Bukwashi ku Boba Basusulwa mu Busongi

Kitango kya Ntanda Yonso Kitala Bukomo bwa Ngitu kyanenene amba, “Bukalabale bulongelwa bana-bakaji bubaikala ke kipupo kya ntanda yonso kilomba kulonga’po kintu bukidibukidi.” Kino kitango kifwatakanya’mba bana-bakaji 30 pa katwa “basongelwe ke balongelwe bukalabale ku ngitu ne/nansha ku bulādi” na babo balume. Lapolo imo ya Bumo bwa Mizo inena’mba ano mafuku, kujokoloka ntanda yonso, kufwanga bana-bakaji 137 mwaka ne mwaka, bepaibwa na balume babo nansha na muntu mukwabo wa mu kisaka.a

Nansha buno bubandaudi byobulombola mubaile kuno kususulwa kwa mu busongi, ino kebulombwelepo kamo ne kamo ka mwikadile misanshi ya mu malango ne ya ku ngitu ipita’mo boba basusulwa.

Lelo nobe ususulwanga mu busongi? Nansha le kudi oyukile ususulwa? Shi i amo, tala ino myanda ya mu Bible ikokeja kwimukwasha.

Ke kilubopo kyobe

Bukwashi budi’ko

Kudipo bunka

Kususulwa kwa mu busongi kusa kupwa

Mwa kukwashisha yewa ususulwa

Ke kilubopo kyobe

Binena Bible: “Batwe bonso, wa pandi wa pandi, tukeshintulwilanga kudi Leza.”—Bene Loma 14:12.

Vuluka kino: Yewa ukususula weselela kiselwa pa bilongwa byandi.

Shi mwinē pobe ukutopeka pa bukalabale bwakulongela, weongola. Bakaji bafwaninwe kuswibwa, ke kususulwapo.—Bene Kolose 3:19.

Kyaba kimo, bilongwa bya mususujani bitambanga ku bu mvutakani bwandi, ku mwaalelelwe mu kisaka, nansha ku mutomeno-mpata wa mālwa. Nansha nankyo, ukeshintulwila ku meso a Leza pa muswelo wakususula. Kadi udi na kiselwa kya kushinta bilongwa byandi.

Bukwashi budi’ko

Binena Bible: “Pa badingidi bavule kudi kufikidila.”—Nkindi 15:22.

Vuluka kino: Shi umona’mba ubaikala mu kyaka, kuyuka mpika kya kulonga, bantu bakwabo babwanya kukukwasha.

Mwanda waka bakwabo bakukwashe? Mwanda kususulwa mu busongi i mwanda mukutakane. Kitatyi kyokwata butyibi bwa mwa kwikunekenenya, kudi myanda mivule ilomba kubandaulwa, kimfwa:

• Būmi bobe shi kebudipo mu kyaka

• Būmi bwa bana

• Kwa kusokola ka lupeto

• Muswelo osenswe mwinē pobe

• Mutyima wa kukūla busongi bwenu shi mwinē pobe washinta bilongwa byandi

Bine, ñeni ibwanya padi kukufula walēmenenwa. Ino le i kwepi kokakimba bukwashi?

Mulunda ukulupilwa nansha kisaka babwanya kukukwatakanya mu malango. Kusapwila’mo muntu ukutele mutyima kukokeja kukukwasha.

Kwita ku telefone bantu batala myanda ya bukalabale bwa mu masongi kubwanya kulengeja bakukūkile bukidibukidi. Bano bantu bakokeja kukupa’ko milangwe ya bya kulonga pa kwikinga. Shi mwinē pobe waitabija kilubo ne udi bine na mutyima wa kushinta, bano bantu bakokeja kumukwasha mwa kutabwila matabula mabajinji.

Kudi bantu bakwabo bakokeja kukukwasha bukidibukidi shi udi mu kyaka. Mu bano bantu mubadilwa badokitele, bamuñanga, nansha bantu bakwabo bapotolwele’byo.

Kudipo bunka

Binena Bible: “Yehovab udi pabwipi na boba ba mityima mityumuke; upandijanga boba ba mushipiditu musonsakane.”—Ñimbo ya Mitōto 34:18.

Vuluka kino: Leza i mulaye kukukwasha.

Yehova ukutele binebine mutyima. (1 Petelo 5:7) Uyukile byobya bidi mu nkulwe ya milangwe yobe ne mu malango. Ubwanya kukusenga kupityila ku Kinenwa kyandi, Bible. Kadi ukwita ulombele kwadi. Polombela, mulombe akupe tunangu ne bukomo bwa kulwa na mwanda odi nao.—Isaya 41:10.

Kususulwa kwa mu busongi kusa kupwa

Binena Bible: “Bakekala, muntu ne muntu munshi mwa muñanza wandi ne munshi mwa kikuyu kyandi, i kutupu muntu nansha umo ukebakwatyija moyo.”—Mika 4:4, kunshi kwa dyani.

Vuluka kino: Bible i mulaye amba kumeso’ku, kadi i panopano’tu, njibo isa kwikala bu kifuko kya ndoe ku bonso.

Yehova Leza kete ye udi na bukomo bwa kupwija lonso makambakano etu onso. Bible i mulaye amba: “Ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.” (Kusokwelwa 21:4) Mu kine kitatyi’kyo, enka ne kuvuluka bintu bibi kukajimankana mwanda bikapingakanibwa na bintu biyampe. (Isaya 65:17) Buno bo būmi bwa ndoe bwa kumeso bukulaile Bible.