Le Mfwaninwe Kuleka Kwendeja Kyendwa-Nakyo?

Le nobe wikondanga na mwanda na uno? Shi i amo, le i bika bikakukwasha uyuke shi unenwe kwendelela kwendeja kyendwa-nakyo nansha kuleka kwendeja?

Mu matanda amo, boba ke banunu, bene bakimba kupota mikanda mipya ya bu shofele bafwaninwe bidi kupimwa ne kupebwa lupusa na dokitele. Bene Kidishitu bashikata mu ano matanda, bafwaninwe kukōkela bino bijila ne kwitabija butyibi bukwata boba bapelwe lupusa na Leta. (Loma 13:1) Ino nansha shi ushikatanga kwepi, kudi bintu bibwanya kukukwasha wibandaule shi wi mufwaninwe kwendeja kyendwa-nakyo.

BANDAULA MUSWELO OENDEJA

Bulongolodi bumo bwa mu États-Unis butala myanda ya banunu bwanenene amba, muntu ubwanya kwiipangula bino bipangujo bilonda’ko pa kuyuka shi ufwaninwe kwendeja kyendwa-nakyo nansha kuleka:

• Le ngidi na makambakano a kutanga biyukeno bya mu mashinda nansha kumona bufuku?

• Le kendi mwanze kujimija bukomo, ne kino kekinengejanga nkomenwe kujinya nshingo mwanda wa kutala mu makalashi atala kunyuma nansha kyaka kekibwanyapo kumweka mu makalashi?

• Le kenkolelwanga kulonga bintu bukidibukidi, pamo bwa kutalula kulu popa pa kubweja lubilo mwanda wa kukwata frein?

• Le ñendejanga bityebitye kenengeja myotoka mikwabo ileke kupita senene?

• Le kendi mulonge maakishida mavule pa mwanda wa kwitupatupa kwami, nansha le kyendwa-nakyo kyami ke kifyontakanefyontakane nansha kekidi na bikululekulule pa mwanda wa bintu bya mu dishinda konekikululanga?

• Le kebangimike ku bampulushi pa mwanda wa muswelo oñendeja?

• Le nkunukanga kitatyi kyoñendeja kyendwa-nakyo?

• Le ntomanga malawa abwanya kunengeja nkomenwe kwendeja senene?

• Le bantu ba mu kyami kisaka ne balunda nami, bazumbijanga mutyima pa mwanda wa kyendwa-nakyo kyoñendeja?

Shi ubalondolola’mba, en-en, ku kipangujo kimo nansha bibidi ku bino bipangujo, padi bikakulomba kulonga’ko kushinta kampanda. Kimfwa, padi bikakulomba kutyepeja’ko misunsa yoendeja, nakampata bufuku. Bandaula kitatyi ne kitatyi muswelo oendeja kyendwa-nakyo. Ubwanya kwipangula muntu wa mu kisaka nansha mulunda akulombole muswelo oendeja. Padi ubwanya kutanga ne bufundiji bulombola mwa kwendejeja senene. Inoko shi ubalondolola’mba, en-en, ku bipangujo bivule byotwamona kungala, bikekala bya tunangu kuleka kwendeja kyendwa-nakyo.a

LUDIKWA NA MISOÑANYA YA MU BIBLE

Padi kubwanyapo kujingulula’mba bwino bobe bwa kwendeja kyendwa-nakyo bubashilula kutyepa. Kadi mulangwe wa kuleka kwendeja ubwanya kumweka bu mukomo kadi usansa. Le penepo, i misoñanya’ka ya mu Bible ibwanya kukukwasha umone mu muswelo muyampe ngikadilo yodi’mo ne kukwata butyibi bwa tunangu? Tubandaulei’ko misoñanya ibidi.

Ikala mutūkanye. (Nki. 11:2) Shi twenda tununupa, bukomo bwa kumona, bwa kwivwana, mikupa yetu, ne bukomo bwetu bwa kuta mutyima ku bintu kampanda, bwendanga butyepa. Kimfwa, bantu bamo shi abashilula kununupa balekanga kwitāmuna bidyoma kumokumo, mwanda bajingululanga’mba bakapēlelwa kwisanshija. Uno musoñanya utala ne boba bendejanga byendwa-nabyo. Kitatyi kimo, muntu ubwanya kukwata butyibi bwa kuleka kwendeja kyendwa-nakyo pa mwanda wa kwikinga aye mwine. (Nki. 22:3) Kadi shi bantu abanena’mba bazumbijaga mutyima pa mwanda wandi, muntu mutūkanye uketabija ne kuteja madingi.—Dingakanya na 2 Samwele 21:​15-17.

Epuka mambo a mashi. (Kup. 22:8) Motoka i kyabulwi kibwanya kuleta kyaka shi ketwiwendejapo senene. Muntu wendelela kwendeja kyendwa-nakyo nansha shi bukomo bwandi bwa kwendeja bubashilula kutyepa, ubwanya kutūla būmi bwandi mu kyaka ne bwa bantu bakwabo. Kadi shi muntu walongele akishida yaipaijañene, ubwanya kwendelela kwitopeka pa mwanda wa mambo a mashi.

Shi umona’mba i bikomo kukwata butyibi bwa kuleka kwendeja kyendwa-nakyo, epuka kulanga’mba ubwanya kujimija bulēme bobe ne mvubu yobe. Yehova ukusenswe pa mwanda wa ngikadila yobe miyampe mwine mubadilwa butūkanye, kwityepeja, ne kuta bantu bakwabo mutyima. Kadi i mulaye kukukwatakanya ne kukusenga. (Isa. 46:4) Kakakwelapo nansha dimo. Nanshi mulombe akukwashe wingidije misoñanya ne madingi a mu Bible kitatyi kyokwata butyibi bwa kwendelela nansha kuleka kwendeja kyendwa-nakyo.