Le Dyabola Wikalanga Kwepi?

Bilondolola Bible

Dyabola, kipangwa kya ku mushipiditu, wikalanga mu kifuko kyampikwa kumweka. Inoko kadipo mu kalunganyembo ka mudilo mwasusula bantu babi, na mokilombwedilwe pa kifwatulo kidi mu kino kishinte.

“Divita mūlu”

Kyaba kimo, Satana Dyabola wādi wendakana mwasakila mu kīkalo kya mishipiditu, utwela’nka ne kokwa kudi Leza ne bamwikeulu ba kikōkeji kwine. (Yoba 1:6) Ino Bible wālaile amba kukekala “divita mūlu,” mfulo yadyo i Satana kupangwa mūlu ne ‘kwelwa’ye panshi.’ (Kusokwelwa 12:7-9) Mbadilo ya bitatyi bya mu Bible ne myanda ilongekele mu ntanda bilombola’mba dino divita ke dipwe kala kupita. Dyabola udi pano kufulakufula kwa ntanda.

Le ko kunena’mba Dyabola ushikatanga pantu kampanda pano panshi? Kimfwa, kibundi kya kala kya Pengamume kyādi kitelwa bu “kwine kudi lupona lwa Satana” ne bu “mwine mushikete Satana.” (Kusokwelwa 2:13) Ino mobimwekela, bino binenwa bifunkila pa kuvula kwādi kuvudile butōtyi bwa Satana mu kine kibundi’kya. Bible unena’mba Dyabola ubikele “malopwe onso a ntanda ikelwe na bantu.”—Luka 4:5, 6.