Lelo Bible Unena Bika pa Mālwa? Lelo Kutoma i Bubi?
Bilondolola Bible
Kutoma pa ntomeno ke bubipo. Bible unena’mba vinyu i kyabuntu kya Leza kibwanya kulengeja būmi bwikale bwa nsangaji. (Ñimbo ya Mitōto 104:14, 15; Musapudi 3:13; 9:7) Kadi Bible witabija’mba vinyu ibwanya kundapa. —1 Temote 5:23.
Yesu paādi pano pa ntanda wātomene vinyu. (Mateo 26:29; Luka 7:34) Mu kingelengele kyandi kimo kiyukane biyampe, Yesu waālamwine mema ke vinyu bu kyabuntu kya ku buntu ku masobo a butundaile.—Yoano 2:1-10.
Byaka bidi na mutomeno-mpata
Nansha Bible byanena’mba mālwa okokeja kukwasha, ino upeleja mutomeno-mpata ne bunkolwankolwa. Nanshi mwine Kidishitu usaka kutoma mālwa ufwaninwe kwiatoma pa ntomeno. (1 Temote 3:8; Tetusa 2:2, 3) Bible uleta bubinga buvule bwa kulekela mutomeno-mpata.
Mutomeno-mpata utyepejanga bukomo bwa kulanga ne bwa kutyiba mbila. (Nkindi 23:29-35) Muntu mukolwe kabwanya kulēmeka musoñanya wa mu Bible unena’mba, “lambulai imbidi yenu ke kitapwa kyūmi, kijila, kitabijibwa na Leza, ke mingilo ikola na bukomo bwenu bwa kulanguluka kadi.”—Bene Loma 12:1.
Ulengejanga muntu aleke kwīfula kadi abulwe “mutyima wa kulonga byoloke.”—Hosea 4:11; Bene Efisesa 5:18.
Utwalanga ku bulanda ne ku misongo mikatampe.—Nkindi 23:21, 31, 32.
Kutoma mālwa mangi ne bunkolwankolwa kebisangajangapo Leza.—Nkindi 23:20; Bene Ngalatea 5:19-21.
Le pa kukadikila i pepi?
Muntu watoma mālwa mangi i yewa watoma mālwa amutūla aye nansha bakwabo mu kyaka. Mungya Bible, muntu mukolwe kayukenangapo ku kujimija milangwe, ino ku kubulwa kuyuka byalonga, ku kulunduka, ku kimpuma ne ku kubotakanya. (Yoba 12:25; Ñimbo ya Mitōto 107:27; Nkindi 23:29, 30, 33) Nansha ke boba batomanga kukolwa mpika babwanya ‘kulēmenenwa na mutomeno-mpata’ ne kufikilwa na bintu bibi bilupukanga’ko.—Luka 21:34, 35.
Kuleka’tu kutoma’o
Bible ulombola bitatyi bibwanya mwine Kidishitu kuleka kutoma mālwa:
Shi bakwabo bakakukala.—Bene Loma 14:21.
Shi kutoma mālwa kujilula kijila kya ntanda.—Bene Loma 13:1.
Shi muntu ukomenwa kwīfula mu mutomeno wandi wa mālwa. Bantondwe ne boba badi na makambakano makwabo atamba ku kutoma mālwa bafwaninwe kulonga’po kintu.—Mateo 5:29, 30.