Le Bible Unena Bika pa Busongi bwa Ntēkele-Nkuvwike?
Bilondolola Bible
Bible unena’mba kiswa-mutyima kya Leza i kya amba bantu ‘belame ku busekese.’ (1 Bene Tesalonika 4:3) Monka mokingidijibwe mu Bible, mu kishima “busekese” mubadilwa makoji, kulāla kwa bantu ba ngitu imo, ne kulāla kwa ba mwana-mulume ne mwana-mukaji bampikwa kwisonga.
Mwanda waka kwisonga ne kubulwa kwisonga i mwanda mukatampe kudi Leza?
Le tunene bika pa kushikatyila pamo kumeso kwa kwisonga mwanda wa kwiyuka?
Le ba mulume ne mukaji babwanya kuningija busongi bwabo namani?
Mwanda waka kwisonga ne kubulwa kwisonga i mwanda mukatampe kudi Leza?
Mpangiko ya kwisonga i mitambe kudi Leza. Wēitūdile’ko kitatyi kyaālungile pamo ba mulume ne mukaji babajinji. (Ngalwilo 2:22-24) Kādipo usaka ba mwana-mulume ne mwana-mukaji bashikatyile pamo pambulwa kwisonga.
Leza uyukile bintu biyampe bisakilwa bantu. Wātūdile’ko busongi bu kijimba kya lonso pa bukata bwa mwana-mulume ne mwana-mukaji, kya kukinga bantu bonso mu kisaka ne kumwena’mo. Langulukila bityetye pa kino kimfwa. Bulombodi bwitupa Leza bwa mwa kwikadila mu kipwano kiyampe mu kisaka budi pamo bwa bulombodi buletele muntu upungile kintu bwa mwa kwikingidijija. Misoñanya ya Leza ikwashanga nyeke boba beilonda.—Isaya 48:17, 18.
Bulombodi bwa sendwe upuñanga bintu bukulombolanga muswelo wa kukongakanya tubintu palapala. Bulombodi bwa Leza nabo bukulombolanga mwa kwikadila na kisaka kya nsangaji
Kusambakena pamo kumeso kwa kwisonga kubwanya kuleta makambakano. Kubwanya kulupuka dīmi dya kubulwa kusaka, misongo isambuka ku kusambakena pamo, ne kuvutakanibwa ñeni.a
Leza wāpele ba mwana-mulume ne mwana-mukaji bukomo bwa kubutula bana kupityila ku kusambakena pamo. Leza umwene būmi bu bujila, kadi bukomo bwa kubutula bana i kyabuntu kilēme. Leza usakanga tulēmeke kino kyabuntu na kulēmeka mpangiko ya busongi.—Bahebelu 13:4.
Le tunene bika pa kushikatyila pamo kumeso kwa kwisonga mwanda wa kwiyuka?
Pa kwikala mu busongi bwa nsangaji, kebilombepo kushikatyila pamo mu kitatyi kampata kumeso kwa kwisonga. Ino bantu besongele bekalanga na nsangaji shi kijimba kya busongi i kikomo kadi abo bonso balonga bukomo bwa kunekenya makambakano.b Busongi bukomejanga kijimba kya busongi.—Mateo 19:6.
Le ba mulume ne mukaji babwanya kuningija busongi bwabo namani?
Busongi bubwaninine i kutupu’bo. Inoko ba mulume ne mukaji babwanya kwikala na nsangaji mu busongi shi bengidija madingi a mu Bible. Amo bidi i ano:
Tangidija bisakibwa bya mwinē pobe kumeso kwa byobe.—1 Bene Kodinda 7:3-5; Bene Fidipai 2:3, 4.
Mwisanswei ne kwilēmeka banwe bene na bene.—Bene Efisesa 5:25, 33.
Mwibejei mu byomunena.—Nkindi 12:18.
Ikalai na kitūkijetyima kadi pejai kwilekela.—Bene Kolose 3:13, 14.
a Tala kishinte kinena’mba “Bipangujo bya Bankasampe . . . Le Nkalonga Namani Shi Baningila Kulāla Nami?”
b Tala kishinte kinena’mba “Bisaka bya Nsangaji—Kijimba kya Busongi.”