Mwanda Waka Mavita ne Bya Lūma Bikyendelela

BUBI

Leza wāpangile bambutwile betu babajinji ba Adama ne Eva, mu kimfwa kyandi. (Ngalwilo 1:27) Kino kishintulula amba mungya kipangila bādi babwanya kumwekeja ngikadila ya Leza pamo bwa ndoe ne buswe. (1 Bene Kodinda 14:33; 1 Yoano 4:8) Inoko ba Adama ne Eva bābudilwe kukōkela Leza, balonga bubi. Kino i kilengeje batwe bonso tupyane bubi ne lufu. (Bene Loma 5:12) Byotwāpyene buno bubi, o mwanda kitatyi ne kitatyi tubwanya kwikala na milangwe mibi mine ibwanya kwitutonona tulonge bintu bibi.—Ngalwilo 6:5; Mako 7:​21, 22.

IMBIKALO YA BANTU

Leza kētupangilepo mwanda wa twiludike batwe bene. Bible unena amba: “Muntu wenda kadipo na lupusa lwa kōlola ditabula dyandi.” (Yelemia 10:23) O mwanda imbikalo ya bantu keibwanyapo kupwija lonso mavita ne bya lūma.

SATANA NE BANDI BANDEMONA

Bible unena amba “ntanda yonsololo idi mu lupusa lwa yewa mubi.” (1 Yoano 5:19) “Yewa mubi” witwanga ne bu Satana Dyabola, kadi i ntapañani wa mu meso fututu. (Yoano 8:44) Aye ne bipangwa bikwabo bibi bya ku mushipiditu bo batulenga-byanzwe ba mavita ne bya lūma.—Kusokwelwa 12:​9, 12.