Milombelo ya Lolo Umo Mpofu Ibalondololwa

Yanmei, Kamoni umo wa mu Azia, wanenene kukwasha lolo umo mpofu witwa bu Mingjie asambuke mu dishinda.a Mingjie walondolola’mba: “Biyampe, wafwa’ko. Leza akwesele!” Kupwa Yanmei waipangula Mingjie shi uketabija kwisamba myanda ya mu Bible. Mwenda mafuku Mingjie walombola kaka amba, wadi ulombela difuku ne difuku Leza amukwashe asokole kipwilo kya bine. Mwanda waka wadi ulombela uno muswelo?

Mingjie washintulwile amba mu 2008 waitabije pamwityile mulunda nandi mpofu bende ku kupwila ku kipwilo kikwashanga bantu badi na bulema. Pa kupwa kwivwana busapudi, Mingjie waipangula mupe dibuku dyaatelele. Mupe wamulombola’mba i Bible, Kinenwa kya Leza kya bine. Mingjie wasaka kutanga’ye. Ebiya wasokola Bible wa bilembwa bya bampofu wa mu Kishinwa, watanga mavolime 32 mu kintu kya myeji isamba. Mingjie pa kutanga Bible bininge, wajingulula’mba lufundijo lwa Busatu Busantu, lwine lobafundije ku kipwilo kyaakapwidile’mo i lwa bubela ne amba Leza udi na dijina dya bunka, Yehova.

Mwenda mafuku, Mingjie watyumukwa mutyima pa mwanda wa mwiendelejo wa bantu ba mu kipwilo. Wajingulula’mba kebadipo balonda byaadi utanga mu Bible mu būmi bwabo. Kimfwa, badi bapa bampofu byakudya bilāle, ino bantu bamona byakudya bitēkwe’nka mu difuku’dya. Buno bukondame bwasansa Mingjie, ebiya washilula kukimba bipwilo bikwabo mu kyabo kibundi. O mwanda Mingjie wadi ulombela asokole kipwilo kya bine kya bwine Kidishitu.

Pa kusangela kilongwa kya buswe kya Yanmei, Mingjie waitabija befunde nandi Bible. Mafuku pa kupita’po, Mingjie wakatanwa ku kupwila kwa Batumoni ba Yehova. Mingjie usekununa’mba: “Nkikelwapo musunsa mubajinji onakapwidile. Batutu ne bakaka bonso bañimwine na nsangaji. Nasangele bininge. Nansha byondi mpofu, nemwenine buswe bwampikwa mboloji.”

Mingjie waendelela biyampe, washilula kutanwa ku kupwila kitatyi ne kitatyi. Wasangedile bininge kwimba ñimbo ya Bulopwe, ino wadi ukomenwa kwimba mwanda kekwadipo mabuku a ñimbo mu ludimi lwa bampofu lwaadi utanga. Ebiya na bukwashi bwa kipwilo, Mingjie walonga aye mwine dibuku dyandi dya ñimbo. Byamulombele mansá 22 pa kutentula ñimbo yonso 151. Mu Kweji 4, 2018, Mingjie washilwile kusapula mu bantu bavule, kupwa kasapula kintu kya mansá 30 kweji ne kweji.

Pa kukwasha Mingjie eteakanye mwanda wa kubatyijibwa, Yanmei wadi ukwata ku mawi bipangujo ne bisonekwa bidi mu dibuku Balongololwe Mwa Kulongela Kiswa-Mutyima kya Yehova. Mingjie wabatyijibwe mu Kweji 7, 2018. Unena’mba: “Natengelwe bininge na buswe bwalombwele batutu ne bakaka ku kino kitango. Nasumije ne impolo mwanda nayukile amba naikala mu kipwilo kya bine kya Leza.” (Yoa. 13:34, 35) Pano Mingjie byasumininwe kulombola buswe na bobamulombwele, usapulanga kitatyi kyonso.