Mwanda Waka Bantu bafwanga?

Bilondolola Bible

I byendele’mo kwiipagula kine kifwila bantu, nakampata shi twi bafwilwe muntu otusenswe. Bible unena’mba: “Lunonga luleta lufu i bubi.”​—1 Bene Kodinda 15:56.

Mwanda waka bantu bonso baloñanga bubi ne kufwa?

Ba Adama ne Eva, bantu babajinji, bājimije būmi mwanda bājilwidile Leza. (Ngalwilo 3:17-19) Kintu kimo kete kyādi kya kulupuka ku butomboki bobātombokēle Leza i lufu, mwanda Leza i “Nsulo ya būmi.”—Ñimbo ya Mitōto 36:9; Ngalwilo 2:17.

Adamba wāsambulwidile lutundu lwandi bubi. Bible unena’mba: “Monka mwātwelele bubi mu ino ntanda kupityila ku muntu umo ne lufu kupityila ku bubi, mo mwasambakenine ne lufu ku bantu bonso mwanda bonso balongele bubi.” (Bene Loma 5:12) Bantu bonso bafwanga mwanda abo bonso baloñanga bubi.—Bene Loma 3:23.

Lelo lufu lukatalulwa’ko namani?

Leza i mulaye kitatyi “[kyakamina] lufu nyeke.” (Isaya 25:8) Pa kutalula’ko lufu, aye ufwaninwe bidi kutalula’ko bine biluletele, ke bubi kadi. Leza ukebutalula’ko kupityila kudi Yesu Kidishitu, mwine “[utalula] bubi bwa ino ntanda.”—Yoano 1:29; 1 Yoano 1:7.