Mwanda Waka Ndoe Keidipo pa Ntanda?

Bilondolola Bible

Bantu i bakomenwe kuleta ndoe pa ntanda, kadi bakakomenwa nyeke pa bubinga buvule:

• “Muntu wenda kadipo na lupusa lwa kōlola ditabula dyandi.” (Yelemia 10:23) Bantu kebāpangilwepo na bukomo ne lupusa lwa kwiludika abo bene, o mwanda kebabwanyapo kuleta ndoe ya nyeke.

• “Kemwakikulupilai bamfumu nansha mwanā muntu kabwanyapo kuleta lupandilo. Mushipiditu wandi utambanga, aye wajokela ku biloba; enka mu dine difuku’dya milangwe yandi yaoneka.” (Ñimbo ya Mitōto 146:3, 4) Bendeji ba ntanda, enka ne boba badi na milangwe miyampe, kebabwanyapo kupwa lonso bintu bilengeja mavita.

• “Mu mafuku a mfulo kukekalanga bitatyi bya makambakano bikomo ne mwa kulongela. Mwanda bantu bakekala . . . ba bukalabale bwa malwa, bampikwa kusanswa buyampe, ba kwaba bakwabo, ba mitwe myūmu, bayule mitatulo.” (2 Temote 3:1-4) Pano tudi mu “mafuku a mfulo” a ino ntanda mibi, kitatyi kine kidi’ko ngikadila ilengeja ndoe ikome.

• “Malwa obe ntanda ne abe dijiba, mwanda Dyabola watūkila pomudi, udi na bulobo bukatampe, pa kuyuka’mba udi na kakitatyi katyetye.” (Kusokwelwa 12:12) Dyabola, walwana na Leza, wāelelwe pano panshi kadi ukankamikanga bantu beule mushipiditu wandi wa mushikwa. Byakidi “mulopwe wa ino ntanda,” ketubwanyapo kwikala mu ndoe nansha dimo.—Yoano 12:31.

• “[Bulopwe bwa Leza] bukavingakanya ne kufudija ano malopwe onso, kadi abo kete bukemananga nyeke.” (Danyele 2:44) Bulopwe bwa Leza, bo buketuletela ntanda ya ndoe ya nyeke yotusaka, ke umbikalopo wa muntu.—Ñimbo ya Mitōto 145:16.