Bantu Midiyo 6 I Bafwe ku Kipupo kya COVID—Le Bible Unena’po Namani?

Mungya lapolo ya Kitango kya Ntanda Kitala Bukomo bwa Ngitu, kiyukene mu kīpi bu OMS, kufika mu mafuku 23 Kweji 5, 2022, ke kufwe bantu midiyo 6 ne kupita, ku kipupo kya COVID-19. Inoko, mapya alupwile mu mafuku 5 Kweji 5, 2022 alombola’mba Kitango kya Ntanda Kitala Bukomo bwa Ngitu, kifwatakanya bu i kufwe bantu bangi bininge. I banene mu ano mapya amba, tamba mu 2020 kutūla mu 2021, “kibalwa kya bantu bafwile na COVID-19 nansha na biyukeno byayo . . . kisenselela ku bantu midiyo 14 ne kupita.” Le Bible unena’po bika pa kino kinkumbulu kityumuna mutyima?

Bible wālaile bipupo bya misongo bileta lufu

•  Yesu wālaile amba kukekalanga bipupo bileta “misongo mikomo” mu kitatyi kitwa bu “mafuku a mfulo.”—Luka 21:11, Contemporary English Version; 2 Temote 3:1.

Buno bupolofeto bwālaile Yesu bufikidilanga dyalelo. Shi usaka kuyukila’ko bivule, tanga kishinte kinena’mba, “Le Kiyukeno kya ‘Mafuku a Mfulo,’ Nansha ‘Kyaba kya ku Mfulo’ I Kiyukeno’ka?”

Mu Bible mudi busengi

•  “Leza wa kusenga konso . . . wituseñanga mu matompo etu onso.”—2 Bene Kodinda 1:3, 4.

Bantu bavule bafwidilwe bantu bobasenswe basengelwe na musapu wa mu Bible. Yukila’ko bivule na kutanga kishinte “Mwa Kulwila na Njia—Byokokeja Kulonga Dyalelo” ne “Bukwashi Bulumbuluke ku Boba Badi na Njia.”

Bible i mulombole kintu kikapwija ano makambakano onso

•  “Bulopwe bobe bwiye. Kiswa-mutyima kyobe kilongeke, pamo na momwa mūlu, ne pano pa ntanda pene.”—Mateo 6:10.

Panopano ponka “Bulopwe bwa Leza” busa kulonga’po kintu mwanda wa kuleke kukekala “mwikadi ukanena’mba: ‘Nabela.’” (Mako 1:14, 15; Isaya 33:24) Shi usaka kuyuka buno Bulopwe ne byobusa kulonga nabya tala video Le Bulopwe bwa Leza I Bika?

Tukulomba wifunde Bible mwanda wa abe ne ba mu kyobe kisaka mumwene mu madingi a tunangu adi’mo, ne mu milao isangaja ilailwe’mo.