Kwasha Bowifundanga Nabo Bible Bakwate Butyibi bwa Kwingidila Yehova

1-2. (a) Mwanda waka bantu bamo botwifundanga nabo Bible bekakanga pa kukwata butyibi bwa kwingidila Yehova? (b) Le i bika byotusa kubandaula mu kino kishinte?

LELO wadi wikaka pa kwikala Kamoni wa Yehova? Padi wakwetwe moyo amba shi wikale Kamoni wa Yehova, bengidi-nobe, balunda nobe, nansha bantu ba mu kyobe kisaka babwanya kukulobela. Nansha padi wadi ulanga’mba, kukabwanyapo kwiendeja mungya misoñanya ya Leza. Shi ye mowadi ulangila, witūle pa kyaba kya bowifundanga nabo Bible bekaka pa kukwata butyibi bwa kwingidila Yehova.

² Yesu wāyukile amba uno moyo ubwanya kulengeja bantu bakomenwe kwingidila Yehova. (Mat. 13:​20-22) Inoko kālekelepo kukwasha boba bādi bekaka kumulonda. Wālombwele bandi bana ba bwanga muswelo wa kukwasha bano bantu (1) bajingulule bijika bibakankaja kwendelela, (2) baningije buswe bobasenswe Yehova, (3) babadikije bintu bya ku mushipiditu, ne (4) bakomene bikoleja. Le i muswelo’ka otubwanya kwingidija byobya byāsapwidile Yesu bandi bana ba bwanga kitatyi kyotwingidija dibuku Ikala Mūmi Nyeke! mwanda wa kukwasha botwifundanga nabo Bible bakwate butyibi bwa kwingidila Yehova?

KWASHA OWIFUNDANGA NANDI BIBLE AJINGULULE BIJIKA BIMUKANKAJA KWENDELELA

3. Le i bika padi byākankeje Nikodema kwikala mulondi wa Yesu?

³ Nikodema byaādi mwendeji mutumbe wa Bayuda, kino kyāikele bu kikoleja kimukankaja kwikala mulondi wa Yesu. Myeji’tu isamba pa kupita’po na pāshilwile Yesu mwingilo wandi, Nikodema wājingulwile amba Yesu i mutumwe na Leza. (Yoa. 3:​1, 2) Inoko Nikodema wātongele kwitana na Yesu mu bufyafya ‘mwanda wādi utyina Bayuda.’ (Yoa. 7:13; 12:42) Ye uno wādi ulanga’mba shi ekale mwanā bwanga wa Yesu, usa kujimija kitenta kyandi.a

4. Le Yesu wākweshe namani Nikodema evwanije byādi bimusakila Leza kulonga?

⁴ Nikodema wādi uyukile Bijila, nansha nankyo wādi usakilwa kukwashibwa mwanda wa kuyuka byādi bimusakila Yehova kulonga. Le Yesu wāmukweshe namani? Yesu wādi upāna kyandi kitatyi, o mwanda wāitabije enka ne kwitūdila’ko kitatyi mwanda wa kwisamba na Nikodema bufuku. Kadi Yesu wāsapwidile Nikodema patōkelela bintu byaādi unenwe kulonga pa kwikala wandi mwanā bwanga: Kwisāsa bubi bwandi, kubatyijibwa mu mema, ne kulombola lwitabijo mudi Mwanā Leza.—Yoa. 3:​5, 14-21.

5. Le i muswelo’ka otubwanya kukwasha otwifundanga nandi Bible ajingulule bintu bimukankaja kwendelela?

⁵ Nansha shi muntu owifundanga nandi Bible wivwanije senene Bisonekwa, ubwanya kusakilwa kukwashibwa mwanda wa ajingulule bintu bimukankaja kwendelela. Kimfwa, kandi kaji, nansha kulwibwa na ba mu kisaka kubwanya kumulengeja akomenwe kwikala Kamoni wa Yehova. Nanshi witūdile’ko kitatyi kya kukwasha owifundanga nandi Bible. Ubwanya kumwita mudye nandi twakudya nansha kwinangija nandi. Mu bitatyi pamo bwa bino, ubwanya kupelelwa kukusapwila makambakano aekonda nao mwanda wa nobe umone muswelo wa kumukwasha. Mukankamike ashinte popa ponso pasakilwa kushinta, ke pa mwandapo wa kukusangaja, ino i pa mwanda wa kulombola buswe bwasenswe Yehova.

6. Le i muswelo’ka obwanya kukwasha owifundanga nandi Bible akwate butyibi bwa kwingidila Yehova? (1 Bene Kodinda 16:13)

⁶ Shi owifundanga nandi Bible ukulupile amba Yehova ukamukwasha eendeje mungya misoñanya ya mu Bible, ukekala na bukankamane bwa kwingidija byaefunda. (Tanga 1 Bene Kodinda 16:13.) Mwingilo obe ubwanya kudingakanibwa na wa mwadimu wa ku masomo. Le kitatyi kyowadi ufunda i mwadimu’ka owadi usenswe bininge? Na bubine i mwadimu wadi ukukwasha na kitūkijetyima mwanda wa ukulupile amba udi na ñeni. Mo monka ne mwadimu muyampe wa Bible nandi, kalombolangapo waefundanga nandi enka bintu bimusakila Yehova kulonga, ino umukulupijanga’mba na bukwashi bwa Yehova ubwanya kushinta būmi bwandi. Le nobe i muswelo’ka obwanya kulonga namino?

KWASHA OWIFUNDANGA NANDI BIBLE ANINGIJE BUSWE BWASENSWE YEHOVA

7. Le Yesu wākweshe namani boba bādi bamuteja baningije buswe bobādi basenswe Yehova?

⁷ Yesu wādi uyukile amba shi bandi bana ba bwanga basanswe Leza bakengidija byobefunda. Divule wādi ufundija bintu byādi bibwanya kukwasha bandi bana ba bwanga baningije buswe bobasenswe Tata wabo wa mūlu. Kimfwa, wādingakenye Yehova na muntu upa bandi bana bintu biyampe. (Mat. 7:​9-11) Padi bamo mu boba bādi bateja Yesu kebādipo na bashabo bebasenswe. Fwatakanya’po padi mobēivwanine pāletele Yesu kyelekejo kya tata wa lusa utundaila wandi mwana wādi wiendeja bibi kupwa wājoka. Kino kyelekejo kyēbakweshe bevwanije amba Yehova wivwaninanga lusa bandi bana ba pano pa ntanda.—Luka 15:​20-24.

8. Le i muswelo’ka obwanya kukwasha owifundanga nandi Bible aningijije’ko buswe bwasenswe Yehova?

⁸ Nobe ubwanya kukwasha owifundanga nandi Bible aningijije’ko buswe bwasenswe Yehova na kwisambila pa ngikadila ya Leza kitatyi kyomwifunda. Kitatyi kyonso kyomwifunda, mukwashe amone kukwatañana kudi pa byaefunda na buswe bumusenswe Yehova. Kitatyi kyomwisambila pa kinkūlwa, mukwashe evwanije mumusanshilwe Yehova. (Loma 5:8; 1 Yo. 4:10) Muntu owifundanga nandi Bible ukasanswa Yehova shi ulangulukila pa buswe bumusenswe Yehova.—Ngt. 2:20.

9. Le i bika byakweshe mwana-mulume umo witwa bu Michael ashinte būmi bwandi?

⁹ Tubandaulei’ko kimfwa kya Michael, wa mu Indonezi. Watamīne mu kisaka kya Batumoni, inoko kabatyijibwepo. Aye pa kubwanya myaka 18, wavilukila mu ntanda ya bweni mwanda wa kukengila bu shofele. Mwenda mafuku wajokela mu Indonezi mwanda wa kusonga. Kupwa washiya kyandi kisaka mu yabo ntanda mwanda wa kwendeleja kandi kaji mu ntanda ya bweni. Mu kine kitatyi’kya, wandi mukaji ne wabo mwana mwana-mukaji bashilula kwifunda Bible, kadi baendelela senene. Inandi pa kufwa, Michael wakwata butyibi bwa kujokela kwabo mwanda wa kukwatakanya shandi, kadi waitabija ne kwifunda Bible. Pobefundile kipindi “Languluka Bininge” mu kifundwa 27 mu dibuku Ikala Mūmi Nyeke!, Michael watengelwe bininge. Paadi ulangulukila pa muswelo wēivwene Yehova pa kumona wandi Mwana Yesu ususuka, Michael wasūmije’nka ne impolo. Waningijije’ko mutyima wandi wa kufwija’ko ne kino kyamulengeje ashinte būmi bwandi ne kubatyijibwa.

KWASHA OWIFUNDANGA NANDI BIBLE ABADIKIJE BINTU BYA KU MUSHIPIDITU

10. Le Yesu wākweshe namani bandi bana ba bwanga babadikije bintu bya ku mushipiditu? (Luka 5:​5-11) (Tala ne kifwatulo.)

¹⁰ Bana ba bwanga bājingulwile bukidi bonka’mba Yesu ye Meshiasa wālailwe. Nansha nankyo, bādi basakilwa kukwashibwa pa kusaka’mba babadikije bintu bya ku mushipiditu. Ba Petelo ne Andele bādi kebashilule kulonda Yesu mu bula bwa kitatyi kampanda na paēbetyile bekale balondi bandi nyeke. (Mat. 4:​18, 19) Bādi bengila mwingilo wa buluwe mwine obādi bengila padi na ba Yakoba ne Yoano. (Mako 1:​16-20) Ba Petelo ne Andele pobākwete butyibi bwa ‘kushiya makonde abo’ mwanda wa kulonda Yesu, bākwete’ko mpangiko ya mwa kukwatakenya byabo bisaka. Le i bika byēbakweshe babadikije bintu bya ku mushipiditu? Nsekununi ya Luka i tusapwila’mba Yesu wālongele kingelengele kyāningije kikulupiji kyabo kya amba Yehova ukavuija bisakibwa byabo.—Tanga Luka 5:​5-11.

11. Le i muswelo’ka otubwanya kwingidija myanda yotwimwenine mu būmi pa kuningija lwitabijo lwa yewa otwifundanga nandi Bible?

¹¹ Ketubwanyapo kulonga bingelengele na mwālongele’byo Yesu, inoko tubwanya kushintulwila otwifundanga nandi Bible bintu byotwimwenine mu būmi mwanda wa kumulombola muswelo ukwatakanyanga Yehova boba bamutūla pa kifuko kibajinji mu bwabo būmi. Kimfwa, le ubavuluka muswelo wakukweshe Yehova kitatyi kyowashilwile kutanwa ku kupwila? Padi byakulombele kwitana na mukulu obe wa kaji ne kumushintulwila’mba kukekalapo wingila mansá a ntentekelo shi kaji kekedye mponye na mpangiko ya kupwila. Poshintulwila owifundanga nandi myanda yowimwenine mu būmi, mulombole muswelo waningile lwitabijo lobe na kumona mwakukwatakeninye Yehova kitatyi kyowakwete butyibi bwa kutūla tumweno twa Bulopwe pa kifuko kibajinji.

12. (a) Mwanda waka tufwaninwe kusela basapudi beshileshile potwendeja kifundwa kya Bible? (b) Le i muswelo’ka obwanya kwingidija mavideo pa kufundija owifundanga nandi Bible atūle tumweno twa Bulopwe pa kifuko kibajinji? Leta kimfwa.

¹² Kadi owifundanga nandi Bible ubwanya kumwena’mo kitatyi kyaivwana batutu ne bakaka bamushintulwila mobashintyile bintu kampanda mu bwabo būmi mwanda wa kutūla tumweno twa Bulopwe pa kifuko kibajinji. Nanshi ita’ko batutu ne bakaka ba bitamina bishileshile batanwe’po kitatyi kyomwifunda. Wibalombole bashintulule mobatwelele mu bubine ne byobalongele pa kutūla mwingilo wa Yehova pa kifuko kibajinji mu bwabo būmi. Mwitūdilei’ko kitatyi na omwifundanga nandi Bible, mwanda wa kutala mavideo adi mu kipindi “Languluka Bininge” nansha “Kimba” mu dibuku Ikala Mūmi Nyeke! Kimfwa, kitatyi kyomwisambila pa kifundwa 37, ubwanya kukomeneja misoñanya idi mu video inena’mba, Yehova Ukavuija Bisakibwa Byetu.

KWASHA OWIFUNDANGA NANDI BIBLE AKOMENE BIKOLEJA

13. Le Yesu wāteakenye namani bandi bana ba bwanga ku kupangwapangwa?

¹³ Yesu wāsapwidile balondi bandi misunsa mivule amba, bakapangwapangwa na bantu bakwabo enka ne na bantu ba mu byabo bisaka. (Mat. 5:11; 10:​22, 36) Dya ku mfulo kwa mwingilo wandi, Yesu wādyumwine bandi bana ba bwanga’mba babwanya enka ne kwipaibwa pa mwanda wa kutōta kobatōta Yehova. (Mat. 24:9; Yoa. 15:20; 16:2) Wēbakankamikile bekale badyumuke kitatyi kyobavuija mwingilo wabo. Wēbadingile baleke kulwa na boba bebapangapanga ne kwikala badyumuke pa kwendelela kusapula.

14. Le i muswelo’ka otubwanya kukwasha otwifundanga nandi Bible eteakanye ku kupangwapangwa? (2 Temote 3:12)

¹⁴ Tubwanya kukwasha otwifundanga nandi Bible eteakanye ku kupangwapangwa, na kumulombola bibwanya kumusapwila bengidi-nandi, balunda nandi, ne bantu ba mu kisaka. (Tanga 2 Temote 3:12.) Kimfwa bengidi-nandi bamo babwanya kumuzawila pa mwanda wa kushinta kwaashinta mwiendelejo wandi. Enka ne babutule bandi ba pabwipi babwanya kufutulula nkulupilo yandi ya mu Bible. Shi tuteakanye tamba ku ngalwilo botwifundanga nabo Bible ku kupangwapangwa, bakekala bateakanibwe senene kūminina shi kupangwapangwa kubashilula.

15. Le i bika bibwanya kukwasha owifundanga nandi Bible alwe na kupangwapangwa mu kisaka?

¹⁵ Shi owifundanga nandi Bible kalu na kupangwapangwa mu kisaka, mukankamike alangulukile pa kine kilengeja bantu ba mu kyandi kisaka bakalabale. Padi bantu ba mu kyandi kisaka balañanga’mba, Batumoni ba Yehova bamufundijanga bya bubela nansha padi bebafwatakenyanga bibi. Enka ne babutule bamo ba Yesu kebāsangedilepo byaādi ulonga. (Mako 3:21; Yoa. 7:5) Nanshi fundija owifundanga nandi Bible ekale na kitūkijetyima ne kuyuka mwa kwisambila na bantu bakwabo na kanye, kubadila’mo ne ba mu kisaka.

16. Le i muswelo’ka otubwanya kukwasha otwifundanga nandi Bible asapule nkulupilo yandi na bunwa?

¹⁶ Nansha shi ba mu kisaka abalombola kusangela, yewa otwifundanga nandi Bible kafwaninwepo kwibashintulwila bintu byonso musunsa umo. Shi bitupu, babwanya kupungijibwa na mīsambo ne kupela kuteja’yo kitatyi kikwabo. Nanshi kankamika owifundanga nandi Bible asapule nkulupilo yandi mu muswelo ubwanya kulengeja babutule bandi basangele kwisamba nandi kitatyi kikwabo. (Kol. 4:6) Padi ubwanya kusapwila bantu ba mu kisaka batwele pa jw.org. Kulonga namino kubwanya kwibakwasha bayukile’ko bivule pa Batumoni ba Yehova kitatyi kyonso kyobasaka.

17. Le i muswelo’ka obwanya kwibidija owifundanga nandi Bible ayuke mwa kulondolwela boba badi na milangwe ya bubela pa Batumoni ba Yehova? (Tala ne kifwatulo.)

¹⁷ Pa kukwasha owifundanga nandi Bible eteakanye mwa kulondolwela mu muswelo upēla ku bipangujo bimwipangula ba mu kisaka nansha bengidi-nandi, ubwanya kwingidija kipindi kya pa jw.org kinena’mba, “Bipangujo Bipangulwanga Divule.” (2 Tm. 2:​24, 25) Kadi ku mfulo kwa kifundwa ne kifundwa pitulukai mu kipindi “Bantu Bamo Banenanga’mba” kya mu dibuku Ikala Mūmi Nyeke! Kankamika owifundanga nandi Bible eibidije mwa kulondolwela mu byandi bishima. Kadi kokekaka kumupa’ko manwa akamukwasha ashintulule nkulupilo yandi senene. Kuno kwiibidija kukamukwasha abingije lwitabijo lwandi na kikulupiji.

18. Le i muswelo’ka obwanya kukwasha owifundanga nandi Bible ekale musapudi wa kubulwa kubatyijibwa? (Mateo 10:27)

¹⁸ Yesu wākankamikile bandi bana ba bwanga basapwile bantu myanda miyampe. (Tanga Mateo 10:27.) Shi owifundanga nandi Bible ashilule kusapula nkulupilo yandi tamba ku ngalwilo, bukidi bonka ukefunda mwa kukulupidila mudi Yehova. Le i muswelo’ka obwanya kukwasha owifundanga nandi Bible etungile kino kitungo? Shi kubaelwa musapu mu kipwilo amba kusa kwikala kampanye, kankamika owifundanga nandi Bible alangulukile pa byabwanya kulonga mwanda wa kubwanya bisakibwa bya kwikala musapudi wa kubulwa kubatyijibwa. Musapwile amba i bipēla kusapula mu kampanye. Kadi ubwanya kwitungila’ko kitungo kya kupityija bipindi ku kupwila kwa mu bukata bwa yenga. Kufikila pa kino kitungo kukamukwasha ayuke mwa kushintulwila nkulupilo yandi na kikulupiji.

KULUPILA OWIFUNDANGA NANDI BIBLE

19. Le Yesu wālombwele namani amba ukulupile bandi bana ba bwanga, ne i muswelo’ka otubwanya kumwiula?

¹⁹ Kumeso kwa Yesu kwenda mūlu, wāsapwidile bandi bana ba bwanga’mba baketana nandi monka. Inoko kebāivwanijepo amba Yesu wisambilanga pa kwenda kwabo kwa mūlu. Nansha nankyo Yesu wātele mutyima pa lulamato lwabo pa kyaba kya kuta’o pa kutatana kwabo. (Yoa. 14:​1-5, 8) Wādi uyukile amba basakilwa kitatyi pa kwivwanija bintu kampanda, pamo bwa lukulupilo lwabo lwa kwenda mūlu. (Yoa. 16:12) Batwe netu tubwanya kukulupila botwifundanga nabo amba bakimbanga kusangaja Yehova.

20. Le kaka umo wa mu Malawi walombwele namani amba ukulupile waefundanga nandi Bible?

²⁰ Kulupila’mba owifundanga nandi Bible usakanga kulonga byoloke. Tubandaulei’ko kimfwa kya kaka Chifundo wa mu Malawi. Washilwile kwifunda Bible na nsongwakaji witwa bu Alinafe wa mu kipwilo kya Katolika mu dibuku Ikala Mūmi Nyeke! Pobapwile kwifunda kifundwa kya 14, Chifundo waipangwile uno nsongwakaji byalanga’po pa kwingidija bankishi mu butōtyi. Kino kipangujo kyamusense bininge, kupwa walondolola’mba: “Buno i butongi butala muntu mwine!” Chifundo walangile amba Alinafe usa kuleka’byo kwifunda Bible. Inoko Chifundo wamutūkijije mutyima ne kwendelela kwifunda nandi, koku ukulupile amba kitatyi kimo ukevwanija’mba kwingidija bankishi i kubi. Myeji kampanda pa kupita’po, abo pa kufika mu kifundwa kya 34, Chifundo wamwipangula’mba: “Le kwifunda myanda ya Leza wa bine Yehova idi mu Bible i kukukwashe namani?” Chifundo ulombola byanenene Alinafe amba, “Wasekunwine myanda mivule isangaja, kimfwa wanenene amba Batumoni ba Yehova kebaloñangapo bintu binena Bible amba i bibi.” Kitatyi kityetye pa kupita’po, Alinafe waleka kwingidija bankishi ne kubwanya bisakibwa bya kubatyijibwa.

21. Le i muswelo’ka otubwanya kukwasha otwifundanga nandi Bible akwate butyibi bwa kwingidila Yehova?

²¹ Nansha shi Yehova ye “utamija’byo,” netu tudi na mwingilo wa kukwasha otwifundanga nandi Bible endelele. (1 Ko. 3:7) Tuloñanga bivule kutabuka’ko’tu kufundija otwifundanga nandi Bible bimusakila Yehova kulonga. Tumukwashanga aningijije’ko buswe bwasenswe Yehova. Kadi tumukankamikanga alombole buno buswe na kubadikija kumeso tumweno twa Bulopwe. Ne kadi tumukwashanga akulupile mudi Yehova kitatyi kyatanwa na makambakano. Shi tulombole otwifundanga nandi Bible amba tukulupile amba usakanga kusangaja Yehova, kino kikamukwasha eendeje mungya misoñanya ya mu Bible, kadi ukakwata butyibi bwa kwingidila Yehova.