A Bankasampe​—Endelelai Kutama ku Mushipiditu pa Kupwa Kubatyijibwa

1. Le i bintu’ka biyampe bilongele kala bankasampe bavule?

MWAKA ne mwaka, kubatyijibwanga bankasampe bene Kidishitu tununu ne tununu. Le nobe kodi mutabule dino ditabula? Shi i amo, wi musangaje batutu ne bakaka ba mu kyenu kipwilo, kadi wi musangaje ne Yehova! (Nki. 27:11) Langulukila’po bidi pa bintu bivule biyampe byokodi kala mulonge. Wefundile Bible na kininga, padi mu bula bwa myaka mivule. Byowefundile byakukulupije amba Bible i Kinenwa kya Leza. Kadi kutabukidila, wayukile Mulembi wa dino dibuku dikola ne kumusanswa. Wasenswe Yehova bininge, o mwanda pano wi mwingidi wandi mwipāne kadi mubatyijibwe. Bine, bisangaja’po kashā!

2. Le i bika byotusa kwisambila’po mu kino kishinte?

² Ne kutatana kwine mpika, lwitabijo lobe lwatūdilwe pa ditompo mu miswelo mivule powadi wendelela amba ufikile ku kubatyijibwa. Inoko poenda utamina’ko, ukatanwa na matompo makwabo. Satana ukakimba kuzozeja buswe bosenswe Yehova, ne kukulengeja uleke kumwingidila. (Ef. 4:14) Ino kokaleka kino kilongeke. Le i bika bibwanya kukukwasha ukōkele nyeke Yehova ne kufikidija mulao obe wa kumwingidila? Ufwaninwe kulonga nyeke bukomo bwa kwendelela​—‘kwielela’ko’ kwikala mwine Kidishitu mutame. (Bah. 6:1) Le i muswelo’ka obwanya kulonga kino?

LE I BIKA BYOBWANYA KULONGA PA KWIKALA MWINE KIDISHITU MUTAME?

3. Le i bika bifwaninwe kulonga bene Kidishitu bonso pa kupwa kubatyijibwa?

³ Pa kupwa kubatyijibwa, batwe bonso tufwaninwe kulonda madingi obādingile banabetu ba mu Efisesa kudi mutumibwa Polo. Wēbakankamikile bekale bene Kidishitu ‘bakulwa-kala.’ (Ef. 4:13) Uno i muswelo mukwabo wa kunena’mba, ‘Endelelai kutama ku mushipiditu.’ Tubwanya kwivwanija byādi bisaka kunena mutumibwa Polo, paādingakenye kutama kwa ku mushipiditu na mutaminanga mwana ku ngitu. Kubutula mwana kuletelanga bambutwile nsangaji ne kwiivwana biyampe pa mwanda wandi. Inoko mwana’wa kakashalapo nyeke bu mwana wa lukeke. Mwenda mafuku uno mwana ukasakilwa kutalula ngikadila ya “bya bwanuke.” (1 Ko. 13:11) Ne batwe bene Kidishitu mo monka. Pa kupwa kubatyijibwa, tufwaninwe kwendelela kutama ku mushipiditu. Twisambilei’ko pa bintu bimobimo bibwanya kwitukwasha twendelele kutama ku mushipiditu.

4. Le i ngikadila’ka ibwanya kukukwasha utame ku mushipiditu? Shintulula. (Bene Fidipai 1:9)

⁴ Vudija buswe bosenswe Yehova. Usenswe kala Yehova bininge. Inoko buswe bomusenswe bubwanya kuvudila’ko. Muswelo’ka? Mutumibwa Polo witulombola’ko muswelo umo wa kwibuvudija, mu Bene Fidipai 1:9. (Tanga.) Polo wālombēle amba buswe bwa bene Fidipai “buvule’nka kuvula.” Nanshi buswe bwetu bubwanya kuvudila’ko. Tubwanya kwibuvudija na kwikala na “buyuki bwa binebine ne kusansanya kukatampe.” Shi tubayuka Yehova senene, po pene tumusanswanga, ne kusangela bumuntu bwandi ne muswelo wandi wa kulonga bintu. Tusakanga bininge kumusangaja, kadi ketusakengapo nansha dimo kulonga kintu kimufityija mutyima. Tuloñanga bukomo bwa kujingulula bintu byaetusakila kulonga, ne muswelo wa kwibilonga.

5-6. Le i muswelo’ka otubwanya kuvudija buswe botusenswe Yehova? Shintulula.

⁵ Tubwanya kuvudija buswe botusenswe Yehova na kuyuka senene wandi Mwana, mwine wāmwekeje bumuntu bwa Shandi mu muswelo mubwaninine. (Bah. 1:3) Kadi muswelo muyampe wa kuyuka Yesu, i kwifunda nsekununi idi mu Maevanjile aná. Shi wadi kwaikele na kibidiji kiyampe kya kutanga Bible difuku ne difuku, ubulwepo kushilula pano? Potanga nsekununi ya Yesu, tá mutyima bininge ku ngikadila yandi. Yesu wādi muntu ulumbwa; wāselele bana mu maboko andi na buswe. (Mako 10:13-16) Wādi wikele biyampe na bandi bana ba bwanga; bādi bapēlelwa kumusapwila milangwe yabo. (Mat. 16:22) Bine, Yesu wāiwile Shandi mu uno mwanda. Yehova i muntu ulumbwa. Tubwanya kufwena kwadi mu milombelo. Kitatyi kyotulombela, tubwanya kumusapwila milangwe yetu yonso ne mwine motwiivwanina. Tukulupilanga’mba kasapo kwitutopeka. Witusenswe kadi witutele mutyima.​—1 Pe. 5:7.

⁶ Yesu wādi wivwanina bantu lusa. Mutumibwa Mateo unena’mba: “Aye pa kumona bibumbo bya bantu, webakwatyilwa lusa mwanda badi basusulwa kadi basūlwe pamo bwa mikōko yampikwa mukumbi.” (Mat. 9:36) Le Yehova nandi wiivwananga namani? Yesu wānenene amba: “Tata udi mūlu nandi kasangelangapo nansha umo wa mu bano batyetyetyetye oneke.” (Mat. 18:14) Bine, bikankamika’po kashā! Potwenda tuyuka Yesu senene, buswe botusenswe Yehova nabo buvudilanga’ko.

7. Le kupwana na bene Kidishitu batame ku mushipiditu kubwanya kukukwasha namani?

⁷ Ubwanya kadi kuvudijija’ko buswe bobe ne kwikala mwine Kidishitu mutame, na kupwana na batutu ne bakaka batame ku mushipiditu mu kipwilo. Tala mobekadile na nsangaji. Kebealakanyangapo pa butyibi bobakwete bwa kwingidila Yehova. Wibepangule bakusapwile bintu byokebadi bemwene mu kwingidila Yehova. Kadi shi kudi butyibi bukatampe bokimba kukwata, wibalombe madingi. Vuluka’mba, bintu byendekanga “mu badingidi bavule.”​—Nki. 11:14.

8. Lelo i bika byobwanya kulonga shi utatananga binena Bible?

⁸ Talula kutatana. Monka mwanenenanga musango 2, Satana ukalonga bukomo bwa kukimba kukukankaja uleke kutama ku mushipiditu. Muswelo umo bidi wabwanya kulonga namino, i na kukulengeja wanze kutatana bufundiji kampanda bwa mu Bible. Kimfwa, pano nansha mwenda mafuku, bantu babwanya kukimba kukulengeja witabije lufundijo lufutulwija Leza lwa kwialamuna. Padi powakidi nkasampe, kwadipo ulangulukila pa luno lufundijo. Ino pano powatama, koivwananga padi bafundija luno lufundijo ku masomo. Bintu binena badimu bobe pa mwanda utala kwialamuna, bibwanya kumweka bu bya bine. Inoko, ye bano ke babandawile na katentekeji bukamoni bubingija’mba kudi Umpangi. Vuluka musoñanya udi mu Nkindi 18:17 unena’mba: “Mubajinji kunena mambo andi umwekanga bu mubinge, kufika ne bīya mukwabo wamujingulula.” Nanshi pa kyaba kya kwitabija bupofu milangwe yoivwana ku masomo amba i ya bine, bandaula na katentekeji bubine budi mu Bible, Kinenwa kya Leza. Longa bukimbi mu mabuku etu. Wisambe na batutu ne bakaka badi bakulupile mu kwialamuna pa kala. Wibepangule bakulombole i bika byebakulupije amba kudi Umpangi witusenswe. Ino mīsambo yūbaka, ibwanya kukukwasha ute mutyima ku bukamoni bubingija’mba kudi Umpangi.

9. Le i ñeni’ka yowaboila ku kimfwa kya Melissa?

⁹ Kaka umo witwa bu Melissa, wamwenine bininge mu bukimbi bwaalongele pa mutwe wa mwanda wisambila pa bupangi.b Unena’mba: “Ku masomo, banenanga myanda ya kwialamuna mu muswelo umweka’mba i ya bine. Dibajinji, nkyadipo nsaka kulonga bukimbi, mwanda nadi ntyina’mba nsa kujingulula’mba mulangwe wa kwialamuna i wa bine. Kupwa nanena’mba Yehova kasakengapo tumwingidile bupofu. Ebiya nashilula kulonga bukimbi. Natangile dibuku Y a-t-il un Créateur qui se soucie de vous ? ne boloshile La vie a-t-elle été créée ? ne Cinq questions à se poser sur l’origine de la vie. Bino ye bine byonadi nsakilwa. Nanenene amba, shi nalongele’byo nansha tamba kala.”

10-11. Le i bika bikakukwasha ukomene matompo? (1 Bene Tesalonika 4:3, 4)

¹⁰ Pela mwiendelejo mubi. Pa kusongola, bilokoloko bya kusambakena pamo bibwanya kuvudila’ko, kadi kyaba kimo bantu bakwabo babwanya kukuningila ulonge busekese. Bino ye bikusakila Satana kulonga. Ino le i bika bibwanya kukukwasha ukomene matompo? (Tanga 1 Bene Tesalonika 4:3, 4.) Polombela kwa bunka, sapwila Yehova mowiivwanina. Musapwile mwine mowiivwanina, kadi mulombe akupe bukomo. (Mat. 6:13) Vuluka’mba Yehova usakanga kukukwasha, ke kukutopekapo. (Ñim. 103:13, 14) Kadi ubwanya kukimba bukwashi mu Kinenwa kya Leza. Melissa, otwatelanga kala, wadi wikonda na kukomena milangwe ya disubi. Unena’mba: “Kutanga Bible difuku ne difuku, kwankweshe nkomene bilokoloko byami bibi. Kutanga Bible kwamvulwije amba ndi wa Yehova, ne amba nsakanga kumwingidila mu būmi bwami.”​—Ñim. 119:9.

¹¹ Kokakimba kupwija makambakano obe abe mwine. Lombola bambutwile makambakano owikonda nao. Shako kebipēlangapo kwisamba myanda itutala, inoko i kya mvubu kwibasapwila’mo. Melissa unena’mba: “Nalombēle Yehova ampe bukankamane, kupwa nasapwila’mo tata makambakano onadi nekonda nao. Pa kupwa kumusapwila’mo, natūkijibwe mutyima. Nayukile amba Yehova unsangedile.”

12. Le i muswelo’ka obwanya kukwata butyibi buyampe?

¹² Ludikwa na misoñanya ya mu Bible. Poenda utama, ukekala’ko bityebitye na bwanapabo bwa kukwata butyibi abe mwine. Inoko nansha nankyo, kwaikele na bwino buvule mu būmi. Le i muswelo’ka obwanya kwepuka bilubo bibwanya kona kipwano kyobe na Yehova? (Nki. 22:3) Kaka umo witwa bu Kari ushintulula byamukweshe akwate butyibi buyampe. Wajingulwile amba bene Kidishitu batame kebasakilwangapo bijila mu mwanda o-onso. Unena’mba: “Nadi nsakilwa kwivwanija misoñanya ya mu Bible pa kyaba’tu kya bijila.” Potanga Bible, wiipangule amba, ‘Le kino kisonekwa kinsapwila bika pa mumwena Yehova bintu? Lelo kidi na musoñanya ubwanya kunkwasha mu būmi? Shi i amo, le mbwanya kumwena’mo namani mu kwiulonda?’ (Ñim. 19:7; Isa. 48:17, 18) Shi utanga Bible ne kulangulukila pa misoñanya idi’mo, bikakupēlela kukwata butyibi busangaja Yehova. Kadi poenda utama ku mushipiditu, ukamona’mba kusakilwapo kijila mu mwanda o-onso, mwanda ukevwanija muswelo umona Yehova bintu.

13. Le balunda bayampe i bakukwashe namani? (Nkindi 13:20)

¹³ Tonga balunda basenswe Yehova. Monka motwanenenanga, bantu botonga kupwana nabo babwanya kukukwasha wikale mwine Kidishitu mutame. (Tanga Nkindi 13:20.) Kaka Sara wadi kajimija nsangaji yandi. Ebiya kwalongeka kintu kimo kyamukweshe ekale monka na nsangaji. Kaka Sara usekununa’mba: “Nasokwele balunda bayampe pa kitatyi kifwaninwe. Ami pamo ne kaka umo nkasampe, twadi twitana yenga ne yenga mwanda wa kwifunda Kiteba kya Mulami. Mulunda mukwabo wankweshe ñanze kulondolola ku kupwila. Pa mwanda wa bukwashi bwa balunda, nashilwile kwifunda pa kasuku ne kulombela bininge. Nashilwile kupwana bininge na Yehova ne kwikala monka na nsangaji.”

14. Le Julien wasokwele namani balunda bayampe?

¹⁴ Le i muswelo’ka obwanya kupwana na bantu babwanya kukukwasha? Julien, wingila pano bu mukulumpe unena’mba: “Ponadi nkasampe, napwene na balunda bayampe na kusapula nabo. Bano balunda badi bapyasakane, kadi bankweshe mone busapudi mobwikadile busangaja. Ebiya nashilula kwitungila kitungo kya kwingila mwingilo wa kitatyi kyonso. Kadi najingulwile amba nkyadipo na balunda bavule bayampe, mwanda nadi mpwana enka na bantu ba yami myaka. Mwenda mafuku, nasokola ne balunda bayampe ku Betele. Kimfwa kyabo kiyampe kyankweshe ñanze kutonga biyampe bintu bya kwipwija nabyo mukose, ne kino kyamfwenyenye pabwipi na Yehova.”

15. Le i kidyumu’ka kyobāpele Temote kudi Polo pa mwanda utala balunda? (2 Temote 2:20-22)

¹⁵ Le ukalonga namani shi ubajingulula’mba muntu kampanda mu kipwilo, ke muntupo muyampe kupwana nandi? Polo wāyukile amba bantu bamo mu kipwilo kya bwine Kidishitu mu myaka katwa kabajinji, kebādipo na mumweno muyampe wa ku mushipiditu. O mwanda wādyumwine Temote ekale kulampe nabo. (Tanga 2 Temote 2:20-22.) Kipwano kyetu na Yehova i kilēme. Ketufwaninwepo kuleka muntu nansha umo azozeje kipwano kyotupwene na Tata wetu wa mūlu, kine kyotwalongēle bukomo bukatampe.​—Ñim. 26:4.

LE KWITUNGILA BITUNGO KUBWANYA KUKUKWASHA NAMANI UTAME KU MUSHIPIDITU?

16. Le i bitungo bya muswelo’ka byofwaninwe kwitungila?

¹⁶ Witungile bitungo biyampe. Witungile bitungo bibwanya kukomeja lwitabijo lobe, ne kukukwasha wikale mwine Kidishitu mutame. (Ef. 3:16) Kimfwa, ubwanya kukwata butyibi bwa kulumbulula bibidiji byobe bya kwifunda pa kasuku ne kutanga Bible. (Ñim. 1:2, 3) Nansha padi ubwanya kumona’mba, usakilwa kulumbulula milombelo yobe ne misunsa yolombela. Padi kadi usakilwa kwikadila’ko na kwīfula mu muswelo otonga bya kwipwija nabyo mukose, nansha mu muswelo oingidija kitatyi. (Ef. 5:15, 16) Na bubine, Yehova ukasangala pakumona ulonga bukomo bwa kwendelela ku mushipiditu.

17. Le i nsangaji’ka yokamwena’mo shi ukwasha bantu bakwabo?

¹⁷ Ukekala mwine Kidishitu mutame shi ukwasha bantu bakwabo. Yesu wānenene amba: “Nsangaji ya kupāna itabukile ya kupebwa.” (Bil. 20:35) Ukamwena’mo bininge shi wingidija’ko kitatyi kyobe ne bukomo bobe bwa bunkasampe, mwanda wa kukwasha bantu bakwabo. Kimfwa, ubwanya kwitungila kitungo kya kukwasha banunu ne boba badi na bulema mu kipwilo. Ubwanya padi kukebapotela’ko bintu ku nsoko, nansha kwibakwasha’ko mwa kwingidijija bingidilwa bya busendwe. Shi wi tutu, witungile kitungo kya kwikala mwingidi wa mingilo mwanda wa kukwasha batutu ne bakaka. (Fid. 2:4) Kadi ulombolanga’mba usenswe bantu ba panja pa kipwilo, na kwibasapwila myanda miyampe ya Bulopwe. (Mat. 9:36, 37) Nanshi shi bibwanika, witungile kitungo kya kwingidila Yehova mu mwingilo wa kitatyi kyonso.

18. Le kwingila mu mwingilo wa kitatyi kyonso kubwanya kukukwasha namani utame ku mushipiditu?

¹⁸ Mwingilo wa kitatyi kyonso ubwanya kukupa mikenga mivule ya kwendelela ku mushipiditu. Kwingila bupania kubwanya kukushitwila kibelo kya kukafunda Masomo a Basapudi ba Bulopwe. Ubwanya kukengila ku Betele, nansha ku lūbako lwa mobo a kiteokratike. Kaka umo nkasampe witwa bu Kaitlyn unena’mba: “Kusapula na batutu ne bakaka ba bwino, kwankweshe bininge ntame ku mushipiditu pa kupwa kubatyijibwa. Kimfwa kyabo kyankweshe ntamije buyuki bwami bwa mu Bible, ne kulumbulula bwino bwami bwa kufundija.”

19. Le i madyese’ka okeselwa shi wendelele kutama ku mushipiditu?

¹⁹ Poenda utama ku mushipiditu, ukamwena’mo madyese mavule. Kukajimijapo bunkasampe bobe mu bintu bya bituputupu. (1 Yo. 2:17) Kukekalapo na misanshi itamba ku kukwata butyibi bubi. Ino ukekala na būmi buyampe kadi bwa nsangaji. (Nki. 16:3) Kimfwa kyobe kiyampe kikakankamika banabenu mu lwitabijo, bekale bankasampe nansha batame. (1 Tm. 4:12) Kadi kya mvubu kutabuka, ukekala na ndoe ne nsangaji itamba ku kusangaja Yehova, ne ku kwikala nandi mu kipwano kya mpwaninine.​—Nki. 23:15, 16.