Le Bambutwile Babwanya kufundija Bana Namani Myanda ya Kusambakena pamo?

Bilondolola Bible

Le i ani ufwaninwe kufundija bana myanda ya kusambakane pamo? Bible i mupe bambutwile uno mwingilo, kadi bambutwile bavule bakwashibwe na ano madingi:

• Kokevwana bumvu. Bible unena pampikwa kafinda myanda a kusambakena pamo ne ya ngitu ya bumvu, kadi Leza wāsapwidile muzo wa Isalela amba “bana batyetye” bafwaninwe kufundijibwa ino myanda. (Kupituluka mu Bijila 31:12; kunshi kwa dyani; Bene Levi 15:2, 16-19) Ubwanya kwingidija bishima bya bulēme kebimwekejapo amba myanda ya kusambakena pamo nansha itala ngitu mifyame i ya bumvu.

• Fundija bityebitye. Pa kyaba kya kulombola obe mwana kalumba ku kutōya buluba myanda yonso ya kusambakena pamo dimo kupwididile, lombola bityebitye obe mwana tumyanda twakokeja kwivwanija.—1 Bene Kodinda 13:11.

• Fundija misoñanya ya mwa kwikadila. Padi ku masomo babwanya kufundija’ko bana myanda imoimo itala ngitu ya bumvu. Inoko, Bible ukankamika bambutwile bafundije babo bana myanda ya kusambakena pamo, mumweno muyampe wa kumona kusambakena pamo ne bya kulonga mu uno mwanda.—Nkindi 5:1-23.

• Teja obe mwana. Shi obe mwana wakwipangula kipangujo pa myanda ya kusambakena pamo, kokamufunina nansha kumutyibila mambo bukidibukidi. Ino ‘peja pa kwivwana, ija pa kwisamba.’—Yakoba 1:19.

Mwa kukingila obe mwana ku boba basaka kulāla nandi

• Wifundije bidi abe mwine. Wifunde kuyuka mwine mulongela bantu bakasaka kulāla na bana.—Nkindi 18:15; tala shapita 32 wa dibuku Les jeunes s’interrogent: Réponses pratiques, Volime 1

• Tá mutyima bininge ku būmi bwa obe mwana. Kokamwikija mu motoka wa muntu pampikwa kuyuka shi i muntu ukulupilwa, kadi kokaleka obe mwana ekale mwana “mulekwe bitupu.”—Nkindi 29:15.

• Fundija obe mwana ayuke kukōkela mu muswelo muyampe. Bana bafwaninwe kwifunda kulēmeka bambutwile babo. (Bene Kolose 3:20) Inoko, shi ufundije obe mwana amba ufwaninwe kukōkela nyeke muntu mutame e-ense, bakapēlelwa kumona. Bambutwile bene Kidishitu babwanya kusapwila wabo mwana’mba, “shi muntu wakunena kulonga kintu kimwene Leza bu kibi, kokalonga’kyo.”—Bilongwa 5:29.

• Mulombole bya kulonga pa kwikinga. Kwasha obe mwana ayuke bya kulonga shi muntu ukimba kumumwena abe patupu’ye. Longa kakyakumwena’ko kepi ka kumukwasha ekale na bukankamane bwa kunena’mba “Leka! Nsa kukusapula!” kupwa wanyema. Padi i biyampe kuvuluja’byo ‘bobe bana misunsa mivule’ mwanda babwanya kwibīlwa bukidibukidi.—Kupituluka mu Bijila 6:7. Contemporary English Version.