Le Batumoni ba Yehova Badi na Bijila Bifwaninwe Kulonda Boba Benangila Mwanda wa Kwisonga?

Batumoni ba Yehova bakulupile amba misoñanya ne bijila bidi mu Bible bibwanya kwibakwasha bakwate butyibi bobabwanya kumwena’mo kadi busangaja Leza. (Isaya 48:17, 18) Kebatwepo batūdile’ko ino misoñanya ne bijila, ino twiikōkelanga. Tala’ko misoñanya ne bijila bimo bibwanya kwingidijibwa mu mwanda utala kwinangila.a

• Busongi i bwa lonso. (Mateo 19:6) Batumoni ba Yehova byo bamonanga kwinangila bu ditabula ditwala ku busongi, o mwanda bekumonanga bu kwa mvubu.

• I enka boba ke batame, babwanya kusonga nansha kusongwa bo bafwaninwe kwinangila. Mwanda i ‘bapite pa kusongola,’ nansha’mba kitatyi kikalanga muntu na kilokoloko kikatampe kya kusambakena pamo.—1 Bene Kodinda 7:36.

• Boba benangila bafwaninwe kwikala na bwanapabo bwa kwisonga. Bantu bamo belubwile mungya bijila bya Leta, bamonwanga na Leza bu kebadipo na bwanapabo bwa kusonga nansha kusongwa na muntu mukwabo, mwanda mungya misoñanya yandi, bubinga bumo kete bubwanya kwilubwila bantu i enka busekese.—Mateo 19:9.

• Mwine Kidishitu ukimba kusonga nansha kusongwa ufwaninwe kwisonga enka na mwitabije. (1 Bene Kodinda 7:39) Batumoni ba Yehova kebengidijangapo uno musoñanya ku muntu ulēmekele’tu nkulupilo yabo ino i ku muntu obadi nandi nkulupilo imo kadi i Kamoni mubatyijibwe ulonda ino nkulupilo. (2 Bene Kodinda 6:14) Tamba kala, Leza usoñanyanga batōtyi bandi besonge enka na boba bobadi nabo lwitabijo lumo. (Ngalwilo 24:3; Malaki 2:11) Enka ne bakimbi ba mu ano etu mafuku babingijanga kino kijila.b

• Bana bafwaninwe kukōkela bambutwile babo. (Nkindi 1:8; Bene Kolose 3:20) Ku bana bashikata mu mobo a bambutwile babo, mu uno musoñanya mubadilwa ne kukōkela butyibi bwa bambutwile babo butala kwinangila. Mubwanya kubadilwa myaka itūdile bambutwile babo bu yo ifwaninwe mwana mwana-mukaji nansha mwana-mulume kushilula kwinangila, ne byobabwanya kulonga pobenangila.

• Kamoni ne Kamoni utoñanga aye mwine kitatyi ne muntu wa kwinangila nandi inoko na buludiki bwa Bisonekwa. Kino i kikwatañane na musoñanya wa amba: “Muntu ne muntu ukeselelanga kiselwa kyandi.” (Bene Ngalatea 6:5) Shako, bavule pobakimba kwinangila balombanga madingi ku Batumoni batame mu myanda ya Leza bebatele mutyima.—Nkindi 1:5.

• Bintu bivule biloñwanga mu kwinangila i bubi bukatampe. Kimfwa, Bible witusoñanya twepuke busekese. Muno kemubadilwapo enka kusambakena pamo ino i ne bilongwa byonso bya disubi bilonga bantu bampikwa kwisonga, pamo bwa kukaila ku mutaka wa mukwabo nansha kutweja ngitu ya bumvu mu kanwa nansha ku matako. (1 Bene Kodinda 6:9-11) Enka ne kwilangula bilokoloko bya busekese kumeso kwa kwisonga ino kuponena mu busekese mpika, nako i “disubi” kadi kufityijanga Leza mutyima. (Bene Ngalatea 5:19-21) “Mīsambo ya kiboja” ya bya busekese nayo i mipelejibwe mu Bible.—Bene Kolose 3:8.

• Mutyima, nansha’mba muntu wa munda, i ñongojani. (Yelemia 17:9) Ubwanya kulengeja muntu alonge bintu byayukile amba i bibi. Pa kusaka’mba boba benangila baleke kongolwa na mutyima wabo, i biyampe baleke kwitolwela. Babwanya kwitūdila’ko na ndingamano mikalo ya kwibakinga pamo bwa kwikala pa bantu nansha na kakunku. (Nkindi 28:26) Bene Kidishitu bankunga bakimba ba kwisonga nabo kebafwaninwepo kwilwa kyaka kidi mu kukimba wa kwisonga nandi pa masite, kimfwa babwanya kwinangila na muntu okebayukilepo biyampe.—Ñimbo ya Mitōto 26:4.