Iula Mulangilo wa Yehova ne Yesu

1-2. Le mu kusanswa Yehova mubadilwa bika ne bika, ne Yesu wālombwele namani amba usenswe Yehova na ñeni yandi yonso?

YESU wālombwele mbila mikatampe mu bijila bya Leza paānenene amba: “Sanswa Yehova Leza obe na mutyima obe onso, na muya obe onso, na bukomo bobe bonso, ne na ñeni yobe yonso.” (Luka 10:27) O mwanda tusenswe Yehova na bintu byonso byotudi nabyo ne mwine motwikadile, muno mubadilwa bya kusakasaka byetu, malango etu ne bukomo bwetu. Kadi mubadilwa ne muswelo otwingidija ñeni yetu. Shako, ketubwanyapo kwivwanija ne pa mfulo mulangilo wa Yehova. Inoko tubwanya kwivwanija senene mulangilo wa Leza na kwifunda “ñeni ya Kidishitu,” mwanda Yesu wāmwekeje mu muswelo mubwaninine mulangilo wa Shandi.—1 Ko. 2:16.

² Yesu wādi usenswe Yehova na ñeni yandi yonso. Wādi uyukile kiswa-mutyima kya Leza pādi, kadi wādi usumininwe kulonga bintu kukwatañana nakyo, nansha shi kulonga namino kwādi kwa kumulengeja asusuke. Yesu byaātele mutyima ku kulonga kiswa-mutyima kya Shandi, kālekelepo kintu nansha kimo kimulabike ku kino kitungo.

3. Le i bika byēfundile mutumibwa Petelo kudi Yesu, ne i bika byaākankamikile banababo bene Kidishitu kulonga? (1 Petelo 4:1)

³ Petelo ne batumibwa bakwabo bādi na dyese dya kupityija kitatyi pamo na Yesu ne kwifunda muswelo waādi ulanga. Petelo paālembele mukanda wandi umbajinji wa ku bukomo bwa mushipiditu, wākankamikile bene Kidishitu belumbile mulangilo umo onka na wa Kidishitu. (Tanga 1 Petelo 4:1.) Petelo wāingidije kishima kya basola pawālembele amba: “Mwilumbilei.” Nanshi shi bene Kidishitu beula mulangilo wa Yesu, bakelumbila kyabulwi kikomo mu divita dyobalwa na bya kusakasaka bibi ne na ntanda yendejibwa na Satana.—2 Ko. 10:​3-5; Ef. 6:12.

4. Le i bika byotusa kubandaula mu kino kishinte?

⁴ Tusa kubandaula mulangilo wa Yesu ne muswelo otubwanya kwiwiula. Kupityila ku kimfwa kyandi, tusa kumona (1) muswelo otubwanya kwiula mulangilo wa Yehova, mwine uketukwasha batwe bonso tulange bimo, (2) muswelo otubwanya kwikala betyepeje, ne (3) muswelo otubwanya kwikala na ñeni mibwane ne kukulupila mudi Yehova na kulombela kwadi.

IULA MULANGILO WA YEHOVA

5. Le Petelo wākomenwe namani kitatyi kimo kumwekeja mulangilo wa Yehova?

⁵ Tubandaulei’ko kitatyi kimo kekyāmwekejepo Petelo mulangilo wa Yehova mu myanda imo. Yesu wāsapwidile batumibwa bandi amba usa kwenda ku Yelusalema, kwine’kwa, ukapānwa ku bendeji ba bipwilo, kususulwa, ne kwipaibwa. (Mat. 16:21) Ye bino byākomene Petelo kwitabija’mba Yehova ukaleka Yesu, lukulupilo lwine lwa Isalela ne Meshiasa wālailwe, epaibwe. (Mat. 16:16) O mwanda Petelo wākokēle Yesu kufula ne kumunena’mba: “A Mfumwetu, wididile’ko lusa; kino kekikakufikilapo nansha dimo.” (Mat. 16:22) Petelo byakāmwekejepo mulangilo wa Yehova mu uno mwanda, kālangilepo bimo na Yesu.

6. Le Yesu wālombwele namani amba mulangilo wandi ukwatañene na wa Yehova?

⁶ Mulangilo wa Yesu wādi ukwatañene potō na wa Tata wandi wa mūlu. Yesu wālombwele Petelo amba: “Jokela mu nyuma, abe Satana! Wi kikukaja kondi mwanda abe ulañanga milangwe ya bantu ke milangwepo ya Leza.” (Mat. 16:23) Yesu wādi uyukile amba pa kulonga kiswa-mutyima kya Yehova, wādi unenwe kususuka ne kufwa. O mwanda wāpelele madingi a Petelo, nansha Petelo byaādi ukimba padi kumukwasha. Petelo wēfundile ku uno mwanda ñeni ya amba ufwaninwe kwikala na mulangilo na wa Leza. Ino i ñeni ya mvubu yotubwanya netu kuboila’ko.

7. Le Petelo wālombwele namani mwenda mafuku amba usakanga kwikala na mulangilo na wa Yehova? (Tala kifwatulo .)

⁷ Mwenda mafuku, Petelo wālombwele amba usakanga kwikala na mulangilo na wa Yehova. Kitatyi kyābwene kya bantu bampikwa kutwejibwa kwisao kubadilwa mu bantu ba Yehova. Petelo wāpelwe mwingilo wa kusapwila Konilusa, muntu wa mu mizo, mwine wābadīlwe mu kisumpi kibajinji kya bantu ba mu mizo bāikele ke bene Kidishitu. Bayuda kebādipo bapwene na bantu ba mu mizo, o mwanda Petelo wādi ufwaninwe kujadika mulangilo wandi mwanda wa kusapwila bano bantu. Petelo paājingulwile kiswa-mutyima kya Leza mu uno mwanda, wāshintyile mumweno wandi. O mwanda paātuminwe’ko, wāendele “kwampikwa nansha kushishikita kwine.” (Bil. 10:​28, 29) Wāsapwidile Konilusa ne ba mu yandi njibo, nabo bābatyijibwa.—Bil. 10:​21-23, 34, 35, 44-48.

8. Le i muswelo’ka otubwanya kulombola’mba mulangilo wetu i mukwatañane na wa Yehova? (1 Petelo 3:8 ne kunshi kwa dyani)

⁸ Myaka pa kupita’po, Petelo wākankamikile banababo bene Kidishitu amba, “Langai bimo.” (Tanga 1 Petelo 3:8 ne kunshi kwa dyani.) Batwe bantu ba Yehova tubwanya kwikala na mulangilo umo na batutu ne bakaka shi twiula mulangilo wa Yehova, mwine ulombwelwe mu Kinenwa kyandi. Kimfwa, Yesu wākankamikile balondi bandi babadikije tumweno twa Bulopwe pa kifuko kibajinji mu bwabo būmi. (Mat. 6:33) Na uno mulangwe mu ñeni, tutu nansha kaka mu kyenu kipwilo ubwanya kukwata mulangwe wa kudinga fomu wa mwingilo wa kitatyi kyonso. Pa kyaba kya kumulombola edidile lusa, tufwaninwe kumukankamika ne kumukwatakanya.

IKALA MWITYEPEJE

9-10. Le Yesu wālombwele namani kwityepeja mu muswelo utendelwa?

⁹ Bufuku bubadikila lufu lwandi, Yesu wāfundije Petelo ne batumibwa bakwabo bufundiji bwa kamweno butala kwityepeja. Kitatyi kityetye kunyuma, Yesu wātumine Petelo ne Yoano bakateakanye bintu mwa kudīla nabo byakudya bya mfulo kumeso kwa aye kufwa. Bintu bimo bidi byobālongele padi i kuteakanya kyoilo ne bipeta bya bisandi amba boba betyilwe’ko boijibwe ku maulu. Ino le i ani wādi wa kwityepeja ne koija bakwabo ku maulu pābwene kitatyi?

¹⁰ Yesu wālombwele bukidi bonka kwityepeja mu muswelo utendelwa. Batumibwa ye bano bātulumukile pa kumona Yesu ulonga kintu kiloñwanga divule na mwingidi. Yesu wātalula bivwalwa byandi bya pangala, wēkuta kipeta mu kifuka, wāela mema mu kyoilo, ne kushilula kwiboija ku maulu. (Yoa. 13:​4, 5) Ye bino byālombele kitatyi pa koija batumibwa bonso 12 ku maulu—kubadila’mo ne Yudasa, mwine wādi wa kumwaba. Nansha nankyo, Yesu wāingile uno mwingilo onso na kwityepeja. Kupwa Yesu wēbashintulwila na kitūkijetyima amba: “Le mubaivwanija byonemulonga’bi? Mungitanga bu ‘Mufundiji,’ ne bu ‘Mfumwetu,’ mudi na bubinga, mwanda e byondi. Penepo shi ami Mfumwenu kadi Mufundiji, nemoija ku maulu, nenu mufwaninwe kwioija ku maulu banwe bene na bene.”—Yoa. 13:​12-14.

11. Le Petelo wālombwele namani amba wēfundile kwityepeja? (1 Petelo 5:5) (Tala ne kifwatulo.)

¹¹ Petelo wāboile ñeni ku kwityepeja kwa Yesu. Yesu pa kupwa kujokela mūlu, Petelo wālongele kingelengele kya kubelula muntu umo wādi kilema tamba kubutulwa kwandi. (Bil. 1:​8, 9; 3:​2, 6-8) Kino kilongwa kyātulumwije kibumbo kya bantu. (Bil. 3:11) Inoko Petelo kāsakilepo bantu bamutumbije nansha byaātamīne mu kifuko mwādi musenswe bantu ntumbo ne bitenta. Aye wētyepeje na kusapwila bantu batumbije Yehova ne Yesu na kunena’mba: “Uno muntu omumwene’u ne omuyukile wakomejibwa mu dijina [dya Yesu], ne na lwitabijo lwetu mu dijina dyandi.” (Bil. 3:​12-16) Binenwa byāingidije Petelo mu mukanda waālembēle bene Kidishitu pa mwanda utala kamweno kadi mu kwityepeja, bibwanya kwituvuluja kitatyi kyēkutyile Yesu kipēta mu kifuka ne koija batumibwa ku maulu.—Tanga 1 Petelo 5:5.

12. Le i muswelo’ka otubwanya kwiula kimfwa kya Petelo mu mwanda utala kwityepeja?

¹² Tubwanya kwiula kimfwa kya Petelo na kutamija kwityepeja. Muntu mwityepeje kemaninangapo’tu pa kunena bintu bilombola’mba i mwityepeje. Mu kishima kingidije Petelo kyalamwinwe bu kwityepeja, mubadilwa ne milangwe yetu ya munda—“mutyima wa kwipēleka.” Twingidilanga bakwetu mwanda tusenswe Yehova ne bantu, ino ke pa mwandapo wa kusanswa kutendelwa. Shi twingidila Yehova na nsangaji mungya bukomo bwetu, ekale byotulonga bimonwe nansha kebimwenwepo, nabya tulombolanga’mba twi betyepeje.—Mat. 6:​1-4.

IKALA NA “ÑENI MIBWANE”

13. Le kwikala na “ñeni mibwane” kushintulula bika?

¹³ Le kwikala na “ñeni mibwane” kushintulula bika? (1 Pe. 4:7) Mwine Kidishitu wa ñeni mibwane uloñanga bukomo bwandi bonso bwa kukwata butyibi buyampe bukwatañene na mulangilo wa Yehova. Uno mwine Kidishitu uyukile amba kekudipo kintu nansha kimo mu būmi kidi na mvubu kutabuka kipwano kyandi na Yehova. Wimonanga na bujalale kadi uyukile amba kayukilepo bintu byonso. Ne kadi, ulombolanga’mba ukulupile mudi Leza na kumufwena kitatyi ne kitatyi mu milombelo na kwityepeja.a

14. Le Petelo wākomenwe namani kukulupila kitatyi kimo mudi Yehova?

¹⁴ Mu bufuku bubadikila lufu lwandi, Yesu wādyumwine bandi bana ba bwanga’mba: “Banwe bonso musa kukukala pa mwanda wami buno bufuku’bu.” Ino Petelo wālondolola na kwikulupila’mba: “Nansha bonso abakukala pa mwanda obe, ami nkikakukalapo nansha dimo!” Mu bwine bufuku’bwa, Yesu wādingila bandi bana ba bwanga bamo amba: “Keshai’nka kukesha ne kulombela kyaba kyonso.” (Mat. 26:​31, 33, 41) Shi Petelo wālondele ano madingi, padi wādi wa kwikala na bukomo bwa kunena’mba i mwanā bwanga wa Yesu. Inoko, Petelo wētopekele bininge pa kutuna Mfumwandi.—Mat. 26:​69-75.

15. Le Yesu wālamine namani ñeni mibwane mu bufuku bwandi bwa mfulo pano pa ntanda?

¹⁵ Yesu wādi ukulupile bininge mudi Yehova. Nansha byaādi mubwaninine, wādi ulombela kudi Yehova kitatyi ne kitatyi. Kino kyāmupele bukankamane bwa kulonga byobya byādi bimusakila Yehova kulonga. (Mat. 26:​39, 42, 44; Yoa. 18:​4, 5) Na bubine, Petelo kāidilwepo nansha dimo amba Yesu wālombele misunsa mivule mu bufuku bukya kafu.

16. Le Petelo wālombwele namani amba wāikele na ñeni mibwane? (1 Petelo 4:7)

¹⁶ Mwenda mafuku, Petelo wākulupile bininge mudi Yehova na kulombela kwadi. Yesu musanguke wākulupije Petelo ne batumibwa bakwabo amba bakatambula mushipiditu ujila mwanda wa kwibakwasha bavuije ne pa mfulo mwingilo wa busapudi. Inoko, Yesu wēbalombwele belaije mu Yelusalema kufika ne byobatambula mushipiditu ujila. (Luka 24:49; Bil. 1:​4, 5) Le i bika byālongele Petelo paādi wilaija? Petelo ne banababo bene Kidishitu “batakamene mu milombelo.” (Bil. 1:​13, 14) Mwenda mafuku, mu mukanda wandi umbajinji, Petelo wākankamikile’mo banababo bene Kidishitu bekale na ñeni mibwane ne kukulupila mudi Yehova na kulombela kwadi. (Tanga 1 Petelo 4:7.) Petelo wēfundile kukulupila mudi Yehova, kadi wākomeje bininge banababo mu lwitabijo.—Ngt. 2:9.

17. Nansha shi tudi na bwino kampanda bwa kibutwila, le i bika byotufwaninwe kwendelela kulonga? (Tala ne kifwatulo.)

¹⁷ Pa kwikala na ñeni mibwane, tufwaninwe kufwena Yehova mu milombelo kitatyi ne kitatyi. Twi bajingulule amba tufwaninwe kwendelela kulombela kudi Yehova nansha shi tudi na bwino kampanda bwa kibutwila. O mwanda, kitatyi kyotudi na butyibi bukatampe bwa kukwata, po pene potulombanga Yehova etuludike koku tukulupile amba uyukile byobya bya mvubu kotudi.

18. Le ubasumininwa kulonga bika?

¹⁸ Bine tufwija’ko Yehova pa kwitupanga mu muswelo otubwanya kumwekeja ngikadila yandi. (Ngo. 1:26) Shako, ketubwanyapo kwiula Yehova mu muswelo mubwaninine. (Isa. 55:9) Inoko pamo bwa Petelo, tubwanya kukwatañenya’ko bininge mulangilo wetu na wa Yehova. Nanshi sumininwa kwendelela kwiula mulangilo wa Leza, ikala mwityepeje, kadi ikala na ñeni mibwane.