‘Nangilai Nyeke mu Bubine’

1. Lelo tumwenanga namani mu kwīsambila pa muswelo otwayukile “bubine”?

“LELO wayukile bubine namani?” Bine kodi mulondolole kino kipangujo misunsa mivule. Kibadilwa mu bipangujo bibajinji byotwipangulanga batutu ne bakaka potusaka kwiyuka nabo senene. Tusangelanga kuteja batutu ne bakaka pobalombola mobayukile Yehova ne kumusanswa, kadi tusangelanga kwibalombola kine kyotusanshilwe bubine. (Loma 1:11) Ino mīsambo ituvulujanga’mba bubine i bulēme kotudi. Kadi po pene tusumininwanga ‘kunangila nyeke mu bubine’​—ko kunena’mba, kwiendeja mu muswelo ukalengeja Yehova etwesele ne kwitwitabija.​—3 Yo. 4.

2. Le i bika byotusa kwisambila’po mu kino kishinte?

² Mu kino kishinte, tusa kwisambila’mo pa bubinga bumobumo bwitulengeje tusanswe bubine. Kupwa tusa kwisambila’mo ne pa muswelo otubwanya kulombola nyeke amba, tusenswe kino kyabuntu kilēme. Kubandaula ino myanda, kukaningija mutyima wetu wa kufwija’ko Yehova pa byaalongele mwanda wa kwitukokela mu bubine. (Yoa. 6:44) Kadi kusa kwitulengeja tusake bininge kusapwila bantu bakwabo buno bubine.

KYOTUSANSHILWE “BUBINE”

3. Lelo i bubinga’ka bukatampe botusanshilwe bubine?

³ Kudi bubinga buvule botusanshilwe bubine. Inoko bubinga bukatampe, i mwanda tusenswe Yehova Leza, Nsulo ya buno bubine. Kupityila ku Kinenwa kyandi Bible, ketumuyukilepo enka bu Mulongi mwinē bukomo bonso wa diulu ne ntanda, ino i ne bu Tata wetu wa mūlu wa buswe, mwine witutele mutyima bya binebine. (1 Pe. 5:7) Tuyukile’mba Leza wetu i “wa lusa ne kanye, wija pa kukwatwa bulobo kadi muyule buswe bwa ndamatyidile ne bubine.” (Div. 34:6) Yehova usenswe boloke. (Isa. 61:8) Bimusansanga paetumona tususuka, kadi usakanga​—bine, udi na mēlu a kupwija masusu onso pa kitatyi kitungwe. (Yel. 29:11) I kya kutendelwa! Ke kya kutulumukapo shi tusenswe Yehova bininge!

4-5. Mwanda waka mutumibwa Polo wādingakenye lukulupilo lwetu na ñanga?

⁴ Le i bubinga’ka bukwabo botusanshilwe bubine? Bubine bwituletelanga byabuyabuya bivule. Tubandaulei’ko kyabuyabuya kimo. Mu bubine bwa mu Bible, mubadilwa ne lukulupilo lwetu lwa būmi bwa kumeso. Pa kwelekeja bulēme bwa luno lukulupilo, mutumibwa Polo wālembele’mba: “Tudi na luno lukulupilo pamo bwa ñanga wa muya wetu, lwa binebine kadi lushimate.” (Bah. 6:19) Pamo’nka bwa ñanga mwakwatyijijanga kyombo kileke kweja, ne lukulupilo lwetu lwimanine pa bubine bwa mu Bible nalo, lubwanya kwitukwasha twimanije kitatyi kyotwikonda na byamalwa mu būmi.

⁵ Pano Polo wādi wisambila pa lukulupilo lwa kwenda mūlu, lwine lusenswe bininge bene Kidishitu bashingwe māni. Inoko, bino binenwa bitala ne bene Kidishitu batengele kwikala’ko nyeke mu paladisa pano pa ntanda. (Yoa. 3:16) Bine, kwifunda myanda ya lukulupilo lwa būmi bwa nyeke, kwituletelanga nsangaji mu būmi.

6-7. Le Yvonne wamwenine namani mu kwifunda bubine butala pa būmi bwa kumeso?

⁶ Tubandaulei’ko kimfwa kya kaka umo witwa bu Yvonne. Uno kaka katamīnepo mu bubine, kadi paakidi nkasampe wadi utyina lufu. Uvuluka musemwa umo waatangile mwine wakēlwangapo nansha dimo, wadi unena’mba: “Difuku dimo, kekukekalapo dya kesha.” Uno kaka unena’mba: “Bino binenwa byadi binengeja ntunye kulāla, bufuku bonso nadi nangulukila’nka pa būmi bwa kumeso. Nadi nena’mba: ‘Buno’bu ke abopo būmi bonso. Le kine kyongikadile’ko i kika?’ Nkyadipo nsaka kufwa!”

⁷ Mwenda mafuku pa kusongola, Yvonne wetana na Batumoni ba Yehova. Unena’mba: “Nashilwile kwitabija’mba, mbwanya kwikala na lukulupilo lwa kukekala’ko nyeke mu Paladisa pano pa ntanda.” Le kwifunda bubine kwakweshe namani uno kaka? Ubweja’ko amba: “Nkikibulwengapo tulo bufuku mwanda wa kulangulukila pa būmi bwa kumeso nansha pa lufu.” Yvonne usenswe bubine bwa mu Bible, kadi usangelanga bininge kusapwila bantu bakwabo lukulupilo lwandi lwa būmi bwa kumeso.​—1 Tm. 4:16.

8-9. (a) Mu lukindi lumo lwa Yesu, le muntu umo wālombwele namani amba ukwete na bulēme kyabulēme kyaātene? (b) Le bubine budi na bulēme’ka kodi?

⁸ Mu bubine bwa mu Bible, mubadilwa ne myanda miyampe itala Bulopwe bwa Leza. Yesu wādingakenye bubine butala pa Bulopwe bwa Leza, na kyabulēme kifibwe. Wānenene mu Mateo 13:44 amba: “Bulopwe bwa mūlu budi pamo bwa kyabulēme kifibwe mu budimi, kyatene muntu wekifya; kadi pa mwanda wa nsangaji yandi, waenda kukapoteja bintu byonso byaadi nabyo wapota bobwa budimi.” Usa kumona’mba uno muntu kādipo ukimba kyabulēme. Inoko paēkitene, wāitabije kujimija bintu bivule mwanda wa kwikala nakyo. Wākapoteje bintu byonso byaādi nabyo. Mwanda waka? Mwanda wāyukile amba kyabulēme kyaātene’kya, kyādi na bulēme bukatampe. Kyādi na bulēme kutabuka bintu byonso byaāpoteje.

⁹ Lelo nobe ye momwenanga bubine? Bine ye mowibumwenanga! Tuyukile amba kekudipo kintu nansha kimo mu ino ntanda, kibwanya kudingakanibwa na nsangaji idi mu kwingidila Yehova pano, ne na lukulupilo lwetu lwa būmi bwa nyeke bwa mu mafuku a kumeso, mu buludiki bwa Bulopwe bwa Leza. Dyese dyotudi nadyo dya kwikala mu kipwano kya mpwaninine na Yehova, i ditabuke bintu byonso byotubwanya kwisuminwa. Nsangaji yetu mikatampe i ya “kumusangaja ne pa mfulo.”​—Kol. 1:10.

10-11. Le i bika byalengeje Michael ashinte būmi bwandi?

¹⁰ Bavule motudi besumīnwe bintu bivule mwanda wa kwitabijibwa na Yehova. Bamo balekele twaji twa ntumbo mu ino ntanda. Bakwabo balekele kulondalonda bupeta. Bakwabo nabo bashintyile shintē būmi bwabo pobefundile myanda ya Yehova. Bino byo byalongele Michael. Katamīnepo mu bubine. Pa busongwalume, wakafundile karate. Unena’mba: “Nadi nemona biyampe pa monadi ngikadile ku ngitu. Kyaba kimo, nadi nemona bu kekudipo ubwanya kunekenya.” Inoko pashilwile Michael kwifunda Bible, wayukile mumwenanga Yehova bya lūma. (Ñim. 11:5) Michael wisambila pa ba mulume ne mukaji badi befunda nandi amba: “Kebaunenenepo nansha dimo ndeke karate; abo baendelele’tu kumfundija bubine bwa mu Bible.”

¹¹ Michael paadi wenda uyukila’ko bivule padi Yehova, po pene wamusanshilwe’ko bininge. Watengelwe nakampata na lusa lwa Yehova pa batōtyi bandi. Mwenda mafuku, Michael wajingulula’mba ufwaninwe kukwata butyibi bwa kushinta būmi bwandi. Unena’mba: “Nayukile’mba kuleka karate, bwadi butyibi bukomo bonadi mfwaninwe kukwata. Inoko kadi nayukile amba kulonga namino kusa kusangaja Yehova. Kadi nakulupile’mba kumwingidila, i kutabuke kintu kyo-kyonso kyonadi wa kwisuminwa.” Michael wajingulwile’mba bubine bwaasokwele bwadi bulēme nakampata, o mwanda waitabije kushinta bininge būmi bwandi.​—Yak. 1:25.

12-13. Le bubine bwa mu Bible bwakweshe Mayli namani?

¹² Pa kulombola bulēme bwa bubine, Bible udingakanya bubine na kinanu kyeñenya mu mfindi. (Ñim. 119:105; Ef. 5:8) Mayli, wa mu Azerbaidja, wasangedile bininge muswelo wamukweshe Kinenwa kya Leza. Watamīne mu kisaka mwadi mitōtelo ibidi. Shandi wadi Mizilma, inandi nandi Muyuda. Unena’mba: “Nansha byonkyadipo ntatana kwikala’ko lwa Leza, inoko kwadi bipangujo byadi bimvutakanya ñeni. Nadi neipangula’mba, ‘Mwanda waka Leza wāpangile bantu? Ne mwanda waka bantu bamo bafwaninwe kususuka mu būmi bwabo bonso, kupwa kadi bakasusulwe mu kalunga-nyembo ka mudilo nyeke ne nyeke?’ Kadi bantu byobadi banena’mba byonso bitutana mu būmi i kiswa-mutyima kya Leza, nadi neipangula’mba, ‘Lelo Leza i muludiki wa bantu mwine usangelanga’tu kwibamona basusuka?’”

¹³ Mayli waendelele kukimba bilondololwa ku bipangujo byandi. Mwenda mafuku, waitabija kwifunda Bible, kupwa waikala ke Kamoni wa Yehova. Unena’mba: “Muswelo utulumukwa unena Bible bintu, washintyile bininge būmi bwami. Nshintulwilo ikulupilwa yonatene mu Kinenwa kya Leza, yandetēle ndoe ya mutyima.” Pamo bwa Mayli, batwe bonso tutendelanga Yehova, ‘Yewa wetwityile ku fukutu twende ku kitōkeji kyandi kya kutendelwa.’​—1 Pe. 2:9.

14. Le i muswelo’ka otukokeja kuningija buswe botusenswe bubine? (Tala ne kapango “Kudingakanya Kukwabo.”)

¹⁴ Bino i bimfwa’tu bityetye bilombola’mba bubine i bulēme nakampata. Ye uno ubavuluka’ko bantu bakwabo bavule. Le ubulwe’po mu kifundwa kyobe kya pa kasuku kwitungila kitungo kya kutanina’ko bubinga bukwabo botufwaninwe kusanshilwa bubine? Shi tusanswe bininge bubine, tukasokwela’ko miswelo mikwabo ya kulombola’mo motwibusanshilwe.

MUSWELO OTULOMBOLANGA AMBA TUSENSWE BUBINE

15. Le i muswelo’ka umo bidi otulombolanga’mba tusenswe bubine?

¹⁵ Tulombolanga’mba tusenswe bubine, na kwifunda kitatyi ne kitatyi Bible ne mabuku esambila pa Bible. Mwanda nansha shi ketudi beje mu bubine namani, tudi nyeke na bivule bya kufunda. Nimelo mibajinji ya dino dipepala yānenene amba: “Bubine budi pamo bwa diluba dityetye mu bukata bwa bukatakata bwa būmi, kadi dijokolokwe nansha kisengele dityinibwe na biyombo bityani bivwambile bya kilubo. Pa kwidisokola, tufwaninwe kwendelela kwidikimba. . . . Pa kwikala nadyo tufwaninwe kubandama ne kwidyapa. Kemwakiloelelwai’tu enka diluba dimo kete dya bubine. . . . Apai’dyo, kimbilai’ko nyeke dikwabo.” Kwifunda i mwingilo mukomo, inoko mudi kafwila-mudi’mo.

16. Le i manwa’ka a kwifunda omwene bu mayampe? (Nkindi 2:4-6)

¹⁶ Ke batwepo bonso basenswe kutanga ne kwifunda. Inoko Yehova witwita ‘tukimbe’nka kukimba’ ne ‘kukimbidila’ mwanda wa kwivwanija senene bubine. (Tanga Nkindi 2:4-6.) Potulonga bukomo bwa kukimba, tumwenanga’mo nyeke byabuyabuya. Corey unena pa butangi bwandi bwa Bible amba, utanga bidi mutyima pa vese umo, kupwa ke pa mukwabo. Ushintulula’mba: “Ntañanga byonso bilembelwe kunshi kwa dyani, natala mavese onso obatumine’ko, ne kulonga bukimbi. . . . Bine, mwenanga bininge mu butangi bwami na ano manwa.” Ekale twingidijanga ano manwa nansha manwa makwabo, tulombolanga’mba tusenswe bubine, shi twitūdila’ko kitatyi ne kulonga bukomo bwa kwifunda’bo.​—Ñim. 1:1-3.

17. Le kwiendeja mungya bubine kushintulula bika? (Yakoba 1:25)

¹⁷ Shako, tuyukile amba kwifunda’tu bubine ke kubwenepo. Pa kumwena’mo ne pa mfulo, tufwaninwe kwiendeja mungya bubine, ko kunena’mba, kwingidija mu būmi bwetu byotwifunda. Enka shi tulonge namino, po paketuletela bubine nsangaji ya binebine. (Tanga Yakoba 1:25.) Le i muswelo’ka otukokeja kuyuka’mba twiendejanga mungya bubine? Tutu umo unena’mba, i biyampe kubandaula būmi bwetu mwanda wa kumona shi twingidijanga byotwifunda, ne kumona i pepi potufwaninwe kwilumbulula. Mutumibwa Polo unena’byo mu uno muswelo amba: “Nansha shi tubaendelela namani, twendei nyeke kumeso mu ndudi mu uno muswelo umo onka.”​—Fid. 3:16.

18. Mwanda waka tufwaninwe kulonga bukomo bwa ‘kunangila nyeke mu bubine’?

¹⁸ Langulukila’po bidi pa byabuyabuya bidi mu kulonga bukomo bwetu bonso, mwanda wa ‘kunangila nyeke mu bubine’! Ketulumbululangapo’tu enka būmi bwetu kete, ino kadi tusangajanga Yehova ne banabetu mu lwitabijo. (Nki. 27:11; 3 Yo. 4) Buno bo bubinga bukatampe botusanshilwe bubine ne kwiendeja mungya bubine.