bulopwe bwandi, ne kulombela pa mwanda wa batutu ne bakaka. Ne kadi, tubwanya kulombela pa mwanda wa bisakibwa byetu bya ku ngitu ne bya ku mushipiditu. Shi tulangulukila bininge pa byotusaka kunena mu milombelo, tulombolanga’mba tukwete na bulēme dino dyese dya kulombela. Kudi Yehova, binenwa byetu bikekala pamo bwa ensense ya luvumba luyampe—mine “imusangajanga.”​—Nki. 15:8.