Bipangujo bya Batangi

Le i ‘mulangwe’ka’ usa kutūla Yehova mu mityima ya mizo panopano kumeso’ku?

Kusokwelwa 17:​16, 17 unena pa mwanda utala ngalwilo ya kyamalwa kikatampe amba: “Masengo dikumi owamona’a, ne kinyema kya ntanda, bano’ba bakashikwa ndumba, bakamusala ne kumuvūla mutaka, kadi bakadya mwita wandi ne kumusōka na mudilo fututu. Mwanda Leza watūla’kyo mu mityima yabo kufikidija mulangwe wandi, bine, kufikidija mulangwe wabo umo pa kupa kinyema kya ntanda bulopwe bwabo.” Mafuku kunyuma, mabuku etu adi anena’mba, “mulangwe” usa kutūla Yehova mu mityima ya mizo, i konakanibwa kwa mutōtelo wa bubela.

Inoko, kusakilwa bujadiki. “Mulangwe” usa kutūla Yehova mu mityima ya mizo i wa abo “kupa kinyema kya ntanda bulopwe bwabo.” Pa kwivwanija musa kufikidila uno mwanda, tubandaulei’ko bipangujo bilonda’ko.

Le i bantu’ka bakatampe batelelwe mu buno bupolofeto? “Ndumba” mwine witwa ne bu “Babiloni Mukatampe,” welekeja umbikalo wa ntanda yonso wa mutōtelo wa bubela. “Kinyema kya ntanda kya musombelo utyila pyā,” kyelekeja bulongolodi buleta ndoe bwashilwile kwingila mu 1919 bu Kitango kya Mizo, bwine butelwa dyalelo bu Bumo bwa Mizo. (Kus. 17:​3-5) “Masengo dikumi,” elekeja malopwe onso a bukomo akwatakanya kinyema kya ntanda.

Le i kipwano’ka kidi pa bukata bwa ndumba na kinyema kya ntanda kya musombelo utyila pyā? Ndumba “ushikete pa” kinyema kya ntanda, wikipa madyese andi ne kulonga bukomo bwa kwikyongola, enka ne kwikibikala.

Le i bika bikafikila ndumba? Kinyema kya ntanda pamo ne masengo dikumi amukwatakanya, bano’ba “bakashikwa ndumba.” Bakalombola mushikwa wabo na kusela bupeta bwandi bonso ne kulombola patōkelela bubi bwandi. Kadi bakafikidija butyibi bwa Yehova padi uno ndumba, na kumonakanya fututu. (Kus. 17:1; 18:8) Ino yo ikekala mfulo ya bipwilo byonso bya bubela. Ino, kumeso kwa kino kulongeka, Yehova ukalengeja mizo ilonge kintu kekyalongekelepo kashā mu mānga ya maludiki a bantu.

Le Yehova ukatonona mizo ilonge bika? Ukatūla “mulangwe wandi” mu mityima ya masengo dikumi, mu buluji bwa amba, “bakapa kinyema kya ntanda [kityila pyā] bukomo ne lupusa lwabo”—ko kunena’mba Bumo bwa Mizo. (Kus. 17:13) Tala kino mokishintulwila. Le maludiki a bantu akakwata ao mene butyibi bwa kupa bukomo ne lupusa lwabo ku kinyema kya ntanda? Aa! Bupolofeto bulombola’mba Yehova aye mwine ukebasoñanya balonge namino. (Nki. 21:1; dingakanya na Isaya 44:28.) Le kuno kushinta kukekala kulongeka bityebitye? Aa! Na bubine kukekala kulongeka bukidibukidi, kadi mukitulumukila. Kupwa kino kinyema kya ntanda kikapebwa bukomo, kikafikidija butyibi bwa Yehova pa malongolodi a bipwilo bya bubela na kwiatalula’ko lonso.

Le penepo i bika byotutengēle kwimwena mu mafuku a kumeso? Ketufwaninwepo kutengela mapya alombola’mba, pano maludiki abashilula kukwatakanya bininge Bumo bwa Mizo. Kyotufwaninwe kutengela i kino kya amba: Na mu kitulumukila, Yehova ukatūla mulangwe mu mityima ya mizo mwanda wa ipe kinyema kya ntanda bukomo. Shi kino’tu kibalongeka, tukayuka’mba kyamalwa kikatampe kekisa kushilula. Nanshi, “tutalei’nka kutala ne kulama ñeni yetu mibwane” mwanda kushinta kwa mu kitulumukila kusa kushilula panopano ponka!—1 Ts. 5:6.