Kwikala na Būmi bwa Bwine Vega—Lelo Bible Unena’po Bika?

Kujokoloka ntanda yonso, bantu abasangela mpata bwine Vega.

• “Bwine Vega i mulangilo ne mwikadilo wa kupela—shi bikokejika ne shi i byendele’mo—kususula nansha kwipaya banyema mwanda wa kwibadya, kwivwika nansha mwanda wa bubinga bukwabo.”—The Vegan Society.

Kutentekela pa kukinga banyema, bantu bavule basangedile būmi bwa bwine Vega pa mwanda wa kulama ntanda, bukomo bwabo bwa ngitu, nansha nkulupilo yabo ya bipwilo.

• “Kwishila na boba basañunanga bidibwa, bwine Vega abo bumonwa divule bu filozofi, lukulupilo, nansha butongi bwa muntu ukimba kwalamuna ntanda ikale biyampe.”—Britannica Academic.

Le bwine Vega bo bukalumbulula umbuo wetu wa ntanda? Lelo Bible unena’po bika?

Mumwena Umpangi wetu bantu ne banyema

Bible ulombola’mba Umpangi wetu, Yehova Leza,a umwene bantu bu i bapite banyema, ne amba wāpele bantu lupusa pa banyema. (Ngalwilo 1:27, 28) Ne kadi mwenda mafuku, Leza wāpele bantu lupusa lwa kudya banyema. (Ngalwilo 9:3) Inoko, kasakilepo tususule banyema.—Nkindi 12:10.

Mungya Bible, kudya nansha kuleka kudya mwita i butongi bwa muntu mwine.b Butongi bwetu ke abopo buketwikadija bayampe ku meso a Leza. (1 Bene Kodinda 8:8) I kutupu ufwaninwe kutopeka mukwabo pangala pa bintu byatonga kudya.—Bene Loma 14:3.

Kine kikalumbulula būmi bwa kumeso

Bible ulombola’mba byotutonga kulonga umbūmi ke abyopo bikapwija makambakano a ino ntanda. Makambakano mavule atambanga ku ngikadilo ya politike, ya bantu, ne ya busunga ya ino ntanda, mine yoketubwanyapo kōlola. Bible unena’mba:

• “Kyokya kikondame kekibwanyapo kōlolwa.”—Musapudi 1:15.

Umpangi wetu ye ukapwija makambakano otwikonda nao. Bible unena mu kyelekejo byobya byasaka kulonga.

• “Kadi namwene diulu dipya ne ntanda mipya; mwanda diulu dya kala ne ntanda ya kala bibapu kupita, kadi ne dijiba dine ke kutupu’dyo.”—Kusokwelwa 21:1.

Leza ukapingakanya imbikalo ya bantu, nansha “diulu dya kala,” na “diulu dipya,” ko kunena’mba umbikalo wandi wa Bulopwe bwa momwa mūlu. Buno bwandi Bulopwe bukafundula “ntanda ya kala,” ke bantu babi kadi, ne kuludika “ntanda impya,” ko kunena’mba bantu baswele kwibukōkela.

I enka mu bwendeji bwa Bulopwe bwa Leza mukefunda bantu kwikala mu ndoe na banyema ne mobakalēmeka umbuo.—Isaya 11:6-9.