Lelo Leza Udi na Dijina?

Bilondolola Bible

Bantu bonso badi na majina. Mwene Leza nandi ufwaninwe kwikala na dijina? Bantu bapwene basangelanga kwiita pa majina abo. Tubulwe’po netu kwiditela mu bulunda bwetu na Leza?

Leza unena mu Bible amba: “Ami ne Yehova, dyo dyami dijina.” (Isaya 42:8) Nansha Leza byadi na bitenta bivule, pamo bwa “Leza Mwinē Bukomo Bonso,” “Mfumu Mwinē Lupusa Lonso,” ne “Mupangi,” ukwete na mutyika batōtyi bandi ne kwibanena bamwite pa dijina dyandi.—Ngalwilo 17:1; Bilongwa 4:24; 1 Petelo 4:19.

Mu malamuni mavule a Bible dijina dya Leza ditanwa mu Divilu 6:3. Uno vese unena’mba: “Nadi mwekelanga Abalahama, Izake, ne Yakoba bu Leza Mwinē Bukomo Bonso, ino pa mwanda wa dijina dyami Yehova nkyeyukenyepo kobadi.”

Yehova i dijina dya Leza mu Kiluba dingidijibwe mu tutwa twa myaka. Nansha befundi bavule ba Bible byobeditelanga bu “Yahweh,” ino Yehova dyo dijina diyukene bininge. Kipindi kibajinji kya Bible kekyāsonekelwepo mu Kiluba ino i mu Kihebelu, ludimi lutangwa kutamba ku lundyo wenda ku lunkuso. Mu Kihebelu, dijina dya Leza i dilembwe na tumama tuná, יהוה. Tuno tumama tuná twa Kihebelu—twalamwinwe bu YHWH—i tuyukane bu Tetragrame.