Batumoni ba Yehova ne Mukubo wa Bantu—Le Bible Unena’po Namani?

Mu mafuku 27 Kweji 1, 2023, bantu bavule basa kuvuluka Difuku dya Ntanda Yonso dya Mukubo wa Bantu. Bintu bibi byalongekele pano kepadi myaka 75 ne kupita bibwanya kukulengeja wiipangule mwanda waka Leza walekele uno Mukubo wa Bantu ulongeke.

• Pa kuyuka byobya binena Bible, tanga kishinte “Mwanda Waka Kwāikele Mukubo wa Bantu? Mwanda Waka Leza Kēukankejepo?”

Bayuda batengelwe bininge na uno Mukubo wa Bantu. Bantu midiyo ne midiyo bafwile ku uno mukubo muteakanibwe. Bantu ba mu bisumpi bikwabo nabo basuswilwe ne kwipaibwa mu kitatyi kya Mukubo wa Bantu. Mu bano bantu, mubadilwa ne Batumoni ba Yehova, bene bapangilwepangilwe pa mwanda wa nkulupilo yabo ya mu Bible.

• Pa kuyukila’ko bivule, tanga kishinte “Qu’est-il arrivé aux Témoins de Jéhovah sous le régime nazi ?”

“Būmi bwa kumeso ne lukulupilo”

Bantu bavule baselele mutyima kūlu amba Mukubo wa Bantu pamo bwa uno ubwanya kulongeka monka. Na bya dyese, Bible i mulaye amba mu mafuku āya kumeso bino bintu bibi kebikalongekapo monka.

• “‘Mwanda ndyukile biyampe milangwe yonemulangila,’ i Yehova unena, ‘milangwe ya ndoe, ke ya kyamalwapo, mwanda wa kwimupa būmi bwa kumeso ne lukulupilo.’”—Yelemia 29:11.a

Luno lukulupilo lusa kufikidila kitatyi kisa kutalula’ko Yehova Leza bibi ne misanshi yobiletele. Panopano ponka:

• Usa kutalula’ko bantu babi basusula bakwabo.—Nkindi 2:22.

• Usa nkudapa bonso basusuka.—Kusokwelwa 21:4.

• Usa kusangula boba bafwile pano pa ntanda.—Yoano 5:28, 29.

Ubwanya kukulupila musapu usenga witupa Bible. Pa kuyuka kine kyobwaninya kukulupila uno musapu, tukwita wifunde netu Bible ku bitupu.