Le Mwine Kidishitu Ufwaninwe Kwikala na Mwiendelejo’ka?—Le Bible Unena’po Namani?

Dyalelo bantu bavule ntanda yonso betembanga’mba i bene Kidishitu; koku balonga bintu bisanshija bakwabo. Kimfwa bamo badi na kwisakila, na budimbidimbi, kadi kebadipo na bulēme. Bakwabo nabo balubilanga benē pabo na kulonga makoji. O mwanda mwiendelejo wabo ulengejanga bantu beipangule amba: ‘Le mwine Kidishitu ufwaninwe kwikala na mwiendelejo’ka?’

Mwine mufwaninwe kwikadila mwine Kidishitu

I kipēla kwitela bu mwine Kidishitu. Inoko kwitela’bo’tu kukanwa kekubwenepo. Mungya Bible, mwine Kidishitu i mwanā bwanga wa Yesu Kidishitu. (Bilongwa 11:26) Yesu mwine bidi wānenene amba: “Shi mwikale mu mwanda wami, nabya mwi bami bana ba bwanga binebine.” (Yoano 8:31) Shako i kutupu muntu ubwanya kukōkela ku binenwa bya Yesu mu muswelo mubwaninine. Inoko mwine Kidishitu uloñanga bukomo bwa kulonda bufundiji bwa Yesu ne kino kifwaininwe kumwekela mu bilongwa byandi difuku ne difuku. Tala bino bimfwa.

Bene Kidishitu bekalanga na buswe bwampikwa kwisakila

Byānenene Yesu: “Nemupe mbila mipya, amba mwisanswe banwe bene na bene; monka monemusanshilwe, nenu mwisanswei banwe bene na bene. Pa kino bonso bakayuka’mba mwi bami bana ba bwanga—shi mudi na buswe umbukata mwenu.”—Yoano 13:34, 35.

Byālongele Yesu: Yesu wādi usenswe bantu bonso, bekale bampeta nansha balanda, babitenta nansha ba munshi, kadi nansha shi batamba kwepi. Wāundapile babela, wādisha bādi na nzala, enka ne kupāna būmi bwandi pa mwanda wa bantu.—Mateo 14:14-21; 20:28.

Biloñanga bene Kidishitu: Bene Kidishitu balombolanga buswe na kupañana bintu, kwikala bambikwa mboloji, ne na kulekela bakwabo bilubo. Bakwashanga bantu basakilwa bukwashi, kadi bekalanga na mutyima wa kwipānina bakwabo.—1 Yoano 3:16.

Bene Kidishitu Kebadipo na Budimbidimbi

Byānenene Yesu: “Ami ne . . . bubine.”—Yoano 14:6.

Byālongele Yesu: Yesu wādi muntu ukulupilwa mu byonso byaādi unena ne byaādi ulonga. I kutupu muntu nansha umo waādimbile nansha waāsapwidile myanda ya bubela. Wādi muyukane bu muntu wampikwa budimbidimbi, wādi unenanga’nka myanda ya bine nansha shi isa kusansa bantu.—Mateo 22:16; 26:63-67.

Biloñanga bene Kidishitu: Bene Kidishitu kebabepangapo. Bafutanga bitanshi, kebebangapo, kadi bengilanga bininge kaji pampikwa budimbidimbi. (Bene Loma 13:5-7; Bene Efisesa 4:28) Kebaselangapo bantu bintu na manyengenyenge, kutentula malondololo mu ekizamé, kadi kebalongejangapo mikanda ya bubela.—Bahebelu 13:18.

Bene Kidishitu bekalanga na kanye

Byānenene Yesu: “Iyai kondi banwe baputuma na mingilo ne balēmenenwe, nami nkemutūja. Selai lupungu lwami ne kuboila ñeni kondi, mwanda ngidi na ngikadila italala ne mutyima wa kwityepeja, kadi mukamona kutūja. Mwanda lupungu lwami i luyampe, ne kiselwa kyami nakyo i kipēla.”—Mateo 11:28-30.

Byālongele Yesu: Yesu wādi muntu ulumbwa kadi bantu bādi bapēlelwa kumufwena. Bana bādi bamufwena, wāsengele boba bādi batyumukwe mityima, kadi wādi ulēmekekele bantu.—Mako 10:13-15; Luka 9:11.

Biloñanga bene Kidishitu: Bene Kidishitu besambanga na bakwabo na bulēme; kebatukañanangapo nansha kufutululañana. (Bene Efisesa 4:29, 31, 32) Batanga bakwabo mutyima ne kukimba mikenga pa kwibakwashisha.—Bene Ngalatea 6:10.

Bene Kidishitu kebalubilangapo benē pabo na kulonga makoji

Byānenene Yesu: “Kyokya kyakuta Leza pamo mu lupungu, muntu nansha umo kakikalañanya’kyo.”—Mako 10:9.

Byālongele Yesu: Nansha Yesu byākadipo na mukaji, wākankamikile boba besongele baleke kwilubila na kulonga makoji. (Mateo 19:9) Wāletele ne kidyumu kya bintu bifwaninwe kwepuka boba besongele kutyina bakōnakanya busongi bwabo na kulonga makoji.—Mateo 5:28.

Biloñanga bene Kidishitu: Bene Kidishitu kebaloñangapo bintu bizobeja bene pabo. (Bahebelu 13:4) Bene Kidishitu besongele besanswanga ne kwilēmeka.—Bene Efisesa 5:28, 33.