Le Makayo a Kwidya Lupeto I Bubi?

Bilondolola Bible

Nansha Bible byakesambīlepo bininge pa makayo a kwidya lupeto, tubwanya kujingulula kupityila ku misoñanya ya mu Bible amba Leza umwena makayo a kwidya lupeto bu bubi.—Bene Efisesa 5:17.a

• Makomwa-meso mene ashikilwe Leza, alengejanga bantu bakaye makayo a kwidya lupeto. (1 Bene Kodinda 6:9, 10; Bene Efisesa 5:3, 5) Boba bakaya makayo a kwidya lupeto bakimbanga kudya lupeto lwa boba benda kukakaya’o, ino Bible upeleja kwabila bintu bya bantu.—Divilu 20:17; Bene Loma 7:7; 13:9, 10.

• Kukaya makayo a kwidya lupeto, nansha’tu lutyetye kubwanya kulengeja muntu asanswe lupeto bya lufu.—1 Temote 6:9, 10.

• Boba bakaya makayo a kwidya lupeto bakulupile mu kabutyibutyi nansha mu leza wa dyese. Inoko Leza umwene lukulupilo lwa uno muswelo bu kutōta bilezaleza, kwine kekukwatañenepo na kutōta kotumutōta.—Isaya 65:11.

• Pa kyaba kya kukankamika mutyima wa kusokola kintu pampikwa kwingila, aye Bible witukankamika twingile bininge. (Musapudi 2:24; Bene Efisesa 4:28) Boba balonda madingi adi mu Bible babwanya “kudya byakudya byobesokwela abo bene.”—2 Bene Tesalonika 3:10, 12.

• Kukaya makayo a kwidya lupeto kubwanya kukolomona mushipiditu mubi wa kwitāka, mwine upelejibwe mu Bible.—Bene Ngalatea 5:26.