Lelo Leza Ushintanga Milangwe Yandi?
Bilondolola Bible
En-en, ushintanga’yo mu buluji bwa amba ushintanga mumweno wandi shi muntu washinta mwiendelejo wandi. Kimfwa, Leza paātumīne bantu ba Isalela wa kala musapu wa butyibi, wānenene amba: “Padi bakevwana kadi muntu ne muntu ukavundamina dishinda dyandi dibi, nami nkashinta milangwe yami pa kyamalwa kyonadi nanga kwibaletela pa mwanda wa bilongwa byabo bibi.”—Yelemia 26:3.
Mabible mavule alamwine uno vese pamo bwa Leza ‘wisāsa’ pa kukimba kuleta kyamalwa, bintu bine bibwanya kwivwanikwa’mba wālongele kilubo. Inoko, kishima kya Kihebelu kibajinjibajinji kibwanya kushintulula “kushinta milangwe nansha byalanga kulonga.” Mufundi umo wālembele amba: “Shi muntu washinta ngikadila yandi, bilangejanga Leza ashinte mumweno.”
Na bubine, kushinta kubwanya Leza kushinta milangwe yandi kekushintululapo amba ufwanine kushinta’yo. Tala myanda imoimo inena’mo Bible amba Leza kashintyilepo milangwe yandi:
Leza kālekelepo Balaka amushintyije milangwe yandi, afinge muzo wa Isalela.—Umbadilo 23:18-20.
Solo mulopwe wa Isalela paāsumininwe kulonga bibi, Leza wāmupelele bu mulopwe kadi wāleka kushinta milangwe yandi.—1 Samwele 15:28, 29.
Leza ukafikidija mpango yandi ya kutūla wandi Mwana bu kitobo nyeke ne nyeke. Leza kakashintapo milangwe yandi.—Ñimbo ya Mitōto 110:4.
Mwene Bible unena’mba Leza kashintangapo?
En-en, Leza unena mu Bible amba: “Ami ne Yehova; nkyalamukangapo.” (Malaki 3:6) Kadi, Bible unena’mba Leza “kashintangapo nansha kwalamuka pamo bwa minjiñininya yalamukaalamuka.” (Yakoba 1:17) Inoko kino kekipatanyapo byobya binena Bible amba Leza ushintanga milangwe. Leza kashintangapo ngikadila yandi ne kushinta misonganya yandi ya buswe kadi myoloke. (Kupituluka mu Bijila 32:4; 1 Yoano 4:8) Ino ubwanya kupa bantu bulombodi bwishileshile mu bitatyi palapala. Kimfwa, Leza wāpele Mulopwe Davida bulombodi bwishile pa kukalwa malwi abidi malondakane, ino manwa onso abidi aendeka.—2 Samwele 5:18-25.
Le Leza wialakanyanga pa kupanga bantu?
Aa, nansha byawialakanyanga pamupelanga bantu bavule. Bible wisambila pa ngikadilo yādi’ko kumeso kwa Dilobe dya ntanda yonso dya mu mafuku a Noa. Unena’mba: “Yehova wēalakanya ne kine kyaālongēle bantu pa ntanda, kadi mutyima wandi wāmufīta fututu.” (Ngalwilo 6:6) Mu uno vese, kishima “wēalakanya” i kitambe ku kishima kya Kihebelu kibwanya kwikala na buluji bwa “kushinta milangwe.” Leza wāshintyile milangwe pa bantu bavule bāikele’ko kumeso kwa Dilobe mwanda bābipile. (Ngalwilo 6:5, 11) Nansha byawāivwene bulanda pobātongele kulonga bibi, kāshintyilepo mumweno waādi umona bantu bonso mu kikonge. Na bubine, wāpandije bantu ku Dilobe kupityila kudi Noa ne kisaka kyandi.—Ngalwilo 8:21; 2 Petelo 2:5, 9.