Mukanda Utamba ku Kitango Kyendeji
“BUNTU bwikale nenu, ne ndoe kumo, bīye kudi Leza Tata wetu ne kudi Mfumwetu Yesu Kidishitu.” Luno namino lo lwimu lwādi lutuma Polo mu mikanda yandi mivule ku bipwilo. Bine lulombola amba netu twimusakila biyampe banwe bonsololo.—Ef. 1:2.
Na bubine tusangelanga buntu bwa Yehova kupityila ku kitapwa kya kikūlwa kya Kidishitu Yesu! Ke-pantu kupityila ku kikūlwa, twi betabijibwe ku meso a Leza. Ketwadipo bakufikila’po ku bukomo bwetu batwe bene, nansha shi twifunda Bible na kininga’ka, nansha shi tusapula myanda miyampe namani, nansha shi twingila mingilo mikwabo milumbuluke. Kufwilwa lusa ne kukamona būmi bwa nyeke ke mfutwapo yotufutwa pangala pa bukomo bwetu, ino i kyabuntu kilombola buntu bwa Yehova kupityila kudi Yesu Kidishitu.—Loma 11:6.
Polo wātumine banababo betabije mukanda’mba: “Tubēsasapo’mba, kemukatambula buntu bwa Leza bitubitupu, mhm. (Ke-muntu aye wisamba’mba, pa mwaka wa kufikila ponka nakwivwene, kadi mu difuku dya kupanda nakupandije, talaipo bidi, pano po pa mwaka mulumbuluke, talaipo kadi, pano po pa difuku dya kupanda.)” Kudi “mwaka wa kufikila ponka” wāikele’ko kumeso kwa Yelusalema konakanibwa mu myaka katwa kabajinji. Bantu ba mityima miyampe baswele Yehova bāpandile ku mushipiditu. Ku mfulo bāpanda ne ku ngitu kwine pa kukōkela kunyema mu Yelusalema kumeso kwa konakanibwa kwandi mu mwaka wa 70 K.K.—2 Kod. 6:1, 2.
Dyalelo nadyo, tudi mu “mwaka wa kufikila ponka” ne mu “difuku dya kupanda.” Boba betabijibwe na Yehova bu bengidi bandi ne bapandijibwa ku mushipiditu badi na lukulupilo lwa kukapanda pa “difuku dikatakata dya Yehova” dyafwena’di.—Zef. 1:14.
Kwiya kwa difuku dya Yehova i kwitutwike kiselwa kikatampe. Tufwaninwe kudyumuna bantu ne kukwasha boba ba mityima miyampe bamwene mu buntu bwa Yehova amba nabo bakapande. Polo wādi uyukile bukatampe bwa kino kiselwa. Wāsonekele amba: “Yō! i malwa ami shi nkisapwile myanda-miyampe!” Kupwa wānena muswelo waādi umona bintu amba: “Ngidi mulobekwe . . . ku bañeni, ne ku bampikwa ñeni bene kumo. Po pa mwanda o mpangila lubilo ku mutyima wami, nsapule myanda-miyampe.”—1 Kod. 9:16; Loma 1:14, 15.
Yehova uketulandula mambo shi tudi na kalengwa ka kwingila uno mwingilo wa kamweno wa kudyumuna bantu. Tuyukile byobya byānene Yehova kudi mupolofeto Ezekyele amba: “Mwana muntu, nakutūla kodi kalama ka njibo ya Isalela; penepo ivwana kinenwa kya pa kyakanwa kyami; kabidi wibadyumune bya ko ndi. Ponena kudi mupupakane na’mba: binebine abe ukafwanga; ino abe ne kumudyumunapo mpika, nansha kwisamba kudyumunapo mpika, nansha kwisamba kudyumuna mubi ku dishinda dyandi dibi, kupandija būmi bwandi mpika, ino shi yewa mubi’wa akafwile mu bukondame bwandi, nankyo mashi andi nkalandula’o ku kuboko kobe.”—Ezek. 3:17, 18.
Ano mafuku a mfulo i myaka ya malwa bine. Ke kipēlapo kujadika bintu, koku kisaka, koku kaji, kuno mingilo ya kipwilo, kokwa nako busapudi. Ne kadi, bavule umbukata mwetu badi na misongo, njia, bununu, pakwabo ne kulondwalondwa. Bavule bene i ‘balemenenwe.’ Tukimba kwibalangila monka mwānenene’kyo Yesu amba: “Iyai kwami bānwe bonso bakuputuma na mīngilo, ne bakulememwa, nabya nami nkemutukija’byo biyampe.” (Mat. 11:28) Bine tubemufwija’ko banwe bonso balonga bukomo bwa kwingidila Yehova na kikōkeji nansha byomudi mu bikoleja, bikale bikatampe nansha bityetye.
Pangala pa bupyasakane bwenu mu mwingilo wa busapudi ne wa bufundiji, ne kupityila ku madyese a Yehova, bantu 4 762 babatyijibwanga yenga ne yenga kujokoloka ntanda yonso. Mu mwaka wa mingilo ushele kunyuma, kwabundilwe bipwilo bipya 1 375. Tukulupile amba dino dibuku dipya Lelo I Bika Bine Bifundija Bible? dilupwilwe pano mu ndimi 120, dikakwasha midiyo ne midiyo ya bantu bamwene mu buntu bwa Yehova ne ndoe yandi mu dino “difuku dya kupanda.”
Tambulai lwimu lwa buswe lutamba ku Kitango Kyendeji kadi yukai amba twimutelanga mu yetu milombelo. Netu kadi twimufwija’ko nenu pa mwanda wa kutela komwitutelanga mu yenu milombelo.
Banabenu,
Kitango Kyendeji kya Batumoni ba Yehova