Mwa Kukwashisha Boba Bafundwilwe mu Kipwilo

1-2. (a) Lelo Yehova umonanga namani boba balonga bubi bukatampe ino kwisāsa mpika? (b) Le Yehova usakanga banonga-bibi balonge bika?

YEHOVA ke Lezapo wa kilomonyeka; aye ushikilwe bubi. (Ñim. 5:​4-6) Usakanga tulēmeke misoñanya yandi myoloke idi mu Kinenwa kyandi. Inoko Yehova uyukile amba twi ba kubulwa kubwaninina, o mwanda ketubwanyapo kumukōkela mu muswelo mubwaninine. (Ñim. 130:​3, 4) Inoko kadi katalengapo kilomonyeka ‘bantu bampikwa bwine Leza balamuna kanye kandi ka ku buntu bitupu ke kabepelo ka kwiendeja pampikwa bumvu.’ (Yude 4) O mwanda Bible wisambila pa “konakanibwa kwa bantu bampikwa bwine Leza” pa divita dya Leza dya Amakedona.—2 Pe. 3:7; Kus. 16:16.

² Inoko Yehova kasakengapo muntu nansha umo oneke. Monka motwamwenine’kyo mu bishinte bya mu kino Kiteba, Bible ulombola patōka’mba, Yehova “usaka bonso bafikile pa kwisāsa.” (2 Pe. 3:9) Bakulumpe bene Kidishitu beulanga Yehova pobakwasha na kitūkijetyima banonga-bibi bashinte mwiendelejo wabo ne kwaluja kipwano kyabo na Yehova. Inoko, ke banonga-bibipo bonso besāsanga. (Isa. 6:9) Bamo bendelelanga na mwiendelejo wabo mubi nansha shi bakulumpe abebakwasha misunsa mivule mwanda wa kwibafikija ku kwisāsa. Le bakulumpe bakalonga’po namani shi bidi uno muswelo?

“FUNDULAI MUNTU MUBI”

3. (a) Le Bible ulombola’mba i bika bifwaninwe kulonga shi kipya-mambo kesāshilepo? (b) Mwanda waka tubwanya kunena mu muswelo kampanda’mba nonga-bibi watonge kufundulwa mu kipwilo?

³ Shi nonga-bibi kesāshilepo, bakulumpe balondanga bulombodi butanwa mu 1 Bene Kodinda 5:13 bwa amba: “Fundulai muntu mubi mu bukata mwenu.” Mu muswelo kampanda, nonga-bibi watonge kino kimufikile; waangula kyaadi ukunine. (Ngt. 6:7) Mwanda waka tubwanya kunena namino? I mwanda nonga-bibi wapele kwisāsa nansha byalonga bakulumpe bukomo bwa kumukwasha misunsa mivule. (2 Ba. 17:​12-15) Bilongwa byandi bilombola’mba kasakilepo kukōkela mbila ya Yehova.—Kup. 30:​19, 20.

4. Mwanda waka kwelwanga musapu shi nonga-bibi wa kubulwa kwisāsa wafundulwa mu kipwilo?

⁴ Shi nonga-bibi wa kubulwa kwisāsa wafundulwa mu kipwilo, kwelwanga musapu wa kuyukija kipwilo amba kakidipo Kamoni wa Yehova.a Kitungo kya uno musapu ke kufwijapo bumvu nonga-bibi. Inoko, i kukwasha kipwilo kilonde kidyumu kya mu Bisonekwa kya ‘kuleka kupwana’ na uno muntu, enka ne ‘kuleka kudya nandi’ kwine. (1 Ko. 5:​9-11) Buno bulombodi i buletwe pa bubinga buyampe. Mutumibwa Polo wālembele amba: “Kiyujo kityetye kitatulanga mukama onso.” (1 Ko. 5:6) Banonga-bibi ba kubulwa kwisāsa babwanya kuzozeja kusumininwa kwa boba balonga bukomo bwa kwiendeja mungya misoñanya myoloke ya Yehova.—Nki. 13:20; 1 Ko. 15:33.

5. Le i muswelo’ka otufwaninwe kumona muntu ufundwilwe mu kipwilo, ne mwanda waka?

⁵ Le penepo, i muswelo’ka otufwaninwe kumona mwanetu mu lwitabijo ufundwilwe mu kipwilo? Nansha byoketubwanyapo kupwana nandi, tufwaninwe kumumona bu mukōko mujimine, ke bu dikala endelelapo. Mukōko usāsukile mu luombe ubwanya kujoka. Vuluka, uno mukōko mujimine wepēne ao mwine kudi Yehova. Kya bulanda, pano keukiendejepo mungya kwipāna kwao, ne kino kibeutūla mu kyaka. (Ezk. 18:31) Nansha nankyo, lusa lwa Yehova byolukidi konka, kudi lukulupilo lwa amba uno muntu ubwanya kujoka. Le bakulumpe balombolanga namani luno lukulupilo nansha ke na nonga-bibi ufundwilwe mu kipwilo?

MUSWELO UKWASHANGA BAKULUMPE BOBA BAFUNDWILWE

6. Le i bika bikalonga bakulumpe mwanda wa kukwasha yewa ufundwilwe mu kipwilo?

⁶ Shi muntu wafundulwa mu kipwilo, le bakulumpe balekanga kulonga bukomo bwa kumukwasha ajokele kudi Yehova? Aa! Komite wa bakulumpe palombola nonga-bibi wampikwa kwisāsa’mba wafundulwa mu kipwilo, ukamulombola ne byafwaninwe kulonga pa kujokela mu kipwilo. Inoko bakulumpe kebakemaninapo’nka papo. Pavule pene, bakalombola nonga-bibi amba baketana nandi monka pa kupwa kwa myeji mityetye mwanda wa kumona shi washinta mulangilo wandi. Shi nonga-bibi usakile kwitana nabo monka pa kupwa kwa myeji mityetye, bakulumpe bakamukankamika esāse ne kujoka mu kuno kwitana. Nansha shi ne papo pene kashintyilepo mulangilo wandi, bakulumpe bakalonga bukomo bwa kwitana nandi monka mwenda mafuku ne kumukankamika esāse.

7. Le bakulumpe bamwekejanga namani lusa lwa Yehova pobakwasha muntu ufundwilwe mu kipwilo? (Yelemia 3:12)

⁷ Bakulumpe baloñanga bukomo bwa kumwekeja lusa lwa Yehova pobakwasha muntu ufundwilwe mu kipwilo. Kimfwa, Yehova kāilaijepo bantu bandi ba kubulwa kikōkeji mu Isalela wa kala besāse bidi ebiya kaebakwasha. Aye wākwete’ko mulangwe wa kwibakwasha abo papo kebalombwele kilomboji nansha kimo kya kwisāsa. Monka motwamwenine’kyo mu kishinte kya bubidi kya mu bino bishinte, Yehova wāelekeje lusa lwandi na kulombola mupolofeto Hosea ajokeje wandi mukaji nansha byaādi ukyendelela kulonga bubi. (Hos. 3:1; Mal. 3:7) Bakulumpe byobeulanga Yehova, basakanga bya binebine nonga-bibi ajoke kadi kebalengejangapo bikale bikomo kwadi kujoka.—Tanga Yelemia 3:12.

8. Le kyelekejo kya Yesu kya mwana mujimine kitukwasha namani twivwanije mubaile lusa lwa Yehova? (Luka 15:7)

⁸ Vuluka kyelekejo kya Yesu kya mwana mujimine kīsambilwe’po mu kishinte kya bubidi kya mu bino bishinte. Shabana paāmwene wandi mwana ujokela ku njibo, “wanyema lubilo wakamupamba bīpa, kamufifye senene.” (Luka 15:20) Musa kumona’mba uno shabana kāilaijepo wandi mwana amulombe lusa. Inoko monka mulongelanga tata yense wa buswe, aye ye wākwete’ko mulangwe wa kumutundaila. Bakulumpe baloñanga bukomo bwa kumwekeja uno mwikadila ku boba basāsukile. Basakanga ino mikōko mijimine ijokele kudi Yehova. (Luka 15:​22-24, 32) Kwikalanga nsangaji mūlu ne pano pa ntanda pene kitatyi kijoka kipya-mambo!—Tanga Luka 15:7.

9. Le Yehova usakanga babipya-mambo balonge bika?

⁹ Tubamonenga ku ngalwilo amba Yehova kalekangapo boba kebasakepo kwisāsa bashale mu kipwilo. Inoko, wendelelanga kulonga bukomo bwa kwibakwasha. Usakanga bajoke. Muswelo wiivwananga Yehova pa banonga-bibi besāsa i mulombolwe mu Hosea 14:​4, amba: “Nkondapa kubulwa kikōkeji kwabo. Nkebasanswa na mutyima tō, mwanda bulobo bwami bubafunduka.” Bakulumpe byobayukile uno mwiivwanino wa Yehova, bakimbanga kushinta ko-konso kulombola’mba muntu washilula kwisāsa. Kadi bino binenwa bikulupija boba bonso bapalukile kudi Yehova amba wibasenswe kadi usakanga bajoke.

10-11. Le bakulumpe bakalonga namani bukomo bwa kukwasha boba bafundwilwe mu kipwilo mafuku kunyuma?

¹⁰ Le tunene namani pa boba bafundwilwe mu kipwilo mafuku kunyuma, padi pano ke papite myaka mivule? Padi bano bantu kebakiloñangapo bubi bwalengeje bafundulwe. Ku bamo, bikokejika padi kebakivulukangapo ne kine kyalengeje bafundulwe. Nansha shi bidi namani, bakulumpe bakalonga bukomo bwa kuyuka kutanwa bano bantu ne kwibapempula. Mu buno bupempudi, bakulumpe babwanya enka ne kulombela nabo ne kwibakankamika bajokele mu kipwilo. Shako, shi muntu wapangilwe pano kepadi myaka mivule, ubwanya kwikala muzoze bininge ku mushipiditu. O mwanda shi walombola’mba usakanga kujokela mu kipwilo, bakulumpe babwanya kukwata’ko mpangiko amba muntu amwendeje kifundwa kya Bible, nansha shi kajokejibwe. Inoko, bakulumpe bo bakatonga tutu nansha kaka wa kwifunda nandi Bible.

¹¹ Bakulumpe byobeulanga lusa lwa Yehova, baloñanga bukomo bwa kukimba bantu bavule ne kwibakwasha bayuke amba kibelo kya kujokela kudi Yehova i kibashitwilwe. Shi kipya-mambo walombola kwisāsa ne kuleka mwiendelejo wandi mubi, ubwanya kujokela mu kipwilo pampikwa kwija.—2 Ko. 2:​6-8.

12. (a) Le i mu myanda’ka mulomba bakulumpe kutadija bininge? (b) Mwanda waka ketufwaninwepo kumona’mba bubi kampanda bwa babipya-mambo kebubwanyapo nansha dimo kulekelwa na Yehova? (Tala ne kunshi kwa dyani.)

¹² Mu myanda imo, bakulumpe bafwaninwe kutadija bininge kumeso kwa kujokeja muntu. Kimfwa, shi muntu waonene mwana na busekese nansha mu miswelo mikwabo, i kapondo, nansha wakwete nkuku ya kufudija busongi bwabo, bakulumpe bakalonga bukomo bwa kuyuka shi muntu’wa i mwisāse bya binebine. (Mal. 2:14; 2 Tm. 3:6) Bafwaninwe kukinga luombe. Inoko tufwaninwe kuvuluka’mba Yehova uketabija monka nonga-bibi yense ulombola kwisāsa kwa binebine ne kuleka mwiendelejo wandi mubi. O mwanda nansha shi bakulumpe bafwaninwe kutadija bininge na boba balongēle bakwabo bintu na bundalandala, kebafwaninwepo kutabuka’byo kipimo na kunena’mba bubi kampanda bwa babipya-mambo kebubwanyapo nansha dimo kulekelwa na Yehova.b—1 Pe. 2:10.

BIBWANYA KULONGA’PO KIPWILO

13. Le i kwishila’ka kudi pa muswelo otwikalanga na muntu udingilwe na bakulumpe ne muntu ufundwilwe mu kipwilo?

¹³ Monka motwamwenine’kyo mu kishinte kibadikile, kyaba kimo kwelwanga musapu wa amba muntu kampanda wadingilwa. Shi kino kibalongeka, tubwanya kwendelela kupwana nandi na kuyuka’mba i mwisāse ne kuleka mwiendelejo wandi mubi. (1 Tm. 5:20) Ukidi wa mu kipwilo kadi usakilwa kukankamikwa na batutu ne bakaka pa kwendelela kulonga byobya byoloke. (Bah. 10:​24, 25) Inoko kudi kwishila na muntu ufundwilwe mu kipwilo. ‘Tulekanga kupwana nandi’ enka “ne kudya kwine na muntu wa uno muswelo.”—1 Ko. 5:11.

14. Le i muswelo’ka ubwanya bene Kidishitu kwingidija mutyima wabo wa mundamunda mufundijibwe na Bible mu muswelo obekele na boba bafundwilwe mu kipwilo? (Tala ne kifwatulo.)

¹⁴ Le myanda yotwabandaula ilombola’mba tufwaninwe kusūdidila muntu ufundwilwe mu kipwilo? Ke amopo. Na bubine ketufwaninwepo kupwana na uno muntu. Inoko bene Kidishitu babwanya kwingidija mutyima wabo wa mundamunda mufundijibwe na Bible pobakwata butyibi bwa kwita nansha kuleka kwita muntu ufundwilwe mu kipwilo āye atanwe ku kupwila—uno muntu ubwanya kwikala mubutule wabo nansha muntu obadi bapwene nandi kumeso kwa kufundulwa. Le bikekala namani shi watanwa’ko? Mafuku kunyuma ketwadipo twiimuna na uno muntu. Inoko ne pano pene, mwine Kidishitu yense ufwaninwe kwingidija mutyima wandi wa mundamunda mufundijibwe na Bible mu uno mwanda. Bamo babwanya kupēlelwa kwimuna nansha kutundaila uno muntu ku kupwila. Inoko ketufwaninwepo kwisamba nandi bilabila nansha kupityija nandi kitatyi mu myanda mikwabo.

15. Le i babipya-mambo ba muswelo’ka besambilwe’po mu 2 Yoano 9-11? (Tala ne kapango “Le ba Yoano ne Polo Bēsambīle pa Bubi bwa Muswelo Umo?”)

¹⁵ Bamo babwanya kwiipangula’mba, ‘Mwene Bible unena’mba mwine Kidishitu wimuna uno muntu weabila nandi mingilo yandi mibi?’ (Tanga 2 Yoano 9-11.) Myanda īsambilwe’po mu kino kisonekwa ilombola’mba buno bulombodi bwisambilanga pa batupondo ne boba bakankamika mwiendelejo mubi. (Kus. 2:20) Nanshi shi muntu ukankamika mfundijo ya batupondo nansha bilongwa bikwabo bibi, bakulumpe kebakakwata’kopo mpangiko ya kumupempula. Shako, uno muntu ubwanya kwisāsa. Inoko pākesāshile ketukamwimunapo nansha kumwita ku kupwila.

MUSWELO WA KWIULA LUSA LWA YEHOVA

16-17. (a) Le Yehova usakanga banonga-bibi balonge bika? (Ezekyele 18:32) (b) Le i muswelo’ka ubwanya bakulumpe kwingidila pamo na Yehova kitatyi kyobalonga bukomo bwa kukwasha banonga-bibi?

¹⁶ Le i bika byotwefunda mu bino bishinte bitano? Tubefunde’mo amba Yehova kasakilepo muntu nansha umo oneke! (Tanga Ezekyele 18:32.) Usaka babipya-mambo bapwane nandi monka. (2 Ko. 5:20) O mwanda mu bula bwa mānga, Yehova i mukankamike kyaba ne kyaba bantu bandi ba kubulwa kikōkeji—enka ne muntu wa pandi wa pandi—amba besāse ne kujokela kwadi. Bakulumpe pa kipwilo badi na dyese dya kwingidila pamo na Yehova pobalonga bukomo bwa kukwasha banonga-bibi bafikile ku kwisāsa.—Loma 2:4; 1 Ko. 3:9.

¹⁷ Fwatakanya’po nsangaji ikalanga mūlu kitatyi kīsāsa babipya-mambo! Tata wetu wa mūlu Yehova, usangalanga bininge kitatyi kyonso kijokela mukōko wandi mujimine mu kipwilo. Nanshi tuvudijijei’ko nyeke buswe botusenswe Yehova, potulangulukila pa lusa lwandi ne pa kanye kandi ka ku buntu bitupu.—Luka 1:78.